Quebrada Quintana

Hüt isch de letst Schueltag. Und es isch bitz e müedi Aglegeheit, was sich vorallem denn zeigt, wemer sötted rede. Miteme müede Chopf falled eim d'Wörter uf Spanisch plötzlich nüm ii... Aber janu, mir überstönd au de letst Morge na einigermasse souverän und pünktlich am halbi eis heissts zum letste Mal "es todo para hoy" 🤗 Z'Quito hettis zur Feier des Tages es Znüni und es Diplom geh aber do z'Otavalo fallt das weg und s'Diplom sött denn per Mail cho. Findi fast besser, denn muesis ned nocheträge. En Brief oder es Päckli mitem Schuelzüg id Schwiiz schicke isch saumässig tüür, do trägis lieber na 3 Mönet mit mir mit 🙈
Zum Abschluss vo dere Otavalo-Wuche gömer denn aber no alli zeme go Zmittag esse. Es git wie so oft Riis, Paps Frittas, es super guets Fleisch und Avocado ^^ Währedem esse fangts a heftig regne und bitz gwittere aber zum Glück ned mega lang. Schliessli verabschidemer eus vo Carlos und Anna, wo dehei na Unterricht hend und gönd z'dritte los Richtig Ibarra. Unterwegs liit St. Antonio, wo bekannt isch für di detailriich Holzverarbeitig. Im einte Teil vom Dorf werded Möbel verchauft, im andere chamer bestuune, wie d'Figure für Chilene entstönd und im dritte denn schliessli au na alles ander Chlizüg womer so chan produziere us Holz. Scho beidruckend, wie das Handwerk vo Teil zu Teil mitem nötige Augemass perfektioniert usgüebt wird! Ich beherrsche mi tatsächlich wider und falle keine Souvernir zum Opfer. De negst Bus bringt eus uf Ibarra, d'Provinzhauptstadt. Eigentli gäbtis e Zuglinie det here aber die isch grad iigstellt. Di einte behaupted wils z'wenig Passagier git, di andere wil d'Regierig s'Geld wett anderst "investiere". Ich wirdes wohl nie definitiv usefinde. Z'Ibarra sölls gemäss em Profesor s'beste Helado vode Welt geh und ja, es isch sehr fein aber vergliche miteme italienische Gelato weissi jetz also ned so recht weles besser isch. D'Gschmäcker sind aber mit Guanabana (e Frucht) und Ron y Pasas (Rum mit Wiibeeri) definitiv ned ganz italienisch :) Nachher spazieremer na bitz dur d'Stadt, verbi amene Start-Up-Märt und es paar Pärk und schliessli wider zrugg zude Busstation. Überraschenderwiis nimmt dete de Juan en andere Bus als mir. Hettemer das gwüsst, wäremer na uf es Bier wil er isch en lustige... So gahts zrugg uf Otavalo, woni vomene Nachber is Hus glo wirde wil vo minere Familie wider niemer dehei isch ^^ Irgendwenn chömeds und es git na es chlises Znacht. Viel Hunger hani dankem riesige Zmittag immerno ned... Und denn gohts einigermasse früeh is Bett wil morn wemer id Berge :)Read more