Chivay

Am 2:45 isch üse Wecker los, denn am 3:00 sinds üs mitem Büsli bim Hostel go hole. Denn hettemer nomal chöne 3 Stund im Bus pfuuse, das isch eus aber eher schwer gfalle. Aber nid so schlimm, denn d‘Ussichg isch amel wunderschön gsi. Mir sind genau in Sunneufgang gfahre und dur eh schöni Bergstrass cruised. Am 6:00 hemmer irgendwo im nirgendwo binere Familie dihei Zmorge gesse. Sie hend dusse uf de Terasse sehr herzig für eus uuftisched und mir hend en wunderbare Blick gha. Es Avocadobrötli spöter isches wiiter gange. Mir sind entlang am Colca-Canyon nahgfahre und ih de Mitti am Colca-River. Das isch de 2t tüfsti Canyon vo de Welt. Die Ande sind würklich massiv. Ein Berg (Berg Mismi), wo wunderbar usegragt isch, enthaltet sogar d‘Quelle vom Rio Negra, dem breite Fluss wo dur de Amazonas gaht. Mir hend au Glück gha und es paar Kondore gseh umechreise. Ih dere Ziit im Jahr sind die nämlich normalerwiis in Paracas ah de Küste. Aber es sind würklich riise Vögel und gsehnd am Himmel chli us wie Flugzüg. Die sind au damals ide Inka-Ziit nebed de Schlange und em Puma sehr heiligi Tier gsi.
Mir sind denn chli am Canyon nahgloffe zumene wiitere Ussichtspunkt Mirador de las Condors. Dete hemmer wiedermal gmerkt ih was füreme touristische Land mir eus grad befinded. Es het au irgendwelchi Lüt gha, wo sich als Kondore verchleidet hend und mer mit dene es Föteli hett chöne mache und Lüt hend das au tatsächlich gmacht 🤦🏻‍♀️ Mir sind den wiiter zunere Ortschaft gfahre, wo mir üs zwüsched es paar Aktivitäte hend dörfe entscheide. Mir sind den go Kayak fahre. Und zwar hemmer ih somene Abschnitt vom Fluss vo ca. 20 Meter chli dörfe hii und her fahre. Also nid mega lohnenswert gsi. Spöter in Chivay hemmer en Zmittagshalt gmacht bevor mir zum Mirador de los Vulcanos uf 5000 müM gfahre sind. Leider isches soo schlechts Wetter gsi det, dass mir kein einzige vo dene 8 Vulkane gseh hend. Ufem Heiweg simmer den dur das Naturreservat vo Chivay gfahre, wo mer immer wieder wildi Vicuñas, Lamas und Alpakas gseh hend. Am 5i simmer öppe zrugg im Hostel gsi. Nachere churze Pause simmer ufe Rooftopbar und hend die nögste Täg planned. S‘erst mal sit mir unterwegs sind hemmer d‘Hostel für die ganze nögste 4!! Nächt bueched. Aber da mir ez richtig Cusco/Macchupicchu gönd, hemmer denkt es schadet nid. Es isch immer wieder es lässigs Gfühl zwüsse, was ide nögste Täg uf eim zuechunt und ez chömed langsam die richtige Highlights😍 Richtig zfriede simmer na ines vegans Restaurant La Prana go Znacht esse. Nachere feine Bowl und 2 sehr feine iiheimische Bier simmer langsam zrugg is Hostel go pfuse.Read more