Parc Jean-Jacques-Olier

So endlich Ziit in Montreal, warschindli mini Liebilingsstadt in Kanada nach Vancouver. Am Fritig hemmer was zerrscht gmacht? Richtig, e Food Tour. Dasmal e Jewish Montreal Food Tour, da die Jüdisch Bevölkerig da mega vil iifluss ufd Esskultur gha het (z.b. de weltbekannti Bagel), het das mega interessant tönt. S esse uf de Tour isch guet gsi (vorallem s smoked meat vom Schwartz) leider isch eusi Tourguide nöd allzu zu guet gsi, oder besser gseit d Tour selber het viiiil zvil Text und zwenig Esse gha. Am Abig simmer zerrscht im alte Hafe go spatziere, das het mi mega a min erste ufenthalt in Montreal erineret. Und den simmer ab ine Brauerei, bitzli am Arsch vo de Welt. Aber die Brauerei namens Messorem Bracitorium (Messorem isch latinisch für Sensemann und Bracitorium für Brauerei) isch mega nice gsi, erstens en mega coole Taproom mit Biergarte, und denn ersch d Bier 😱 So gueti IPAs gits würkli selte. Nachdem mer eus fröhlich durd Charte probiert händ, simmer ufem Heiweg no es Poutine go hole, so wies sich ghört in Montreal.

Am Samstig hemmer den namal e Tour gha und zwar e Mural/Graffiti Tour. Und die isch meeega guet gsi, es git so viel Street Art in Montreal und mir kennes jetzt vil Gschichte dezue. Da Gabriella eusi Guide het wükli mega vil ahnig gha. Nach de Tour hemmer churz en Bagel mit cream cheese iedruckt und sind den in Parc Jean Drapeau. Das isch uf de Insle wod Biosphere isch, d Simona hat da gern welle go fötele. Znacht hemmer den Tacos ime Restaurant gad nebed eus gesse und die sind au super fein gsi (Nur die 6 riese Spinne hinder eusem Tisch hend de Simona nöd so gfalle😂). Zum Abschluss simmer den na ines chlises Brewpub ide nöchi namens Dispensaire. Die Bier dete sind nöd überragend gsi, jedoch isch d Location selber mega gmüetlich gsi, ich würd aso wieder cho.

De Suntig, eusem letste Montreal Tag, simer den na is Museum of Fine Arts, wos sogar e Ustellig vomene Schwiizer Künstler geh (Nicolas Party heisst de, super Name aber nonie vonem ghört). Nach 2 mega feine Baos isches denn ziit gsi öppis für eusi Fitness zmache und mer sind uf de Mont Royal gstige, mit de Stäge.... Ich meine mit viel Stäge...es hät fasch nüme ufghört mit Stäge. Mit sind öppe e Halbstund stäge gloffe (kein Witz) und den uf de Uusichtsplatform acho. Wiemer uf de Fotis gseht het sich das echt glohnt, mer sind aber wükli duregschwitzt gsi. Da mer beidi mega kaputt gsi sind hemmer eus den Esse is Airbnb bstellt am Abig, und denkt mer relaxed e bitzli vorem em negste Reisetag. Next Stop: Toronto (dasmal mitem Zug)Read more