Wewala

Nachdäm üs üse Host bim Busbahnhof in Dickwella het abglade, heimer bim „Beck“ es paar Samosa und Süessigkeite für ufe Weg kouft. D Suechi nachere Toilette isch nid erfolgrich gsi, so het e chline Struch müesse dragloube.
Dr Bus wo bis nach Colombo fahrt isch nid dr neust gsi, drfür guet gfüllt. Di ersti Haubstund simer mit viune angere ar Stange ghanget und jedes mau we öber use het müesse isch dr scho süsch ungwohnt Körperkontakt no intensiviert wordä. D Laura u dr Yännu hei de na-dis-na mau es Bänkli chönne erobere und churz drufabe ha o ig es Plätzli zum abhockä gfunde. Dr Mönch näbä mir hani nid immer guet vrstande, er isch wie so vieli ömu Fan vor Schwiz :)

Nach däm mr üsi Rucksäck in Hikkaduwa usm Bus hei ghievt, heimer es Tuktuk zu üsere Ungrkunft gno. E nätti Familie het üs i Empfang gno und üs d Zimmer zeigt. Hungrig simer de churz drufabe d Strass füre gschländeret und ufgfaue si üs vorauem die viele russische Azeige. Bim Rotti-Stop heimer de üsi Büch gfüllt und nach es paar Spieli simer de bereits zrügg id Ungrkunft ga pfuse.

Dr Yännu isch am Morge bereits bezite uf, mä munklet im Auter chamä nüm glich lang penne, und dr Strand abjoggt. Nachdäm er duschet het si de o mir uf gsi. Bir „Steffi‘s Mandala“ simer ga zmörgele: Smoothie Bowl und Avo-Toast. Nach viune Wuche eher authentischem Ässe heimer üs uf ds gfreut gha. Mit Blick ufs Meer und gmüetlecher Atmosphäre het sich dä Ort de chli us Usgangspunkt o für die nächste Täg etabliert. Dr breit Sandstrand isch schön, d’Restis und Unterkünft reihele sich dicht gedrängt anenand und es git meh Pizzas us Fried Rice!
Z Meer het no rächt kräftigi Wäue und bsunders d Strömige si nid zum gspasse. Es patroulliere stetig es paar Lifeguards wo eim o zrügg pfiffä. Solang mä cha sta, und ds chamä no recht lang da die Küste säute steili Ufer het, geits.

Mir si drü Nächt in Hikkaduwa blibä und d Tagesabläif hei sich recht glichä. Nachm bereits erwähnte zmörgele simer meistens am Strand umegläge, dr Yännu und ig si am Mittag irgendwo ar Houptstrass chli ga Ris ässä und hei üs när o wieder i di Horizontali begä bis mr gäge Abä wos nüm so heiss isch gsi zum Apero spieli gspiut hei. Ob Poseidos oder Härdöpfele, d Laura isch schwirig z schla gsi und het üs zwöi einigi Närve kostet :)

Am Abä simer de nach däm mr dr Sand u z Sauzwasser abgespüllt hei entlang vor Houptstrass ga zNacht esse. Am letzte Abä heimer üs bimnä Italiener mau wieder richtig gueti Pasta gönnt und e Pizza Margherita teilt.

Am letzte Morge hei d Laura und i no e chline Abstächer nach Galle gmacht. Bevor mr zrügg si hani no churz is Jetwing Lighthouse Hotel wöue ga es Kaffi trinke. Nid wägem Koffein sondern wüu ds Hotel dr Geoffrey Bawa entworfä het. Einigi vo sine Boute hani bereits vor 5 Jahr bsuecht und gfaue mr no hüt guet. Uf üsere witere Route hets no z einte oder angere Gebäude woni mr uf dr Charte markiert ha.

Zrügg in Hikkaduwa heimer z Gepäck bis am Abä dörfe im Zimmer la und de vor dr Abreis sogar no einisch dörfe dusche.
D Laura isch a Strand ga brüne und dr Yännu und ig hei e Barber ufgsuecht. Dr Bart het gnue bissä und damit si mi wieder id Schwiz inelö heter ziemli Haar abghoue. Di 6-8mm um d Ohrä si hie dütlech chürzer, äuä eher so 2-3mm aber mir heis lustig gha. Uf d Frag obi d Nasehaar wett wachsä, hani denkt wieso nid :) z Foto mit de Wattästäbli i mire Nasä hets schnäu bis zur Laura gschafft und churz drufabä ischsi o im Ladä gstandä.

Das när bereits het afa rägnä, süsch hets jede Abä ersch so um d Dämmerig, simer nomau ga Ris ässe u hei im Schärme Spieli gspiut statt nomau a Strand.
Es bizli später simer de aui drü ohni Nasehaar im Zug ghocket richtig Bentota.Read more