Seymour

Es isch so wiit. Tauche isch agseit :) Es Taxi fahrt eus drü Teilnehmer und de Instructor uf di ander Inselsiite zum Boot, wo eus zude Isla Seymour Norte zum Trainingsplatz bringt. Unterwegs werded di drü goldige Regle und d'Zeiche für Unterwasserkommunikation repetiert, so dasmer ade Küste "nume" na müend id Usrüstig stiige. Neuprenazug, en Gwichtgürtel, Taucherbrülle und natürli d'Suurstoffveste ghöred dezue. Und denn heissts 1, 2, 3 ab is Wasser :) Mir angled eus am Ankerseil durab an Meeresgrund für d'Üebige. Druckusglich und regelmässig schnufe müemer natürli am Abeweg scho awende... Dune folged denn Brülle vo Wasser befreie und eimal de Suurstoff zum Muul useneh und wider ine, was es bitz beängstigend aber eigentli ganz easy isch. Zrugg ade Oberflächi muesi sege, dass für mich s'Usschnuufe mitem Suurstoffschluch eigentli de schwirigst Teil isch wils langsamer als im gwohnte Tempo goht aber a das wirdi mi gwöhne. Nachere churze Fahrt chömemer a eusem erste Tauchspot bide Insle Mosquera a und es goht endli richtig los :) Sofort sind wider viel Fisch ume und schwirred um Felse und Koralle. Je länger je meh Seesterne findemer und au es paar Schildkrotte schwimmed verbi :) Eini isch inere Nische am chille aber de Instructor hät si entweder ned gseh obwohl ich uf si zeige oder eifach sus kei Lust zum ahalte und gnüsse... Janu, han mer trotzdem bitz Ziit gno, si müend ja denn warte und chönd ned eifach wiiter ^^ S'Highlight isch aber, wo plötzlcih en mittelgrosse Wiisspitzehai uftaucht 🥰 Viel z'schnell sind d'Suurstoffreserve ufbrucht und mir müend zrugg uf s'Boot. Dete warted Snacks und es WC uf eus, dasmer denn parat sind für de zweiti Tauchgang. Für de gömer wider zude Isla Seymour Norte. Und los gahts, dasmal nume na für mich. Di andere zwei schnorchled i dere Ziit. Nebst wiitere Koralle, Fisch, Muschle wo sich schlüssed wemer bitz Turbulenze verursacht, ganze Felder us so Fischwürmer, Seesterne und Minifischli wo zu Koralle usegugged, isch a dem Ort e regelrechti Haiparty. A mehrere Ort findemer Haigruppe, wo am Meeresgrund ruhig ihri Runde dreihed. Je länger dasmer unterwegs sind, desto grösser werded d'Tier. Glaube de grösst isch grad öppe 2 Meter gross 😍 Angst hani kei und muesmer glaub au ned ha. Oder i wüssts amel ned 😂 Nach gfühlte 5 Minute, wo tatsächlich 45 sind, simer scho wider am Endi vode Surstoffreserve und müend uftauche. Fazit: genial, au wenn sich di erhoffte Hammerchopfhai und Roche (immerna) ned wend zeige! Und sowohl verschlucke als au görpsle funktioniered übrigens uf 12 Meter unter Wasser erstuunlich guet - i has probiert... Glücklich mit dene Idrück im Gepäck machemer eus uf de Zruggweg mit Boot und Taxi. Im Dorf gits na es Zmittg, wo au inbegriffe isch und natürli isch wider Fisch im Agebot und wils gester so guet gsi isch, probieris hüt wider :)
Zum bitz erhole vo dene Strapaze, höckli mi uf es Schattebänkli (d'Sunne hüt isch na brutaler als gester...) und schribe mal wider Blog. Denn gohts in Richtig Darwin Research Center, woni e Tour i 45 Minute verwütsche. Ide Warteziit gits zwei, drü Plätz zum selber besichtige. Zerst Infos zu Wal ide Region und denn Infos zum Darwin selber. Funfact: wiler starch seechrank gsi isch, häter immer möglichst viel Ziit an Land und wenig uf de Schiff verbrocht, was sine Beobachtige z'guet cho isch. Schliessli findi au na en Strand, wo Meefesechse guet tarnt uf de Lavastei am ufwärme sind :) D'Tour selber isch denn wegem Guide ehner enttüschend. Er schiint möglichst schnell in Firobig z'wele und verzellt nuem wenig zu allem. Ha vo anderne ghört, was si na alles für Zuesatzinfos übercho hend... Und au sis Englisch isch nume gnueg guet zum verzelle aber sobald e Frog gstellt wird, verstohters ned... Janu, ich chan au ned immer nume Glück ha ^^ D'Babyschildkröttli sind trotzdem herzig und au de Fakt, dass invasivi Schnegge es Rieseproblem sind chumi mitüber ^^ Nach dere Tour chani ide Tauchschuel go Fotis und Videos hole, organsiere na Znacht und Zmorge und bi denn schliessli zrugg im Hostel. Bim Znacht isch plötzlich e ganzi Gruppe us dütschsprachige Touris zeme und i chan endlich mis Hauchdütsch mal wider ein bisschen praktizieren 🙄 Nachem pläuderle isch denn schliessli scho wider packe agseit wil morn Morge früeh gohts wiiter uf d'Isla Isabela. En iidrückliche Tag goht z'End :)
Oh und übrigens: d'Chrebs chönd zimli guet hüpfe hani im Hafe gseh, was recht lustig usgseht ^^Read more