Bangalore Rural

Uiuiuiui, iaz ischs woll shun a weilele her dass wider awia dorzehlt hon, tjoh sel hot a an Grund... Mir worn afn Strond und sel viel, und hobens ins richtig guat gian glossn, bevors wider ins Inlond gongen isch und mittlerweile shun richtung Westen noch Chennai unterwegs sein.

Ober nomol fa unfong un...
In Kochi unkemmen sein mor glei fa a Tuktuk fohrer überredet worden in a poor gschäfter eini zu gian durchdem mir a gratis Stodrunfort (zb. zum Fort Kochi, Chinesische Fischernetze und a poor Tempel) fa ihm gekriag hoben, und sogor zumschluss a no a Geld fa ihm gekriag hoben weil er durchdem so viel provisione gekriag hot... Joh mir sein iaz ba dor Indische Mafia😅

Weitergongen isches olm Küste endlong zum Marari Beach. Mitn Bus mitdem mor sem hin gforen wor di Musig und is geklappere fa dor Lautstärke her so zu vergleichen, wia wenn ban Spotzenfest in dor ersten Reihe bisch. Zum glück wor nocher dor Strond desto ruhiger und gemiatlicher... Coole Strondbars und Freizeitaktivitäten hosh sem vergblich gsuacht, ober es wor eben dorfir fein amol fa den chaotischen und stressigen auser zu kemmen. Sem homor ba gonz a netten Familie dorhoam gschlofen de fir ins sogor Frühstück und Obendessen gekocht hoben...

Ob zum nächten Strond, und sel zum Varkala Beach. Fa mir ausgsegn dor shianste wo mor bis iaz gewesen sein. Extrem shianes Wosser hoache Wellen weißer Strond und jede menge lässiger Strondbar wos viel guates essen geben hot... Oke es wor wider awia lauter und belebter, ober dorfir hosh du gemerkt dass di Leit a wider awia mehr gefühl fir Touristen ghop hoben...
Wias ins sem gongen isch?
Lei grot guat🙏
Ober wenn men ins kennt nocher hot logisch wider amol a abendteuerliche Scooterfohrt zu a rießen Denkmol fa a Adler net fahlen getreft... Und joh weil men di Lisa kennt (und mittlerweile bini a awia so geworden) homor ins de 3€ gsport und sein fost 1000 Stiagen ba 38C° af den Higl zu den Denkmol aui gschuntn..
A mega shiane Kayakfohrt in di Mangrovenwälder ba Sunnenaufgong homor ins a no gegönnt, und mir sein sogor trukn geblieb, zumindestehr oder wianiger😅

Und JOHHH mir hobens bis zum südlichsten Punkt Indiens ljogisch a gschofft. Sem homor nocher Sunnenuntergong (logischer Weise😉) und di Lisa a no in Sunnenaufgong gschaug...

In Tog drauf isches a shun weiter gongen noch Madurai, wo mor ins di bis zu 60m hoachen Buddistischen Tempel, de in dor gonzen Stott vertoalt sein, ungshaug hoben... Sem wors wider amol laut, stickig und joh... i glab de hoben do nia an weißen Mensch gsegn, demendsprechend sein mor a "bewundert" worden...

Nochdem dass mor an kurzen Schokmoment ghop hoben, weil i in Fehler gemocht, und inser Zug noch Bengaluru in Februar gebuacht hon und net in Jänner, honi mor gonz spontan a alternative einfollen lossen gemiast.. Mitn Nochtbus isch di Reise nocher weiter gongen... Wos a nocher zum glück relativ reibungslos ohgloffen isch...

Joh, und iaz sein mor in Bengaluru... und i muas sogen di Stodt isch wirklich komplett onderst wia dor Rest fa Indien... Es gib Gehsteige, Supermärkte, Normale Autos, Stroßen ohne Müll, Koane Hupen sein erlab in gewisse Gebiete, Müllkibl, die Leit shaugen oan nimmer un wia men a auserirdischer waret und es gib a sogor Uber... Viele coole Restaurants und Bars gibs ah, und a wider Internationales essen wos gonz guat tuat wider amol...
Di Stodt hot ober a gonz viele orme viertel wos di Leit wirklich hort hoben, ober nocher fohrt men 2 Stroßen weiter nor gibs sem a Lamborghini Händler oan Starbucks und noblen Loden nochen ondern... Mir hoben ins is Parlemt, Gericht, in rießigen botanischen Gorten und die viele hipster Straßler sowia a di örmeren Straßler ungshaug...
Af olle Fälle mega a auffregende Stot de men gsegn hoben muas...

Wia am unfong gsog geaz morgen weiter noch Chennai, und sel hot a an Grund, weil fa sem aus geaz nocher ins negste Lond, und welches sel wert, seges nor shun noo😉😉

Enkre Auserirdischen Freunde

Rene&LisaRead more