Darjeeling und Varanasi

Jooo weiter gehts... Als mir nocher aufn weg worn noch Darjeeling homor schnell gemerkt wia kolt dasses do oben sein wert. Wors nocher ah. Knoppe 7 grad hots kop. Sel hot in meine Wadl in di Kurzen Hosen logisch wianiger gegfolln. Dorzua hots gregnet und dor Wind isch ah no gongen.
In inser Homstay wo mor di ersten 2 nächte gewesen sein wors innentn drin gleich kolt wia ausetn drausen, und joh es hot gleich gezochen wia drausen. Irgendwia homors decht überleb und ins nocher fir di negsten 3 Nächte a besseres Hotel gebuacht, wos sogor a bettwärmer geben hot.
Insre insgesomt 5 Tog hoben so ausgschaug indem mir Tee verkostet hoben, ins a poor historische Monumente ungshaug hoben, in botanischen Gorten, a Sunnenaufgong afn Tigerhill, und logisch a di Teefelder. Oke so weit wia mor holt a gsegn hoben, weil es wor olm zimlich neblig. Sel wor a dor Grund wiso mor net mit dor Soalbohn no weiter aui gfohren sein, wo men wirklich a mega Ausblick afs Himalaya Gebirge kop het.
Deswegn sein mor a oanfoch viel in dor Stodt manonder gongen und hoben ins is Leben fa di Leit do ungshuag, wos wirklich sehr interessant wor. De Leben do ständig mit Temperaturen ba di 10C°, lossen ober olm di Haustir offen und heizen a net oder mochen a fuir. Afn Morkt kriag men olls zu kafen fa exotischen Gemüse und Obst, bis Fleich und Fisch oller Ort. Koane ohnung wia des olles do auer kimmp. An sich ober a mega schianer Ort, sicher unter die top 3 Städte fa Indien.

Weiter isches gongen noch Varanasi, und sel, sel wor nt so oanfoch... Es isch wider 3h mit a Jeep in di Stodt oi gongen, fa sem nocher homor an Zug gebuacht kop. Durchdem dass di Inder olm so guat organisiert sein und olles so verständlich mochen, homor inseren Zug net gfuntn und er isch vor insere Augen awek gforn, und sem homor nt amol gewisst dasses inserer isch. Mir hoben ins nocher in a onderen Zug geschmuggelt und sein sem nocher 18h in dor schebigsten Klasse noch Varansi getukkert. Es wor grausig viel zu überfüllt viel zu eng und oanfoch lei laut, ober mir hobens überleb, wenn a hort.

In Varanasi homor Stundenlong in di engen Straßler umanonder geirrt und ins a Bild fa dor Stodt gemocht. Ban heiligen Ganges endlong seinmor gongen und hoben ins ihmene Rituale sem ungshuag. Di greaschte Verbrennungsstätte af dor Welt homor ah gsgen. Und joh i red do fa Mensche verbrennen. In oan Tog werdn bis zu 200 Leit do verbrennt, und sel oanfoch vor deine Augen. Di Asche wert nocher in den Fluss eini geworfen, wo 5 meter dorneben di Leit schwimmen. Also des Spektakel muas men wirklich amol gsegn hoben. Oanfoch lei krass. Es werdn ober nt olle leit verbrennt: Schwongere, Heilige, unter 15 jährige und durch a Kobrabiss getötete Menschen werdn nt verbrennt. Oan Obend homor ins nocher a no a Bootsfohrt in Ganges gegönnt und ins di Obendzeremonie ungshaug.

Alles im Ollem Sein des sicher 2 Städte de men in Leben amol gsgen hoben muas, und des a sicher nt 2 mol gib.
Woos fir ins weiter geat und wos insere Pläne sein seges nocher ban negsten mol...

Enkre Kälte robusten Freunde

Rene&LisaRead more