Joined July 2019 Message
  • Day53

    Isla de la Plata

    September 14, 2019 in Ecuador ⋅ ☁️ 20 °C

    Bereist mer Ecuador stellt sich irgendwenn d Frog: Galapagos JA oder NEI. Antwort git denn aber schnell s Budget.
    Mir Sparfüchs hend e anderi Insle gfunde, sozege d Galapagosinsle für Backpacker. Die isch nume 2 h Weg vo Montañita entfernt und vieel günstiger als en Galapogos - Bsuech.
    Mir sind vo Puerto Lopez mit em Boot Richtig "Isla de la Plata" gfahre (uf Dütsch "Silberinsle" wils angeblich en Silberschatz versteckt hed - mir hend ihn leider nöd gfunde und sind darum nöd glich na uf d Galapagos) und hend underwegs sogar scho Wal gseh. Uf de Insle acho hend mir mit em ne Guide e Tour gmacht und die verschiedenste Vögel beobachtet. Zum Biispiel hend mir Blaufuesstölpel gseh, wo ganz ihrem Name entsprechend blaui Füess hend. Die chömeds aber erscht über, wenns erwachse sind. Je älter sie sind, desto dunkler ischs Blau vo ihrne Füess. Mir hend s Glück gha, i de Brüeteziit uf de Insle z si und hend darum viel Vögel gseh, wo grad am Eier usbrüete gsi sind. De Nochteil dra isch gsi, dass sie mengmol mitte uf em Weg brüetet hend. Für üs hed denn das bedüüted, dass mir durs Gstrüpp dem Vogel usem Weg gange sind und ihn in Rueh brüete loh hend.
    Uf em Retourweg hend mir au no Schnorchelstopp gmacht und debi Schildkrote und verschiedensti Fisch gseh. S Highlight sind denn aber nomal d Wal gsi - en junge Wal isch mehrmols us em Wasser gumped und de Erwachse hed sich doch für es paar Schwanzflosseschläg chöne motiviere!
    Read more

  • Explore, what other travelers do in:
  • Day50

    Montañita

    September 11, 2019 in Ecuador ⋅ ⛅ 22 °C

    Noch ganz viel Action in Baños sind mir mit emne Nachtbus Richtig Montañita, es Dörfli grad a de Küste, gfahre.
    Noch em erste Tag in dem chline Küstedörfli sind mir früeh is Bett (ja de Nachtbus isch nöd erholsam) und hend üs uf e friedlichi Nacht gfreut - leider hend mir üs z früeh gfreut. Obwohl mir extra KEIS Partyhostel buecht hend, heds luuti Musig gha, mitte i de Nacht hend Lüt s Liecht im Zimmer agmacht, duschet, de Alkohol nöd vertreit,.. Am nögste Morge sind mir üs einig gsi, dass mir s Hostel wechsled und hend chli usserhalb vo Montañita es Hüttli ganz für üs allei gfunde. Ja s isch u ruhig und i de Nacht ghört mer im Bett d Welle vom Meer rusche.

    Montañita isch sehr bekannt als Surferstadt, also hend mir Bretter gmietet, üs is Meer gstürzt und jedi Welle verwütscht! Oder hed jedi Welle üs verwütscht?! Uf jede Fall heds üs scho es paar Mal richtig verrührt - Salzspüehlig inklusive. Aber das ghört dezu und je länger je meh klappeds au mit em Usecho und Ufstoh immer besser (also zumindest bi de Irene😊)🏄🌊
    Mir tüend aber nöd nume surfe, sondern hend au es paar Spanischlektione gnoh (Si nosotros hablamos español, oder wenigstens probiered mirs😀), wo mer nöd nume üses Spanisch ufbessered, sondern au viel über de Ort und Ecuador erfahred.
    Mir gnüsseds jetzt no die letschte paar Täg do in Ecuador, bevors denn in knapp enere Wuche wiiter uf Peru got🌴🌅🍹.
    Read more

  • Day40

    Baños

    September 1, 2019 in Ecuador ⋅ ⛅ 18 °C

    Baños het sehr vill z büüte für Touriste. Einersits hets do unglaublich vill Wasserfäll. De megabekannt "pailon del diablo" isch zwar idrücklich vo de Wassermengi wo abechunt, aber gnüsse chamers wegem Massetourismus (die Iheimische stürmet det ane) definitiv nöd. Die weniger bekannte sind defür umso schöner!
    Die berüehmt Schaukle hemmer nach knapp 1.5h ufelaufe erreicht, jedoch isch au das meh e Touristeattraktion gsi, als dass d Schaukle so bsunders gsi wär...
    Baños büüted au vill für de Adrenalinspiegel. Mir sind go Zipline, Riverrafte und vode Brugg gsprunge.

    Und hend überläbt!!
    :D
    Read more

  • Day36

    Quilotoa und Chugchilan

    August 28, 2019 in Ecuador ⋅ ⛅ 17 °C

    Nachme Zwüschehalt in Latagunga simer mitem Bus zude Lagune Quilotoa und hend üses Gepäck amne Taxifahrer mitgä, zums i üses Hostel z Chugchilan z transportiere. Denn hend mir üs z Fuess ufde Weg gmacht, zersch simer ufem Grat de Lagune entlang gwanderet, wo d Natur so schön gsi isch! Denn simer witer Richtig Hostel, allerdings isch d Landschaft denn chli kahler und eitöniger worde. Nach stundelangem Laufe hemer üses Ziel denn erblickt. Luftlinie öppe 500 Meter entfernt - dummerwiis isch zwüschedine na es Tal gsi. Sprich alles abelaufe, es Bächli überquere und denn wider alles ufelaufe. Mir sind so froh gsi, simer nach insgesamt öppe 5h im Hostel acho.
    Fazit: d Lagune Quilotoa isch hammer und s Hostel isch s schönste womer je gsi sind, jedoch d Natur hemer üs chli schöner vorgstellt.
    Read more

  • Day34

    Otavalo

    August 26, 2019 in Ecuador ⋅ ⛅ 22 °C

    Nachdem mer vo Quito us guet 1.5h mitem Bus in Norde gfahre sind, hemmer in Otavalo s Taxi bis zum Hostel gno, wo guet 6km usserhalb vom Städtli gsi isch. Vode Rezeption zum eigentliche Hostel hend mir no es paar Minute mitem Auto bruucht. Churz vorem Hostel hemer es chlises Füür vorem Wäldli gse, womer üs no gwunderet hend, ob do öper luegt. S Hostel isch herzig und bescheide gsi, jedoch isch denn de Rauchgschmack immer penetranter worde, bis mer meterhöchi Flamme usem Wäldli gseh hend. Schnell hend all usem Hostel mit Wasserchübel und Sand ghulfe de Brand izdämme und z lösche. D Bsitzer vom Hostel hend sich aber viel weniger Sorge gmacht als mir, sie hend das Ganze zimli easy gno. Obwohl mer irgendwenn z Gröbschte glöscht hend, hets überall no grüücht und immer wider sind chlini Flamme ufgflackeret. Will s Hostel gad nebetdra gsi und us Holz baut isch, isches üs nöd ganz Ghüür gsi zum det übernachte. Drum hemer churzerhand s Gepäck gno und sind wider zrugg is Städtli Otavalo, zum es anders Hostel z sueche. Will s nüüe Hostel denn sehr zentral gsi isch, simer no churz im berüehmte Markt umeglaufe und hend die unerwartet Wendig vo dem Tag mit lokale Bier (unter Anderem us Cocablätter) usklinge loh.
    Am nächste Tag hemer vomne Taxifahrer erfahre, dasses zwar e Füürwehr git, sies aber nöd für wichtig erachtet zum bi Waldbränd uszrucke 🙁
    Read more

  • Day32

    Amazonas - Cuyabeno Reserva

    August 24, 2019 in Ecuador ⋅ ⛅ 27 °C

    Am Mittwochobig sind mir mit emne Nachtbus Richtig Amazonas gfahre. Richtig erholsam isch die Fahrt allerdings nöd gsi - Schlaglöcher und de energisch Fahrstil vom Fahrer heds s schloofe nöd ganz aifach gmacht. Zum zu üsere Underkunft z cho, sind mir denn is Kanu umgstige und uf em Flussweg hend mir bereits die erste Affe und Schlange gseh.
    Das Beobachte oder vorallem s Finde vo Tier isch üsi Hauptbeschäftigung gsi im Amazonas:
    De Guide stoot a de Spitze vom Boot, stoppt s Boot und zeigt üs d Tier. Üs hed sich es paar Mol d Froog gstellt: WIE gseht er die Tier bi dem Tempo?! Und denn: Also hää, wo isches? - Nai ich gsehs nonig🧐🤔
    Aber mir hend üs gsteigeret - mit de Ziit hend au mir alli Tier gfunde und ufde Bootstour ide Nacht hend mir d Kaimans fasch glichziitig wie de Guide gseh (das liit sicher a üsne top Stirnlampe!!)!
    Au ufde Walkingtour dur de Dschungel hed de Guide üs spannendi Tier und Pflanze zeigt, biispilswis de Killerbaum (en Baum wo um en andere Baum umewachst und dä für s eigne Wachstum usnutzt) oder en Pilz wo usere Rieseameise use wachst, wiel die e sone Pilz gässe het, somit infiziert worde isch und den zombieähnlichs Verhalte zeigt.
    A aim Tag hend mir au es indigens Dorf bsuecht und mit ihne Yucca - Brot bachet (s isch meh Tortilla als Brot gsi, aber gern hend mirs glich gha).
    Noch 3.5 Täg im Amazonas ischs denn mit Kanu und Bus wieder zrugg uf Quito und aimol meh sind mir froh über die küehle Temperature gsi.
    Read more

  • Day28

    Quito

    August 20, 2019 in Ecuador ⋅ ⛅ 21 °C

    Noch dem füechte und heisse Klima währed üsere Ziit a de karibische Küste in Kolumbie hend mir üs umso meh uf die chüehlere Temperature in Quito, üsem erste Stopp in Ecuador, gfreut!
    Aimol meh ischs e grossi Stadt mit vielne Lüt und viel Verkehr ( = vieel stinkigi Abgas).
    Au wenn Ecuador s Nachbarsland vo Kolumbie isch, s Flair isch ganze es anders - mer gspürt scho de Iifluss vo de Anden.
    En wiitere Unterschiid isch au d Höchi. Mir sind vo Santa Marta (Meereslevel) direkt uf Quito (2800 m ü.M.) gfloge. Als wär das nonig gnueg höch, hend mir d Gondelbahn uf de "Pichincha" (Huusvulkan vo Quito) gnoh und döt e chlini Wanderig gmacht. Üses Herz und üsi Lunge hend debi recht müese schaffe, wil de höchsti Punkt vo üsere Tour öppe uf 4400 m ü. M. gsi isch. De sehr rutschig Sandbode het s Laufe nöd eifacher gmacht, aber mir hend immerhin e Usred gha, zum ganz langsam z wandere.😊

    5 Wuche noch de Irene ihrem Unfall (so dumm) isch de Ziitpunkt fürs Röntgen cho. Für 20 Dollar hed d Irene ganz spontan inere "Klinik" (also vo usse heds usgeh wie e Autogarage und vo inne ischs nöd viel besser worde) chöne röntgen. Leider verstönd mir au in Ecuador s Spanisch nöd viel besser, darum isch üs bis jetzt nöd ganz klar, öb de Knoche zemegwachse isch, aber de Arzt hed "si, si" gemeint (und das hend mir verstande).

    Während üsere Ziit in Ecuador reised mir nöd immer allei, sondern hend Bsuech vom Simon und em Damian us de Schwiiz.
    Read more

Never miss updates of Irene Bruhin with our app:

FindPenguins for iOS FindPenguins for Android