San Pedro

A eusem letschte Morge i dr Pampa hemmer numal alles gseh - und zwar us 0 bis 3m Distanz! Dismal simmer Fluss-ufwärts gfahre, da hets nu meh und v.a. au meh grossi schwarzi Caimans! Mer hend denn nu sGlück gha asmer grad eine bim Fisch-Esse und zwei bim Kämpfe gseh hend. Chli wiiter deruf het sich de Fluss zumene Art chline Seeli verbreitet, da hend sich 4-5 Delfine tummlet und sind immer um eus im Chreis gschwume :) schöns Erlebnis, au wenns zimli hässlichi Viecher mit komische Grunz-Grüsch sind.
Ufem Weg hemmer a mehrerne Monkey-Spots ghalte, da hemmer die bereits bekannte Yellow Squirrel Monkeys vu Hand chenne mit Orange füettere. Am Afang sinds ganz schüch gsi, doch am Schluss sinds eus ufem Schoss gsesse und hend eus us de Hand gfresse! Sie hend ganz wachi, chugelrundi Auge und ganz weichi, gschickti Pfötli :) mer sind hin und weg gsi!
Zudem hemmer numal euses Glück mitem Piranha-Fische probiert - und hüt hets denn endlich klappt: mer hend beid je en Piranha gfange, dMartina nu zuesätzlich 3 Sardine womer grad als Piranha-Köder wiederverwendet hend.
Ufem Rückweg simmer nu anes paar Capibara-Familiene verbicho, wo zerscht ganz ruhig blibe sind, aber nacheme Wiili ihri Junge is Wasser tribe hend. Das isch es Phänomen womer etz scho oft gseh hend: wenn Tier wie Caimans oder Schildkröte uf de Flussbänk Angscht bechemed, denn wiicheds nid wiiter ufs Land us, sondern verstecked sich lieber im schlammige Wasser - au wenn das bedütet, as sie eus (de Gfahr) nöcher mend cho.
Nachem Zmittag simmer wieder 3 Stund zrugg zum winzige Flughafe vu Rurre gfahre und denn en halb Stund zrugg uf La Paz gfloge. Die Flüg sind zwar sehr churz, aber dAirline Amaszonas het sMonopol druf - drum hend eus Hi- und Rückflug zämä je 180 USD kostet... derfür hemmer eus 36 Stunde müehseligi und zimli gfährlichi Bus-Fahrt erspart (de Weg uf Rurre isch dVerlängerig vu de hütige Death Road) - vu dem her het eus das gar nid greut.
Zrugg in La Paz hemmer eus messe afange Gedanke über en Notpass für de Sämy mache... mer hend eus scho bi dr Schwizer Botschaft informiert, Büs afah umbueche zum ines paar Täg wieder zrugg in La Paz zsi, Flüg uf die neu Passnummer welle la umbueche, usw... dMartina het sogar die letschte paar Nächt träumt, as mer de Pass entweder im Hotel oder im Gepäck nu findet und het dHoffnig bis zum letschte Moment nid welle ufgä... und tatsächlich: zunderscht im Wöschsack het de Sämy sin Pass etz doch nu gfunde!!! Eus isch en riesige Stei vum Herze gfalle, es isch etz doch sehr vil eifacher ohni Notpass-Organisation. So hemmer eus nu meh über die warm Duschi und sfeine Esse bi eusem Lieblings-Mexikaner chenne freue und chend morn de Tag ohni Gstress agah :DRead more