Tỉnh Tây Ninh

Hüt am Morge am 6i hetmir mi Host es supper Zmorge gmacht und i ha äntlich es richtig feins Kafi übercho ohni Zucker und Kondenzmilch. Nachem Zmorge bini mitem Roller vo ihm zumene Parkplatz gfahre wonermir het empfole. Vo da us chame i 2-3h ufe Núi Bà Đen. Der "Bärg" isch 996 m höch und es würdi e Gondle ufe ga. Mi Host hetmir aber empfole ufe z Wandere. Schnäu hani gmerkt dases e grösseri Heruseforderig wird aus denkt. Es isch ungloublich steil z Loch uf gange u das ganze bi ca. 30 °C und extrem höcher Luftfüechtigkeit. Derzue isch cho dases ir Nacht vorhär het gschiffet und der leemig Bode zum Teil sehr rütschig isch gsi. Nach 2,5h bini so nass dobe acho dasi mini Hose u mis Top ha chönne usdrücke.
Dobe gseetme sehr witi Flächine und ufz Dau Tieng Reservoir. Es het viu Bsuecher*Inne aber eigentlich usschliesslich Iheimischi. Nachdämi viu Wasser trunke ha u dür aues mau chli derdür glüffe bi hani der Wäg für zum, witer unde vom Bärg glägene Tempel Điện Bà Linh Sơn Thánh Mẫu gmacht. Gschlagni 2h hani gsuecht, X Mönsche um Hiuf bätte u aui heimir entweder gseit i söu es Ticket fürd Gondle choufe (CHF 24!!!) oder der Wäg sigi z gfährlich oder si wüsse nid woner isch. Wöumir aber mi Host dä Wäg het empfole und ig ja ou bi ufe cho z Fuess bini überzügt gsi dasi o wider abe chume u usserdäm bini z stur gsi soviu Gäut (für Vietnamesischi Verhäutniss) uszgeh für mitder Gondle abe z fahre.
Woni eigentlich scho ha ufgeh heimi die einzige offesichtliche Touris uf däm Hoger agsproche und iri Begleiterin hetmi de zumene Iheimische bracht womir ÄNTLICH der Wäg het chönne zeige. Underwägs heter 2 jungi Vietnamese agsproche si söuemi abebegleite. Das heisi de o gmacht eine isch vorab u der ander hingernache. Und i mues säge i bi verchlüpft. Der Wäg isch me zum Chlättere aus zum Wandere gsi. Es isch zumteil sänkrächt z Loch ab gange u het nume es Seili gha womesich drane het chönne häbe und aus wäri nid scho gnue ar Gränze gsi si uf haubem Wäg no mini Hose grisse. Glücklicherwis hani no es Tuech derbi gha wonimir ha chönne umbinde u so bini när witer "gwanderet". I weis nid wie lang dases isch gange bismir dunger si gsi es ischmir ungloublich läng vorcho aber mir heis gschafft. I bi sehr dankbar gsi heimi die 2 Männer mitgno und simir aui heil dunger acho. Ohni si hätti der Wäg zimmlich sicher nid gfunde.
I bi när no dä berüemt gross Tämpu ga aluege mitem Roller, dert bini zum zwöitemau a däm Tag gfragt worde öbi öpper es Fötteli mit mir dörfi mache...wede aus Tourist e Attraktion für die Iheimische bisch, hesch äuä die klassische touristische Pfade würcklich verlah. I ha bim Tämpu schnäu gmerkt dasi garnümme ma u bi när diräkt i mis AirBnB zrügg.
Z Rollerfahre isch o nid nume lustig gsi. Der Vercher isch zwar dütlich ruhiger aus in Ho Chi Minh City aber glich sehr unberächebar.
I bi ohni ei Chratzer zrügg i mim Bett glandet u gloub no säute so froh gsi drum.Read more