Estancia Milluri

D'Nacht isch super gsi. Min Körper freut sich mal uf en Tag wos ned andauernd chalt - heiss - chalt und so wiiter isch. Hoffentlich. Pünktlich es paar Minute vor Buffetstart bedienemer eus bim fantastische Zmorgebuffet. Stellt sich use dases bedient wär wemer ned z'früeh dete wär - upsi ^^ Hauptsach mir sind bald fertig und schaffeds pünktlich uf eusen Bus in Richtig Oruro. Ich verbringe meh oder weniger di ganz Fahrt mit Blog schribe. Bi zimli hindedri 😇 Das isch aber halb so wild, wil währed de ganze vier Stunde gsehmer eigentli vorallem verlassni riesigi ebni Felder und ide Ferni d'Berge. Pünktlich chömemer z'Oruro a und mached eus miteme (übertüürete) Taxi uf zude andere Bushaltestell, wo d'Minibüs uf Sajama sölled fahre. Tatsächlich stoht scho eine parat und mir gebed euses Gepäck ab, gönd schnell es lokals Mittagsmenu go esse und sind denn überpünktlich ei Minute vor Abfahrt wider bim Büsli (also bim Auto mit acht Plätz). Dummerwiis häts nume na ide hintere Reihe freii Plätz, wos aber für eusi lange europäische Bei bitz eng isch. Janu, sind ja au wider nume öppe vier Stunde 😅 Nebst wenig Platz hämer au ab und zue es bitz wenig Suurstoff aber ja, Alternative hettis öppe keini geh... Schliessli schmeisster eus bide Abzwiegig zum Dorf use und mir müend en Weg sueche zum di letste 12 km überbrücke. Es chunnt grad es Auto usem Dorf wo meint, dases schnell goht go tanke aber eus i 20 min ufem Zruggweg chan uflade. Tönt guet. D'Warteziit verbringemer miteme Plauderstündli mitem Taxifahrer, wo eus au wür is Dorf bringe (aber nime mal a für tüürer). Nebed eus ragt de Sajama id Höchi, mit 6'542 Meter de höchst Gipfel vo Bolivie. Nach 45 Minute goht d'Sunne unter und mir entscheided, dasmer jetz zu jedere Möglichkeit würed ja sege (s'Taxi isch mit anderne Lüt unterwegs) und siehe da, nachere Stund chunnt s'Auto zrugg vom tanke und mir stopfed eus z'sechste is Auto ^^ Holprigi 12 km spöter werdemer vorem Hostel usglade. Isch sicher billiger gsi als s'Taxi aber obs das d'Warteziit wert gsi isch...? Im Hostel acho chömer direkt euses Zimmer, also eigentli es eiges Hüsli isch, bezieh. Es isch iischalt und für d'Heizig müestemer extra zahle. Wil d'Übernachtig sus scho verhältnismässig tüür isch, entscheidemer eus für Taktik Körperwärmi ^^ Vorem Znacht redemer mitem Hostelmensch über Usflugsmöglichkeite. Er verzellt vo Lagune aber wo mir afanged vome Gipfel uf 5'000 Meter rede, meinter, dass das en guete Aklimatisierigsberg für en 6'000er ide Nöchi wär, womer denn ja am Sunntig chönnted mache. Tönt verlockend aber mal luege, zerst machemer morn mal 5'000 und lueged wies eus nachher goht... S'Znacht isch sehr fein aber ned so warm und denn gohts ab is Bett go iiheize. Au so en Reisetag chan ermüedend si...Read more