Huahine

Hüt Morge simmer zu eusem erschte TG in PF ufbroche. Sowohl dGuides als au dGäst sind alles Franzose gsi, de Sämy isch ganz positiv vu ihne überrascht gsi :) ohni sich gross um Vorschrifte zkümmere isches scho gli ab und under Wasser, dFisch sind da unglaublich zuetraulich gsi! Kei 10cm Abstand hends ghalte, mal ganz es neus Erlebnis :) Mer vermueted, as vil Taucher die Fisch füettered und sie darum grad agschwumme chemed, sobald es Boot halted... Mit eher schlechter Sicht und keim Tiefemesser (!) simmer zunere Koralle-lose, schinbar trostlose Tuele paddled, doch um eus ume het alles glebt! Grossi Grey Sharks sind usem milchige Blau usegschwumme, teilwis recht nöch cho und denn wieder abgwendet... und derzwüsche isch en Spotted Eagle Ray majestätisch "verbigfloge" - fabelhaft! Nachdem mer dem Triibe paar Minute zuegluegt hend, simmer zumene schöne und lebhafte Korallegarte, det hemmer aber de TG scho gli messe abbreche, euse dritt Taucher het kei Luft meh gha (er isch scho ma Oktopus vum Guide ghanget)! So simmer beid mit nu 100bar uftaucht - doch hemmer in dere Halbstund trotzdem scho gnueg für en ganze TG erlebt :)
Btw, sit Fidschi wüssemer etz au, wieso vil Dive Spots nur billigi Boye us leere Plastikfläsche hend: dFischer hends nid gern, wenn gueti Plätz so eifach erkennbar und für all zuegänglich sind, darum kappets oft dLeine und dBoye mend so regelmässig ersetzt werde... zum Geld spare gits denn halt die günstig Fläsche-Variante.
Ufem Rückweg zum Hafe hemmer nu paar Locals amene eher gfährlich ussehende Surf Spot gseh (nid emal de Sämy hets gross agmacht zum da paar Welle ga jage), doch statt Surfbretter sind die Type mit Pirogues underwegs gsi! Leider nur mit mittlerem Erfolg, aber trotzdem es luschtigs Bild gsi :)
Womer am Hafe uf euses Shuttleboot zum Hotel gwartet hend, isch eus ufgfalle wie schön blau und klar sWasser sogar grad am Hafe isch... völlig in Gedanke versunke luegemer paar Gelbflosse nache, da plötzlich schwimmt en Roche verbi, 1m vu dr Hafemuur :o vermuetlich daily Business hie in PF...
De Namittag hemmer denn am Trochne uf eusem Bungalow Balkon verbracht - sogar vor de Sunne hemmer eus messe verstecke, wel si hüt so gnadelos abebrännt het. Derbi het eus en graui Chatz Gsellschaft gleischtet - gmäss de Agstellte en "voleur", en Dieb. Da's aber bi eus nix zEsse het zhole gä, het sie's sich under de Liegestüehl bequem gmacht, sich usgiebig putzt und a dr Martina ihri Streicheleinheite gnädig über sich erga la :D*Read more