Stari Grad

Hüt het sich Belgrad vo sinere schönste Siite Zeigt. Chum es Wölkli isch z gseh gsi und es isch richtig schön warm gsi. Nach em Zmorge und em ne churze Ichaufsbummel sind mir zur Festig vo Belgrad, „Kalemegdan“ spaziert. Was für e herrlichi Ussicht über d Stadt sowie die beide Flüss vo Belgrad, d Sava und d Donau. Usserdäm hend mir üs d Sonderusstellig vo de Folterinstrument zu Gemüte gfüehrt. Gnueg Material für die nächste Alpträum hend mir jetzt sicher au…
Mit em Bus isch es denn über d Sava zur Donau gange, wo mir entlang gschlenderet sind und denn im ne schwümmende Beizli uf der Donau d Ussicht gnosse und Würfelspieli gspielt hend. Am spätere Namittag sind mir uf nes Boot. D Sunneuntergangs-Flussfahrt isch eifach traumhaft gsi. Die spannende Infos vom lokale Skipper hend das ganze perfekt gmacht. Nach em ne feine Znacht mit eigentlich herrlicher Ussicht (wo mir nur leider chuum gseh hend, will d Schiibe vom Lokal so dräckig gsi sind), sind mir mit em Bus wieder retour gfahre. Das me sich i de Büs hie fühlt wie uf re Achterbahn, das si mir üs ja langsam gwöhnt. Es tönt öppe gliich, rumplet mindestens so fescht und chli komisch schmöcke tuets au immer. Churz vor üsere Haltestell, hets de e Knall gä und de Bus het richtig grauchnet. Nachdäm mir hend chönne usstiige, het sich de Busfahrer afe mal i einere Seelerueh sis Sandwich gno und het sich das Spektakel agluegt. Us der Rueh bracht het ihn das aber offesichtlich nid. Nachdem er sis Sandwich fertig gösse het, het er denn doch irgendwenn sis Handy i d Hand gno und öpperem aglüte. Öb das aber d Werkstatt gsi isch, si Chef oder öb er eifach sinere Frau aglüte het zum säge, dass sini Schicht früener als erwartet fertig isch, das entzieht sich üsere Kenntnis…Read more