Casa Mirador de Lukas

Zom Samschtig geds ned vel spannends z'verzelle. Mer hend packt, üs vom Javier of Temuco fahre loh, send det i de Mall omeghängt de ganz Vormettag wie Teenager (bemene gruusige Kafi / Moccachino), denn go Pizza ässe (das Resti womer hiiwelle hend, esch ned det gsi wos hätt selle sii luut Google, drom heds stattdesse Pizza gäh). Aschliessend semmer zom Rodoviario, nomol go warte ofe Bus, wo 21.50 sött fahre.
Wedermol vel Hönd det, eine hed sech be üs bsonders breit gmacht, was de Dani gar ned guet gfonde hed. D'Jasi eigentlech scho, aber noch füüf Minute streichle hed sie s'starche Bedörfnis zom Händ wäsche gha, de Iitrett zom WC hed aber omgrächnet öppe 50 Rappe gchoschtet. Z'vel zom nor Händ wäsche, aber zom Glöck geds Füechttüechli.
Denn ändlech esch de Bus cho. Es esch för hiesigi Verhältnis weder en Luxusbus gsi met bequeme Setz, de Dani aber jammeret, dass es kei Liegewage esch, d'Jasi schloft deför öberraschend guet. D'Beförchtige vom Dani hend sech hingäge bewahrheitet: Öbernächtiget ond metemene schmärzende Rögge stiigt är am halbi achti in Valparaíso us. D'Jasi aber, frösch wie de Morgetau, strotzt vor Tatedrang.

Dä esch leider dämpft worde, wel, nochdem mer i de früehche Morgestonde vom Busterminal in Valparaíso zom Hotel gloffe send, mer be besagtem vor verschlossne Töre gstande send. Mer send drom is einzige Kafi, wo om die Ziit (8i) scho offe hed, natürlech es düütsches Kafi.
Det hemmer denn au z'Morge gässe, es düütsches Paar esch denn no dezue cho ond mer hend üs met ehne ond de Bsetzeri, de Marion, ustuuscht. Die Düütsche hend vo de coole Stadtfüehrig verzellt, wos do gmacht hend ond so hemmer spontan före Nomi au eini buecht.
Aschliessend semmer go iichecke, denn chli i de Gägend omegloffe, bes d'Stadtfüehrig agfange hed.
Üse Guide, de Esteban, hed üs met vel Enthusiasmus dör s'Unesco-Viertel gfüehrt ond debii öppe jedi zwoit Person könnt. Es esch sehr interessant gsi, mer hend einiges glehrt ond gseh.
Am spötere Nomittag eschs denn no is Pablo Neruda Huus gange, sehr es interessants Huus, iigrechtet vomene velsiitig interessierte Sammler.
Spöter weder Rechtig Downtown, chorz a Hafe, de öppis go ässe. De Esteban hed üs d'Chorillana empfohle gha, es chilenischs Grecht, wo aber eigentlech zom teile dänkt esch. De Dani, i sinere Freud, dass es es lokals Grecht inere Vegi-Version ged, bstellts, ohni em "familiar" im Menü Beachtig z'schänke. Jo, mer hend a dem Obig för vier gässe...

Emmer no relativ voll vom z'Nacht semmer am Morge uf, hend im Kafi näbedra z'Morge gha (d'Google Reviews send sehr dörmescht gsi, mer hend aber Glöck gha, be üs eschs fein gsi). Of öppis hed sech v.a. d'Jasi gfreut, nochdem de Esteban üs geschter of ehre ÖV ufmerksam gmacht hed: Hött send au weder die "usrangierte" VBL Büs of de Strosse onderwägs gsi, was grad nostalgischi Gfühl i üs hed ufcho loh. Leider imene grüen-wiisse Astrech anstatt blau-wiis, aber emmer no de Passepartout-Schreftzog drof 😄 Mer send nomol chli dör d'Strosse vo de Altstadt gschländeret, hend no e Fahrt met em letschte Ascensor gmacht, wo noni de Renovierig ond demet au Modernisierig zom Opfer gfalle esch. Förs z'Mettag semmer nomol zo de Marion gange, wo sech sechtlech gfreut hed.
Im Hotel hemmer üses Gepäck gholt ond hend üs ofe Wäg Rechtig Busbahnhof gmacht, wobii mer deför eigentlech gärn met somene alte VBL Bus gfahre wäred. De Chauffeur hed aber gmeint, är fahri ned det döre, mer müessed eine vo de anderne (ned VBL) Büs näh. Leider esch d'Jasi i dem Momänt ned fluent gnueg, zom ehm üsi Grönd för die Fahrt chönne erkläre (üs hätts jo scho glänget, nor scho i d'Nöchi vom Rodoviario brocht z'wärde), drom semmer liecht enttüüscht (d'Jasi) z'Fuess gange. De Dani wär eifach igstege ond so wiit gfahre, bis sech de Bus vo üsem Ziel entfärnt, Ziit hättemer nämli gnueg gha.
Per Car semmer denn am Nomittag of Santiago de Chile wiiter. Die chilenisch Hauptstadt hed üs als erschts grad ehre Hauptbahnhof entgägegworfe, wo mer usegloh worde send, was üs chorz chli öberforderet hed. Nochdem mers us em Shopping-Labyrinth ondere freii Himmel gschafft hend, eschs noch onzählige Strosseverchäufer ond Ässensständ ändlech ine chli ruhigeri Gägend gange, wo denn au üses Hostel gsi esch. D'Onderkonft esch sehr schön, das Huus muess ursprönglech mol enere riiche Familie ghört ha. Mer send de a dem Obig nor no öppis go ässe ond de weder zrogg is Hostel.Read more