Santa María

Hüt stoht en Schnorchelusflug uf d'Isla Floreana a. Treffpunkt defür isch 7.30 bide Agency, woni alles buecht han. De Organisator trifft denn 10 min spöter au i und womer namel so viel spöter komplett sind, werdemer an Hafe brocht, wo de Guide warted. Au dete wartemer namel ganz schnell bis denn würkli all ume sind und denn gohts uf s'Boot, wo Platz für 12 Lüt hät aber ned ganz usbueched isch hüt :) Einehalb Stund spöter und leider ohni Begleitig vo Delfine erreichemer d'Isla Enderby, wo bi verschiedene Vögel sehr beliebt isch zum brüete. Unter anderem isch de Fragata aztreffe, wo dur sini riesige rote Kehlsäck unverkennbar isch. Si teiled sich de Platz mit Seeleue, wo in Wassernöchi uf de Felse chilled - Seeleu uf Galapagos sött mer si... Uf de andere Siite vode Insle warted eusen erste Schnorchelspot - endlich ^^ Chuum im Wasser, schwebt e Meeresschildkott unedure und teilt sich de Platz mit verschiedenste Fisch. Entlang vode Insle und i mine Wahrneh gege d'Strömig folgemer de Küste im agnehm warme Wasser. Unzähligi Fisch spöter fanged di erste a zrugg is Boot stiige und grad i dem Moment fanged um mich ume zwei Seeleue und e Schidkrott a um d'Wett schwimme und spiele - soo herzig! Irgendwenn verschwindets und i chan mit guetem Gwüsse au an Board für Kaffe und Guetzli :) Nume wenigi Fahrminute wiiter isch de negsti Halt für en churze Spaziergang zumene Ussichtspunkt bim Piratestrand uf de Isla Floreana. Vorher am Strand entdecki wider e Meerechse, wo unsicher ufem Sand umenandschuened und denn abzischt woni bitz nöcher chume. Ufem Ussichtspunkt verzellt eus de Ramiro denn so einiges über d'Bevölkerig vo Galapagos. Di erste Lüüt sind 1882 acho und hend genau die Insle do besiedled. Irgendwenn isch de Hauptort uf Santa Cruz enstande, wils nöcher am Festland isch. Und alles ander hani ned verstande (ha bitz fest Müeh mit sim spanische Akzent im Englisch) oder wider vergesse. Irgendöpis Wichtigs isch mit de Familie Widmer us Dütschland na gsi... Egal, nachher machemer no Fotis und wie so gern und hüfig bin ich di letst defür. A dere Positiion hät mer schliessli selte Stress und es lueged nüm all zue... I dem Fall vo hüt ischs widermal en Glückstreffer wil de Ramiro wett denn au na Fotis vo sich und so chunnt mer halt is rede, was widerum dezue füehrt, dasmer au ufem Abeweg na meh Fotis mached und Spass hend :) Vorem Zmittag langeds denn na für en churze Schnorchelgang a dem Strand, wo vorallem verschiedeni chlini und grossi Chrebsmuschle z'büüte hät. Zmittag gits typisch ecuadorianisch ufem Boot: Gelbschwanz-Demoiselle, Riis, Gmües und Saft - und da isch denn au fein obwohls Fisch isch ^^ De negst Stop isch au wider en Sandstrand für en Spaziergang über d'Insle. Debi treffemer uf d'Galapagosflamingos, wovos uf ganz Galapagos nume öppe 350 Exemplar git. Öppe 100 devo sind hüt wohl a dem Platz :) Am Strand womer nach 20 Minute ide brüetende Mittagshitz erreiched, sind scho vo wiiter dunkli Flecke vo Schildkrotte und Roche z'erkenne. D'Roche sind verschwunde bis ich dete bin aber d'Schildkrotte lönd sich ned störe :) Bade derfemer leider ned aber isch au so wunderschön. Ufem Zruggweg sichtemer grad na flügendi Flamingos, wases ned allzu oft z'gseh git :) Ja und denn meint de Ramiro, dasmer öppe 1.5 Stund hinedri sind im Ziitplan - wie au immer das chan passiere ^^ Bide Verbifahrt vode Isla Onslow (es paar Felse wo zum Wasser uselueged) zeiged sich eus di so typische Bluefeetboobie . Und denn simer uf jede Fall alli parat, dasmer bim letste Halt möglichst schnell chönd is Wasser und di restlich Ziit dete verbringe. I entdecke nebst vielne Fisch vorallem Koralle, Felse und drü Arte Seesterne 🥰 Anderi gsehnd en Hai, wo mir aber leider (na) verwahrt blibt. So oder so ischs en super Usflug gsi! Ufem Zruggweg zeigt mer de Ramiro sini beste Videos und Fotis vo Galapagos. Ganz schön beidruckend, was scho alles zemecho isch über d'Johr. Und denn gits na e Diskussion zude Ziitzone. Mir sind da 1 Stund hinter de Festlandziit aber weder mis Handy na mini Uhr hend da umgstellt, obwohls sus nie es Problem isch. Gemäss Guide isch das es Problem vo Android. Bi Apple funktionierts anschinend, was für mich kei Sinn macht aber naja, weisses ja ned besser ^^
Zrugg ide Stadt frogi de Ramiro, wo dases s'beste Glace git. Wili de Platz woner empfiehlt vo gester scho kenne, chunnt halt Nummer zwei dra. Er bringt mi grad here und zahlt denn nebst em Taxi au na s'Glace. So isch da ned gmeint gsi aber danke 🙈
Und denn muesi mi na für de Tauchusflug vo morn go vorbereite. Woni 17.50 bide Agency achume, wirft mer min Organisator vor, dasi z'spoht bin. Stimmt ned, er hät gseit "17.30 - 18.00, besser 17.30" aber gemäss ecuadorianischer Pünktlichkeit wär ja denn alles bis 18.30 voll okey. Egal, mir gönd uf jede Fall zude Tauchschuel, woni mit Neoprenazug, Schueh, Infovideo und AGBs ideckt wirde. Zuesätzlich buechi na en zweite Tauchgang, wo eigentli schnorchle wär aber mer gönnt sich ja sus nüt und i weiss dases mi ehner wür agurke, weni nachem Tauchgang bim zweite Spot "nur" na chönnt schnorchle 🙈 Lustigerwiis begleited mi denn de Organisator na bis vor s'Hostel wiler i di glich Richtig wohnt ^^ Ja und denn heissts esse, dusche, mit Zimmerkollege rede, mal wider Blog schriibe und de schüch Sunnebrand pflege. Zum d'Sunnecreme au mit dem hüfige "is Wasser - usem Wasser" na im Griff ha, isch bitz schwierig... S'Internet uf Galapagos isch übrigens würkli so instabil wie alli gseit hend, drum wird au de Blog ned würkli ufeglade - ups ^^

Ps: meh Fotis vo unterwasser sötted na folgeRead more