Nevado Huayna Potosí

¡Lo hemos conseguido! Am Samstigmorge am 07.20 stömer ufem Gipfel vom Huayna Potosí 😍💪

Aber fangemer vorne a: S'Abentür started mit de Abholig im Hotel, enere Fahrt dur de verwirrt Verchehr vode Stadt, emene Halt zum Brot und Bier chaufe und denn de Fahrt über e holprigi Stross immer direkt mit Sicht uf de Huayna Potosí zue. Gsehnt scho na beidruckend us, euses Ziel für morn... Im Basecamp fassemer euses Material und verstaueds ide Rucksäck, bevors Sandwichzmittag git. Eusen Hunger halted sich nach gester und em Zmorge na in Grenze, aber es bitz Energie chömer öppe glich bruche. Währedem esse chunnt eine zrugg vode Bestiigig hüt Morge und er isch nudelfertig - scho fast beängstigend für eus. Wird scho schief cho 🙈
Ja und denn gohts los, mit einigermasse grosse Rucksäck ufem Rugge. Hüt sind nume 500 Meter Astieg bis is Höhelager ufem Programm und die schaffemer denn tatsächlich i 1.5 statt de prognostizierte 2.5 Stunde - eusi Aklimatisierig isch also guet :) Dobe acho beziehmer ide Hütte 2 eusi Matraze - viel meh isch die Hütte ned. Also ned ganz z'vergliche mitere SAC-Hütte ^^ De Rest vom Nami verbringemer mit Teeli trinke, Snacks und Znacht esse und pläuderle mit de andere Lüt. Schliessli gnüssemer bi chälter werdender Umgebig d'Obigstimmig binere au uf dere Höchi scho fantastische Ussicht 🤗 Und so gege di siebni gohts denn au scho go ligge. Alli andere started ihren Ufstieg am Morge am eis und stönd dementsprechend um Mitternacht uf. Mir hend mitem Mario abgmacht, dass eus au zwei Stunde spöter langed wilmer kei Lust hend, zum vorem Sunneufgang ufem Gipfel si und denn dete müese in Wind und Chälti warte. Lieber de Sunneufgang ufem Ufeweg ha und denn au weniger Lüt ufem Gipfel atreffe... D'Nacht zeigt sich wie erwarted unruhig, unbequem und spötistens mitem parat mache vode andere zimli unmöglich zum schlofe. Immerhin isches im Schlofsack ine zimli warm und so bini denn tatsächlich sogar es bitz erholter als erwarted, wo am zwei au eusen Wecker schelled. Lustigerwiis schiint am Mario sin Wecker ned funktioniert z'ha, mir weckeden denn bi Glegeheit mal ^^ Ja und denn heissts zmörgele und Kleider, Chlettergstälti und Helm montiere und Abmarsch in völliger Dunkelheit. Mir sind di letste wo started und gsehnd am Berg dementsprechend verschiedeni Stirnlampeseilschafte ufem Ufstieg ^^ Nach 10 Minute started de Gletscher, mir montiered also Stiegise und Seil und stampfed los. Nach wenige Minute wirds mir extrem schlecht und mir müend Pause mache. Umchere? Eigentlich kei Option aber so wiitermache au ned. Scheibe, mit dem hani ned grechnet, fühl mi würkli scheisse... Schliessli entscheided mis Ego, dasmers eifach langsam wiiterprobiered und siehe da, min Buch erholt sich tatsächlich entgege mine Erwaritige und es goht langsam aber stetig de Berg duruf 💪 Im Liecht vo eusne Stirnlampe gohts einigermasse flach entlang vo Gletscherspalte und lässige Iisformatione, steil enere Krete entlang mit gfühlt endlose Abgründ links und rechts und denn namel es bitz flacher am Gipfel entgege. D'Sicht uf s'Liechtermeer vom Stadtteil El Alto und d'Morgedämmerig motiviered immer denn, wenn Körper und oder Chopf wend ufgeh. So ganz ohne isch de Ufstieg ned und ich mues mi es paar Mal zwinge zum ned ufgeh. Anderi Seilschafte hends ned gschafft und chömed eus scho entgege oder gnüssed d'Stimmig am Wegrand... Mit Tee und Snickers gohts bi eus immer wiiter, bis öppe e Halbstund unterem Gipfel schliessli d'Sunne ufgoht 🤩 Vo denn a chunnt de für mich härtist Teil. Ich mag nüme, es isch namel brutal steil und de Mario leit e z'schnelli Pace ane, wils i dem Teil müehsam isch zum chrüüze mit dene wo jetz scho ufem Abeweg sind - janu, lohni mi halt halbe ufezieh ^^ Und womer denn schliessli dobe sind, weissi gar ned so genau, wasi denke und fühle... Erschöpfig, Stolz, Chälti, meh Stolz und es bitzeli Angst vorem Abstieg sinds glaub 🙈 Isch ja egal, mir gnüssed uf jede Fall die paar Minute ufem Gipfel mit bester Ussicht id Berge und uf La Paz 😍 Wie guet dasmer dete am Afang ned umkehrt hend wil nachher hät de Buch fast nüm dumm tue :)
De Abstieg isch denn prägt vo Fotistops und Faststolperer mit de Stiegise. Jetz im Tagesliecht gsehnd d'Abhäng gar nüme so schlimm us und defür sind d'Gletscherspalte um so beidruckender 🤭 Zrugg im Campo Alto ruumemer alles uf, essed Zmittag (oder es zweits Zmorge...?) und verabschieded eus denn in Richtig Basecamp. De Abstieg isch alles in allem viel weniger astrengend für d'Bei alsmer denkt hend - Glück gha :)
Chum chömemer dune a, gheit eus de Michel über de Weg, wo ide letste Vorbereitige für sin Ufstieg steckt - guets Glinge! Mir mached eus bald mal mitem Büsli uf de Zruggweg id Stadt. Ich han jetz mega Chopfweh und bi müed, was imene churze Nickerchen ended. Zrugg mit Internetempfang suechemer e Unterkunft und lönd eus dete anefahre. D'Seilbahn neh und laufe mögemer nüm und de Verchehr halted sich tatsächlich au in Grenze :)
Im Zimmer gits zerst e sehr gueti heissi Duschi und denn gheiemer kaput is Bett, reded na bitz über s'Erlebte und schlofed denn ii. Dank em Wecker zwei Stunde spöter gömer zur normale Znachtziit trotz wenig Motivation go esse und das isch e gueti Idee! Nach so viel immer mal wider es bitz schneugge, freut sich de Körper über es rechts Menu, bevors wider is Bett goht für e langi erholsami Nacht 😍Read more