Old Las Vegas Fort State Historical Park

Laaaaaaaaaaaaas veeegaaaaaaaaaaaas! Die Stadt zmitst i de wüesti hemmer üs uf gar kei fall welle la entgah. Mer händ en campingplatz in sam's town gno, grad näb me riiesige casino ond doch ned zmitst im chueche 😊
Womer acho sind hämmer zerst mal dusched (ändlich weder mal e campingplatz mit duschi 🤭) ond sind denn chli vorem wohnwage ghocked, wo grad no üsi nachbere acho send. Es härzigs älters päärli mit me chliine wiise hund (😍). Mit dene hemmer no chli plaudered ond denn hed de üs eifach e fläsche whiskey gschänkt, well mer so fründlich gsi siged ond hoi gseid händ 🤷‍♀️😂
Nachär hämmer mal welle das casino grad näbedrah go aluege. Es esch giiiiiigantisch gsi 😯! Mer händ de natürlich es paar vo dene maschine müesse usprobiere. De erich esch met es paar cents hei, ich han min isatz verdoppled...oke, sind au nor 20 dollar gsi aber immerhin 😅
Mer händ de gmüetlich im wohnmobil znacht gchoched ond send is bett.
Am nächste morge simmer früeh uf zum s wlan vom camping z nütze zum üsi wiiter reis chli plane: jetzt sends nor no 2 wuche wohnmobil, also hemmer müesse luege, was mer no alles wennd/chönnd gseh. Wiit i norde gad leider immer no ned aber mer händ e route gfunde mit dere mer beid zfriede sind. Denn hämmer grad no es paar campingplätz bueched...so über ostere chönntis scho no ziemli voll wärde 🤷‍♀️
Nachem mittag simmer de mit em bus is zentrum vo las vegas mit all de riesige casinos. S busfahre sälber esch es rechtigs abentüür gsi, sehr vill obdachlosi ond lüüt wo offebar geistig ned ufem gliiche planet läbed wie mer...100 % wohl esch üs aso ned gsi 😅
Mer send denn aber guet det acho ond händ nomol so e richtige touri namittag verbracht: dur d strasse schländere, stuune, all die riesige casinos vo inne aluege usw. Mer sind blube bes es dunkel worde esch, damit mer d stadt au no bi nacht gsehnd ond händ inere brewery znacht gässe ond natürlich es bier trunke. Hei simmer de mit me uber, so spat esch üs de bus nöm so ghüür gsi. De kassesturz dehei hed zeigt: mer verlönd die stadt weder riicher no ärmer, hed also so mässig klapped met dem glücksspiel 😂Read more