Laguna Canangueno

Guete Morge :)
De hütig morgendlich Usflug stoht uf de Kippi. S'Wetter isch so halbe guet aber mir wend trotzdem gern go. Also machemer eus mitem Guide wider uf de Weg flussabwärts. Und es lohnt sich! A eim vo ihrne Lieblingsplätz sind hüt tatsächlich d'pocketmonkeys (Fingeräffli) unterwegs. Die Äffli sind ned mal so gross sie e Fust und dementsprechend fast unmöglich zum finde, wemer ned weiss wo sueche. Dur de Feldstecher sinds aber super z'erkenne. Das isch s'früeh ufsto und es bitz nass werde definitiv namel wert gsi :)
Ide Lodge werded di letste Sache packt und denn zmörgeled. Di einte Kleider und mis Tüechli sind immerna bitz füecht und werded vermuetli ned so guet schmöcke wenis denn s'negst mal uslade. Tja, Schicksal im Regewald - glaube wirde demit klar cho. Ide letste Minute vor de Abreis fangts wider voll a regne. So wird die Rückreis kei Spass mache... Ich glaube de Dschungel brüeled wil mir gönd! Hoffe, s'Gepäck ufem Gepäckkanu blibt wenigstens troche. Bim Boarding meint de Rom, er hegi grad en Delfin gseh abtauche, wo flussufwärts unterwegs isch, also i eusi Richtig. Und tatsächlich werdemer sehr schnell fündig 🤗 Delfin sind do eigentli immer s'zweite unterwegs. I eusem Fall e Muetter mit Jungtier. Mir gsehnd sie mehreri Mal uf- und wider abtauche. Genial! Und na besser, dass de Rege genau i dene Minute es bitz weniger intensiv isch... Di negste zwei Stunde fahremer i normalem bis sehr starchem Rege irgendwie zemeghuured unter eusne Ponschos flussufwärts und jedes Mal weni denke, dases nüm meh chan regne, wirds na bitz intensiver. Danke a dere Stell a min Regeschutz, de macht en guete Job ^^ Di letste 30 min chömer bitz enspanne, es regnet nume na liecht... Trotzdem simer uf e Art froh, womer ade Puente Cuyabeno achömed und chönd i ganz trochni Chleider wechsle. E Stund spöter stiigemer in Bus, wo eus inere zwölfstündige Fahrt wider uf Quito bringt. Irgendwenn chunnt denn au s'Internet zrugg und ich chan mi schnell inen Hotspot henke zum Mal es Lebenszeiche vo mir geh. Mis Internetabo isch anschiinend abgloffe ^^ Die Ziit ohni Internet isch grundsätzlich sehr enspannend gsi, chani wiiterempfehle 😇

Mis Fazit zude letste 5 Täg:
D'Pflanze- und Tierwelt isch sehr beidruckend und de Rom, eusen Guide weiss so zimli alles über alles und chan au perfekt jeglichsti Tierrüef imitiere. Dank sim Wüsse isch eus klar worde, wie vielfältig, komplex und schützenswert s'Lebe im Regewald isch. Dass so zimli alles unvorhersehbar isch, stört überhaupt ned sondern machts na intressanter. Egal ob s'Wetter oder d'Tier - es chan jederziit alles uftauche und wider verschwinde. Wichtig zum mitbringe sind definitiv viel Geduld, en guete Ponscho, es Buech und Mosiktoschutz. De Moskitoschutz hani miner Meinig noche eigentli zueverlässig brucht aber die Viecher sind eifach immer überall und steched au dur Kleider dure. Dementsprechend bini bitz überall mit rote Pünkt verziert, wo aber bis jetz immerhin dütlich weniger aggressiv sind als na die z'Mindo. I wirde definitiv drüber hinweg cho 🙈 Malaria gits übrigens ned in Ecuador, fallsi das no ned gseit han...
Bis zum negste Mal 😍🐒🌴💦Read more