Vuda Point

Numal hemmer komatös guet gschlafe - und eus trotz grauem Wetter am 8i scho usem Bett kämpft: de Sämy für es Skischuel-Telefonat, dMartina (wo etz 3 Täg nid graucht het!) für en Session BodyBoss... nach Zmorge und churze Fuessmassage hemmer eus wieder in üser Bure verchroche, de Sämy het am Business Konzept vu ConsiderItDone/ButlerBox gfiiled, dMartina wieder fascht es wiiters Buech fertigglese :)
Mitti Namittag hemmer eus zunere Rundi Kayakfahre ufgrafft - und hend nid schlecht gstuunt, as bi Ebbe de Wasserstand guet 2m tiefer lit und sganze Riff ad Oberflächi tritt. Da gseht mer überall Bächli abfliesse, flissigi orangi einarmigi Krabbe am Fresse sammle und immer wieder grösseri Schlamm-farbeni Chrebs zwüsche de Felse. Zudem hemmer vum Kayak au chli bessere Iblick/Hörprobe vum indische Hochzit becho, wo hüt uf dr Fuess-Insle stattgfunde het. Sehr melodisch und farbig, wie gwohnt mit vil Tanz :)
Vu de Agstellte hemmer erfahre, dass das en lokali Hochzit isch gsi - denn ca. dHälfti vu de Iwohner uf Fidschi stammed ursprünglich us Indie. DKolonialiste hend dInder als Arbeiter fürd Zuckerrohr-Plantage mitbracht (wohl au wel dFischianer nid grad für ihre Fliss bekannt sind) und vil sind au nach de obligate 5-10 Jahr harter Arbeit blibe. Etz bildets en wichtigi politischi Chraft uf Fidschi - was aber de Fidschianer gar nid passt. In de vergangne paar Jahrzehnt hets unzähligi Putsch gä, oft wel en Indisch-stämmige Präsident gwählt worde isch - sletscht Mal isch erscht im 2006 gsi!
Euse letscht Abig da in Lautoka hemmer im Boatshed Resti verbracht, wo eus scho chli an Hawaii erinneret het. Etz sitzemer bimene Absacker i dr Bar (Mojito für de Sämy, Cognac fürd Martina) und lueged de usklingende indische Hochzit zue.*Read more