Río Copey

Die letzte paar Täg semmer z Jaco gsi. Jaco esch es chlises Städtli ade Westküste ond ech glaub es esch au chli als Party Ort bekannt. Woni zerst acho be hani ned so es guets Gfühl gha. Alles hed ned so schön ond sehr touristisch gwerkt. Met de Ziit heds mer de aber doch chli meh gfalle. Vor allem de Strand esch wonderschön. Er esch recht lang, öpe 2km, ond direkt gege Weste grechtet. Das heisst am Obe hemmer emmer wonderschöni Sonneontergäng chönne luege. Dore Tag esch es mega heiss worde. Drom hed eusi Tagesroutine eigentli jede Tag e zwöistöndigi Mettagspause im klimstisierte Hotelzimmer beinhaltet. Meistens semmer am Morge zerst a Strand, de öpis go Zmittag ässe ond de öpe am vieri weder a Strand före Sonneontergang. S Meer esch super gsi zom bade. Schön warm ond e chli wellig. Am einte Tag send d Welle aber au chli stärcher worde ond de hemmet scho chli müesse ufpasse dass sie eus ned zfest metrissed. Ond am einte Tag hani au mini erst Begägnig metere Qualle gha. Sie hed mi am Arm ond Fuess verwötscht, aber es esch zom Glöck ned so e grossi gsi ond es hed nor am Afang chli brönnt. Gässe hemmer es paar mol i ganz traditionelle Restaurants. De Vorteil dass euses Hotel chli witer wäg vom Strand gsi esch esch gsi dases lokali Restaurants ganz ide nöchi gha hed. Es hed au e chline Frochtlade gha. Det hani mer m Morge amig e Smoothie gholt.Read more