Ōita City

Nach guet 4 stund im zug d ostküste vo kyushu z‘deruf fahrä simer am abä in beppu acho. D studentestadt - bekannt für die viele thermalquelle - heimer schnäu is herz gschlossä. Nachm ablade vo üsne rucksäck im hostel, heimer zwöi plätz imne winzige resti ergatteret. Dr student wo am choch ushilft hets üs erliechteret es vegetarischs menu uszsueche, sis änglisch isch überdurchschnittlech vergliche mit anderne kellner bis iz :)
Nach däm mr üsi hungrige mäge mit feinem tofu, riis, edamame undemne eier-tomategmisch gfüllt gha hei, heimr mit guetem gwüsse is bert chönnä.
Da si im hostel säuber ke laundry-service abiete, hei mir üs säuber nachm nächste wöschsalon uf d socke gmacht. No vorem erste kaffi heimer die grössti trummele gfüllt und ersch drna üse koffeinspicher wieder gfüllt.
Es isch scho 12i gsi wo mr üs uf d suechi nach öbis z’esse gmacht hei, aber hüt het üs vo dene paar scho offne restis kes agmacht gha. Bi paarne sinkt d vegi-uswahl scho bir karte drvor i eistellig prozentberich. Bi anderne stigt ar laura dr fischgruch bim uftue vor türe scho so id nase, dass ihre fasch e flosse wachst (si liebts nid).
De simer schlussendlech i lawson-store u hei dert eifachi tofu-sushi und snacks kouft. Mir heis beidi gfiret u wärde sicher ab u zue mau uf ds zrügg griffä.
Es isch de scho fasch haubi 3 gsi, womer ändlech los si, für das womer eich si da härä cho: onsen!
Einigi sägä, es sigi öbis vom einzige was die japanischi kultur usmacht, wöus nid vom asiatische festland chunnt. Drmit gmeint ischs badä (&wäschä) i de heisse quelle. Die vulkanlandschaft het x heissi wasserustritte und langi zyt hei normali, japanischi hushäut kes bad gha. So steit no hüt dr bsuech im onsenbad bi viune ufm tagesprogramm. Beppu isch bekannt für die viele onsen und mir hei ds üs nid wöue la entga. Ds ganze isch nid sehr spektakulär und phototechnisch schwirig z dokumentiere :) Di meiste si gschlechtertrennt und nach dem mä ir garderobe aui kleider abzoge het betritt me z bad. Dert wischt me sich zersch bi de wassersteue u stigt när ir mitti is heisse bad. Hüt hets zwöi becki gä, eis isch heiss gsi, z andere mega heiss! Es si vorwiegend auti lüt dert gsi, wo am bode hocke u sich gründlech wäsche. Viu vo de männer rasiere sich o dr bart. Vom gseuschaftleche ustusch hei mr hüt nid so viu mitbecho u si beidi froh gsi hei üs es paari ab u zue gseit wo was wie. Was ize aues eher banal tönt isch mit au dene zeiche gar nid so selbstvrständlech, schliesslech wei mr ja niemer vore chopf stosse.
Nach öbe 30min simer de o wieder dusse gsi, mitemne rote chopf schön am nacheschwitze aber durchus entspannt. La usklinge heimer das imne kaffi nid wit drvo und üs imne neue spieli (hanabi) vom drachenäscht vrsuecht.
Am abe heimer fein indisch gässä. Das mr definitiv nume nach chartespieli u nid nach slotmaschine süchtig si, het üs ä churzufenthalt ir spielhalle zeigt. Ohrebetäubende lärm, umgä vo luter seniore heimer bis am schluss die maschine nid ganz begriffe u üs o gli wieder drvo gmacht. Morn geits witer nach hiroshima!Read more