Bentota River SPB

D Zugfahrt entlang ar Küste het e gueti Stund duret. Das’s ziemli grägnet het und di grossä Türe offe si gsi hei es paari e schöni Abchüelig gnossä. Dr Samosa-Vrchäufer het dr Yännu knapp vrpasst abzfah und eine het no mitere viu z lute Stereoalag gsunge, drum simer froh gsi womer in Aluthgama acho si.
Vo dert ischs mitm Tuktuk nid lang gangä bis mr bi üsere Unterkunft in Bentota si acho. Dr Suresh het üs i Empfang gno, mir hei sini letzte zwöi vo dene 6 Zimmer buechet gha. Vo de grümige Zimmer im 2. Stock het me e Blick ufs Meer chönne erhaschä und da üsi überdachte Terrasse näbenand si gsi heimer gad mitemne Jässli dert gstartet. Nach däm mr üsi grossä Bier glärt hei gha und z Wetter immerno nid besser isch gsi, heimer üs entschiede o gad im Restautant vom Suresh z ässä. Z Curry isch mega fein gsi, d Laura und dr Yännu hei o ihre Wunsch vor Unschärfi chönne ibringe.

Am nächste Morge isch dr Yännu bereits wieder früeh am Morgä dr Strand abgloffä. Bim gmeinsame zmörgele heter de vo sine Bekanntschafte vrzeut und mir hei gwüsst a wele Egge vom Strand mr wei nachere Liegi go sueche.
Vor Unterkunft sis es pasr wenigi Minute z Fuess am Bahnhof vrbi über d Gleis gsi bis zum Strand. Dert heimer bi eire vo viune Hotelalage üs ufne Liegi ungerne Sunneschirm knallt. Das ersch gäge Abe wieder gueti Wäue fürs Surfe sött ha, heimer de umeplegeret u üs im Meer abküehlt. Gäge Abe hei sech de dr Yännu und ig uf dä Brätter probiert z häbä. D Bedingige si nid gad top gsi und vilech ischs o no chli a üsne Fähigkeite gschitteret. Immerhin heimer chli paddlet, damit mr nid numä vom ässe müesse schribä :)

Nach dere Session heimer Lust gha ufnes Bier plus hei d Laura und ig unbedingt öbis müesse usdrucke. Dr Zuefau hets wöue das o hie dr Geoffrey Bawa es Hotel boue het. So simer de mit üsne Badhose undemne Tshirt i die 5-Sternalag spaziert und hei ar Poolbar öbis trunke. Drzue heimer z Cabo mit de Jasscharte gspiut. Wo dr Barkeeper erfahre het wo mr husä, het sich usegsteut das dr Suresh, dr Manager vor Ungrkunft, i däm 5*-Hotel us Lifeguard schaffet. Da er u dr Barkeeper es igschwornigs Team si heter ihm gad aglüte und mir hei mit ihm gfacetimet. D Iskaffis und dr Erdbeer-shake si när sogar uf Huus gangä.
Ar Reception, o ne wunderschön gstautete Rum mit farbiger Dechi, sisi de drna o no so lieb gsi um üsi Dokument uszdruckä und mit dene heimer üs ufe Weg zur Ungrkunft gmacht.

Am Abä hets wieder in Ströme grägnet. Da mr nid scho gad wieder am gliche Ort hei wöue ässä heimer de üs für die paar Meter glich usä trout. Trotzt de Rägejaggene hets üs i dene 3min im Räggä richtig vrschiffet. Bsunders mini Hosä hei trievt vor Nässi :)

Am nächste Tag hani mi vom Y. Schneeberger la inspiriere und bi o bereits vorem zMorgä dr rächt läng Strand abgloffä. Es isch bereits am 8ti am Morgä drückend heiss gsi, sogar ig ha scho gschwitzt :)
Bentota het e schöne Strand und z Meer isch sehr agnähm zum Badä. Zum Surfe gits sicher besseri Spots. Was aber uffaut si die viele grossä Hotelalage und die dütlech höchere Prisä vrglichä mitm Rest womer drvor gseh hei. Dä Ort lebt vo de Pouschautouriste und mä gseht chum Rucksäck, drfür umso meh Koffer bi de Touris. O hie faut uf wie viu Russinne und Russe dases het. Verschidni Tuktuk-Fahrer hei üs vrrate das si nid gad so Fan drvo si…

Nachdäm Spaziergang und ere Duschi hani mit mine Kunpane zmörgelet und bi drna gad vom Nachbar mitm Tuktuk abgholt wordä. D Laura und dr Yännu heis vorzoge a Strand (Spoileralert: statt ga z brüne eher ga z röte) z ga während ig es paar Minute is Landesinnere zum „Lunuganga Estate“ bi gfahre wordä. Ds Grundstück het ar Familie vom Geoffrey Bawa ghört und är hets zu Läbzyte stetig usboue. Täglech gits dert für Interessierti Füehrige und d Rümlechkeite wärde hüt us Hotelzimmer vrmietet. Drum wird näbst sims aute „Wuchenend“-Büro/Atelier vorauem dr Garte besichtigt. Mit sim Brüetsch us Landschaftsarchitekt zämä heter sich mindestens so für d Pflanze wie für d Gebäude interessiert gha. Nachemne Schlagafau heisi dr betagt Awalt u Architekt dert pflegt und het ab da sini Zyt bis zu sim Tod im 2003 grössteteils dert vrbracht. Si ehemalig Butler het üsm lustig zämegwürflete Grüppli einigi Anekdote vrzeut während däm mr dert si umegschuenet. Drna hani no es Kaffi trunke u bi de mini zwöi Fründe am Strand ga ufsueche.

Nachdäm mr chli hingerem Strand öbis gässe hei und ig ändlech mini Liegi parat ha gha, hets de o scho fasch afa tröpfele. Früecher us di letzte Täg simer de zrügg zur Unterkunft und hei us Alternativprogramm dr Suresh nachemne Ort fürne Massage gfragt. „The best place for Massage in Bentota“ het üs gar nid so guet gfaue. Gstartet hei üsi Massagene ufemne Plastikstüehli und da die Absteukammere nid ganz dicht isch gsi hets üs vom Gwitter regumässig uf üsi gölte Körper tropfet. Immerhin ischs prislech, äuä uf Grund vo de vielne Pouschaltpuris, mindistens dopplet so tür gsi wie di letzte Massage womer hei gha :)

Immerhin heimer es paar Stories gha später bim Bier zum üs z amüsiere. Immerno glänzend vom Öl simer de när direkt ga zNacht esse. Einisch meh simer di Erste (u fasch einzige) imnä Resti gsi. Z ässe isch aber einisch meh top gsi, trotzt de fählende Lüt :)

Am nächste Morgä heimer nachm zMorgä üsi Rucksäck packt und sä deponiert. Bis Mitti Nami simer när nomau i ds chice Hotel wo dr Suresh schaffet ga liege und hei dert dr ganz Komfort vo Pool, früsche Tüechli und ere Duschi gnossä. Dä Tagesitritt het sich definitiv glohnt und so simer de um di 4i suber und erholt am Bahnhof, o entworfe von Geoffrey Bawa, gstande und hei ufe Zug nach Colombo gwartet.Read more