Passe Ava Ino

Wie scho vor 10 Täg womer früsch in PF acho sind hemmer im Hotel Tahiti Nui übernachtet - mer hend sogar numal sgliche Zimmer 506 becho :) wieder hemmer herrlich gschlafe - good beds matter! Nach chli meh als 3 Mönet reise chemmer definitiv säge asmer gueti Better sehr schätzed, mer erinnered eus immer nu gern zrugg ans "Wulche Bett" vu Perth oder die riesig Bett-Insle bim Sani Pass in Südafrika.
Nachdem mer zerscht Mal sit langem wieder usgschlafe hend, simmer mit eusem Suzuki Vitara los um Tahiti zumrunde. Wie scho Huahine bestaht Tahiti us zwei Insle: Tahiti Nui und Tahiti Iti, aus "Prèsqu'Ile" gnennt. De Küste entlang findet sich immer wieder Sights, es paar dervo simmer hüt im Schnelldurchlauf ga abklappere:
> dGrotte vu Maraa, das sind zwei halb gflueteti und vorne offni Tropfsteihöhlene
> de schwarzi Surf Strand Taharuu, womer vilne Surfer und Bodyboarder in de Welle zuegluegt hend
> sSurfer Städtli Teahupo'o, dert findet mer eini vu de gfährlichste Welle vu de Welt (dKüste wird schnell sehr flach, das git bis zu 6m höchi, dicki rundi Welle wo schnell "zuetend", kombiniert miteme spitzige Koralleriff - Surfer werded da mit Jetski ind Welle inezoge, wel mer nid regulär dripaddle cha)
> de Wasserfall vu Faarumai isch sogar für verwöhnti Schwizer nu recht höch und idrücklich
> dArahoho Blowhole(s), das sind mehreri Löcher im schwarze Vulkanstei wo dWelle entweder nur Luft oder es Luft-Wasser-Gmisch mit Druck usepressed - nid nur sehens- sondern au hörenswert, mer nennts nid umsuscht au "trou du souffleur"
> bim Pointe de Venus hemmer nur en churze Pitstop igleit und sind na am Sunnerundergang nachegfahre
Tahiti hemmer als chli verschlafni, aber sympathischi Insle erlebt. Hie wird dSurfer Kultur nu richtig glebt, a de abwechsligswis wiisse und schwarze Stränd gseht mer vil Surfer und Bodyboarder. Es sind vil Lüt mim Velo underwegs (praktisch, da primär nur dKüste durch Strasse erschlosse isch) - doch trotzdem sind leider uffallend vil Lüt übergwichtig.
Nachere feine Pizza in Papeete het denn sZit totschlah agfange... da euse Flug ufd Osterinsle am halbi 4ri am Morge flügt, het sich en wiiteri Nacht im Hotel nid würkli glohnt, somit simmer etz am Flughafe und erfreued eus am hervorragende Hertz-Wifi wo eus geschter nu vu de fründliche Verchäuferin verrate worde isch.*Read more