Manuela Honegger

Joined June 2017
  • Day5

    Manuel Antonio Nationalpark

    September 14, 2017 in Costa Rica

    Am Dunnstig simmer in Manuel Antonio Nationalpark. Mir nur 7 km2 isch das de chlinsti Nationalpark in Costa Rica. D'Wanderig dur de Park isch ufgrund vo de Hitz und Luftfüechtigkeit zimlich astrengend gsi. Aber es het sich definitiv glohnt. Mir hend mega vill Tier, wie z.B. Fuultier und Affe gse und d'Wanderig dur de Regewald gnosse.
    Jetzt sitz ich grad im Hotel am Flughafe in San Jose. De Dave isch hüt Morge am 5i zrug uf Mexico City gfloge und wird hüt Abig wieder zrug id Schwiiz flüge. Min Flug gaht au ines paar Stunde uf Cancun und vo det wirdi wieder für es paar Täg uf Playa ga - wo alles agfange het. Ich wird die Wuche nomal de Strand und s'Meer gnüsse, Reise wirdi glaub nüme gross.Read more

  • Explore, what other travelers do in:
  • Day3

    Monteverde

    September 12, 2017 in Costa Rica

    Am Mäntig hemmer die 2 letzte 18 Meter Tauchgäng gha. Bim 2. Tauchgang hemmer nebed tusige vo Fisch, Haie und e Schildchrott gse. S'schönste isch aber de Walfischgsang gsi wo mir unter Wasser hend chöne ghöre. Nachem Tauche hemmer denn au endli euses Tauchbrevet becho. :-)
    Am Zistig simmer denn uf Monteverde id Berge gfahre und hend det die schöni grüeni Natur gnosse. Es Highlight sind die ville farbige Kolibris gsi wo mer hend chöne beobachte.Read more

  • Day0

    Costa Rica - Pura Vida

    September 9, 2017 in Costa Rica

    Sit es paar Täg simmer in Tamarindo - Costa Rica. S'Motto vo dem Land isch "Pura Vida" und genau das staht au uf de Tagesordnig. De Usdruck "Pura Vida" wird vo de Costa Ricaner hüfig verwendet und isch nie fehl am Platz. Er gilt als Synonym für "Don't worry, be happy" oder wird als Antwort ufd Frag "Que tal?" verwendet.
    Mir sind beidi total begeistered vo dem wunderbare Land mit sinere traumhafte Natur, mit de lebensfrohe Lüt und em feine Esse 😍 De Plan isch ursprünglich gsi, dass mir 2 Nächt in Tamarindo blibed aber irgendwie chömed mir nüme weg vo da. Mir hend agfange Surfstunde ne und sind debi d'PADI Tauchlizenz zmache. D'Theorie und de ersti Kurs unter Wasser hend mir gester und hüt gmacht. Morn gilts ernst und mir werded die 2 erste 12 Meter Tauchgäng mache. Tamarindo isch es mega schöns, verschlafnigs Surferdörfli. De Tag verbringt mer da am Strand oder im Wasser und de Abig laht mer binere chalte Cerveza am Strand bi Live Musig usklinge. Mir chönd eus beidi so guet da erhole. Mir werded da no s'Tauchbrevet abschlüsse und es paar wiiteri Surfstunde ne bevor mir denn s'Landesinneri gönd go entdecke. Pura Vida! 🌸🌊🏄🏻‍♀️Read more

  • Day6

    Fazit Kuba

    September 3, 2017 in Cuba

    Mir sind beid ziemlich enttüscht gsi vo Kuba. Die meiste Lüt sind so extrem unfründlich, das hend mir no nie noimeds erlebt... S'Problem isch die sozialistisch Wirtschaft, die Meiste sind vom Staat agstellt und chömed en lächerlich tüfe Monatslohn über, wo hine und vorne nöd langed (durchschnittlich 25 CHF/Monat; langed für 10 Täg). Us dem Grund hend d'Lüt kei Lust zum öpis zleiste. De Höhepunkt isch gsi, wo mir in Santa Clara hend welle ines Resti und eus praktisch de Zuetritt verwehrt worde isch. Mir hend d'Chällnerin müsse drum bitte, is Resti dörfe zga. Denn hemmer nach de Spischarte gfrögt und denn het sie eus genau 1 Charte uf de Tisch knallt. Es anders mal hend mir inere Bar es Bier welle bstelle. Denn het de Chällner gmeint, mir sölled ihm zerst umgrechnet 2 CHF ge, damit er eus das Bier gaht go hole. I so Situatione hend mir d'Welt nüme verstande. Mir hend a keim Ort en fründliche Service erlebt.
    S'Esse isch au immer katastrophal gsi. Ich als Vegi han sowieso verlore gha. I 80% vo de Restis hets gheisse: Nei, mir hend kei vegetarischs Esse
    und i 20% hets gheisse: Ja sicher, mir hend vegetarischs Esse, mir hend Riis!
    Ich han mi die ganz Wuche vo Spaghetti Napoletana und bluttem Riis ernährt. Umso glücklicher bin ich gsi, wo mir endli in Amerika gsi sind, det simmer nämmli grad mal zerst fett go esse 😂
    Aber au für de Dave als Fleischesser ischs nöd eifach gsi. Uf de Strasse vo Kuba hend mir regelmässig köpfti Hüehner, Schweinechöpf oder Fleisch gse wo bi 35 Grad umelit. Ihm hets total abglöscht und er het denkt, er isst lieber Fisch - mer sind ja schliesslich ufere Insle. Aber nei, de Thunsalat isch Thunfisch us de Dose gsi. Und wenn mer im Resti nagfrögt het, was susch no im Thunsalat dine isch, hends dich dumm agluegt und unfründlich gseit: Ja, Thunfisch!
    Es isch amig echt schwierig gsi, die gueti Lune zbhalte...
    D'Lüt wo aber nöd vom Staat agstellt sind (v.a. Casa Particulares und Taxi-Fahrer) sind immer extrem fründlich und hilfsbereit gsi.
    En wiitere Punkt wo eus zimli entüscht het, isch de Zuestand vo de verschiedene Städt gsi. Die Hüser sind so dermasse schäbig, unpflegt und verbrösmeled gsi und d'Strasse sind total vermüllt gsi und es het überall bestialisch gstunke. Die wenige chline Touri-Plätz sind all imme guete Zuestand gsi aber de Rest het katastrophal usgse. Ja, ich weiss, es isch es arms Land aber mir hend eus Kuba eifach anderst vorgstellt.
    Was eus au mega gstört het, isch d'Ufdringlichkeit vo de Kubaner gsi. Mer het kei 5 Meter chöne laufe, ohni dass dir eine e Taxifahrt, en Salsakurs, Wifi-Charte oder irgend e Tour het welle verkaufe. Han mi öpe glich gfühlt wie im 2009 in Ägypte.
    De Kubaner wird übrigens en staatliche Muulchorb verpasst. Wer sich negativ überd Politik üssered, dem droht e Gfängnisstraf.
    Nöchst Jahr endet d'Amtsziit vom Raúl Castro und es stönd neui Wahle bevor. Mir hoffed beid sehr, dass öper das Amt übernimmt wo Kuba ine moderni Richtig lenkt.
    Read more

  • Day5

    Letzter Tag in Kuba

    September 2, 2017 in Cuba

    Am Samstig hend mir s'Colectivo Taxi zrug uf Havanna gno, wo mer euse letzt Abig verbracht hend. Vill hend mir nüme gmacht - chli go pöstele, go esse und en Drink go ne. S'Highlight isch es Gspröch mitem Taxifahrer über Kuba gsi. Er het eus über s'Land, die politisch Situation, d'Problem und d'Zuekunft vo Kuba verzellt. I dem Gspröch het er all eusi Idrück und Gedanke über Kuba bestätigt.
    Am Sunntig Abig simmer wiiter uf Miami gfloge. 🇺🇸
    Read more

  • Day4

    Varadero

    September 1, 2017 in Cuba

    Am Fritig hemmer de Bsitzerin vom Casa Particular in Santa Clara gseit, sie söll eus bitte es Sammeltaxi uf Varadero bstelle. De Fahrer isch pünktlich vor de Türe gstande und wo mir s'Taxi gse hend, hemmer gmeint das seg en Witz. En blaue Oldtimer isch es gsi, wo mer z'14. (!!!) höch inequetscht worde sind. D'Köffere het er ufs Dach bunde. Ich han während dere 3 Stündige Fahrt fast e Kriese becho und ständig a min Koffer ufem Dach müsse denke 😱 In Varadero hemmer eus en Strandtag gönnt. Varadero isch schliesslich DE Touristeort in Kuba und mir hend oft ghört, dass det de schönst Strand vo de ganze Karibik isch. Mir sind beid aber ziemlich enttüscht gsi vom Strand. Ja, es isch en typische Karibikstrand, wie mer en sich vorstellt - mit türkisblauem Meer und wissem finem Sand. Aber er isch total überfüllt und vermüllt gsi. Rund um eus hetts alles Kubaner gha wo sich mit Chueche und Bier verpflegt hend. De Abfall hend all mit einere Selbstverständlichkeit an Bode grüehrt. Da hetts eus beidne chli abglöscht.Read more

  • Day3

    Santa Clara

    August 31, 2017 in Cuba

    Am Dunnstig hend mir eus ufd Suechi nachere Mitfahrmöglichkeit uf Santa Clara gmacht. Dur Zuefall simmer anen Kubaner gloffe, wo det wohnt und a dem Tag het welle zrugfahre und mir hend für en guete Pris mit ihm dörfe mitfahre. Santa Clara isch bekannt für e Schlacht wo de Che Guevara en historisch revolutionäre Sieg errunge het. D'Touriste werded mit de Statue vom Che a das Ereignis erinnered. Hinter de Statue befindet sich au sis Mausoleum.Read more

  • Day2

    Trinidad

    August 30, 2017 in Cuba

    Vo Cienfuegos hemmer denn nomal es paar Stündli uf Trinidad müsse fahre. D'Spanier hend im Vorus scho es Casa Particular (Kubanischi Privathüser, wo Zimmer a Touriste vermietet und e erschwinglichi Übernachtig und es authentischs Kulturerlebnis bütet) reserviert und mir hend Glück gha und hend det au no es Zimmer für 2 Nächt becho. Es schint, dass Trinidad im Jahr 1850 stah blibe isch. D'Hüser sind im spanische Kolonialstil baut und guet erhalte (zumindest vo ine). Die Stadt isch früehner vorallem für ihri Zuckerfabrike bekannt gsi und verdankt am Zuckerhandel ihre Richtum. Mit de Kopfsteipflastergasse versprüeht Trinidad ganz e spezielli Atmosphere.
    Am Mittwuch hend mir e Dampflokifahrt is Valle de los Ingenios - wo früehner all Zuckerfabrike gsi sind - gmacht und die wunderschön grüen Natur vo Kuba dörfe gnüsse.
    Read more

  • Day1

    Cienfuegos

    August 29, 2017 in Cuba

    Am Zistig Morge hemmer eigentli uf Santiago de Cuba welle flüge aber wie sich usegstellt het, sind Spontanflüg in Kuba leider fast unmöglich und mir hend darum eusi Reiseplän churzfristig müsse ändere. Mir hend eus denn entschiede, dass mir de Bus uf Cienfuegos nehmed. D'Chance für spontani Busfahrte sind aber öpe so gross wie die für spontani Inlandflüg und so isch au de Plan zimli schnell gstorbe. De Vermieter vo eusem Air BnB het denn all Hebel in Bewegig gsetzt und sich mitem Dave ufd Suechi nacheme andere Weg gmacht. Ich han i dere Ziit i de Unterkunft gwartet. 1.5 Stund spöter sinds endli zrug cho mit 2 Spanier wo uf de Suechi nach 2 Persone gsi sind, wo es Taxi mit ihne uf Trinidad teiled. Mir hend sofort eusi Köffere packt und sind en churze Augeblick spöter mit de 2 Spanier im Taxi gsesse. De Taxifahrer het eus vorgschlage, dass er gege en chline Ufpris es paar Stündli in Cienfuegos wür halte, bevor mit wiiter uf Trinidad fahred. Somit hend mir glich no d'Möglichkeit gha, Cienfuegos kennezlerne. Cienfuegos isch erst 1819 gründet worde und ghört somit zu de jüngste Städt in Kuba. Us dem Grund isch sie 2005 zum UNESCO-Weltkulturerb erklärt worde. Wegem französische Baustil, bezeichnet vill Lüt Cienfuegos als "s'Paris vo Kuba".Read more

  • Day0

    Havanna

    August 28, 2017 in Cuba

    Eusi Wuche in Kuba neigt sich am Endi zue. Mir hend eus Kuba ganz anderst vorgstellt, ich wird eusi Idrück und Gedanke mit eu aber imne separate Bitrag teile. Die folgende Biträg sölled en chline Überblick über eusi Reis in Kuba darstelle.
    Am Sunntig Abig simmer in Havanna acho und denn au grad mitem Taxi uf Havanna Vieja gfahre wo mir eus im Vorus es Air BnB für 2 Nächt buecht hend. In Havanna Vieja acho, sind eus als ersts die schäbige Hüser und de schlechti Zuestand vo de Stadt ufgfalle. Au hemmer sofort die ville schöne alte Autos gse. Mir sind denn gschwind öpis go esse und hend eus bim Plaza Vieja en Mojito gönnt.
    Am Mäntig simmer Havanna mitere Bus Tour go uskundschafte. Bim Capitol het de Rundgang agfange und mir sind zum Plaza de la Revolución gfahre wo sich die berüehmte Wandbilder vom Che Guevara und vom Camilo Cienfuegos (2. Revolutionsheld vo Kuba) befindet. Vo det ischs wiiter gange an Malecón, die 8 km langi Dammstrecki vo Havanna, wo mir hend chöne beobachte wie die gwaltige Welle ad Kaimuure tosed. Am spötere Namittag simmer anen Märt für Kunsthandwerk und i kubanischi Rum- und Zigarreläde. De Tag isch bi dem dynamische Stadtlebe schnell verbi gange.
    Read more

Never miss updates of Manuela Honegger with our app:

FindPenguins for iOS FindPenguins for Android