Joined July 2019 Message
  • Day123

    Typisch Südamerika

    November 23, 2019 in Peru ⋅ ⛅ 20 °C

    Noch 4 Mönet händ mir üs scho a ganz vieli Sache in Südamerika gwöhnt und sie schätze glernt. Ich mein wie praktisch ischs, wennd uf em Haiweg direkt uf de Stross grad chasch WC - Papier chaufe? 😂

    Das werded mir vo Südamerika vermisse:
    - d Offeheit, Herzlichkeit und d Fröhlichkeit vo de Mänsche
    - s Lebe gnüsse und z friede si mit dem wo mer hed
    - s Mitenand, sogar s Bier wird teilt - es mues nöd jede es aiges ha
    - s Spanisch rede (ja mittlerwile chönd mir üs zimlich guet uf Sapnisch unterhalte)
    - Grandilla und Mango (jetzt isch endlich Saison)
    - de Markt mit sooo vielne frische Produkt
    - frischi Jugos (Piña, Maracuja, Maca, Mango,...)
    - 100 Sorte Härdöpfel (wenn mer waiss, wie mer wele mues choche)
    - Pachamama
    - all die Strosseständ mit z.B. Popcorn, es Sandwich gfüllt mit Härdöpfel, Jugo, Empanadas, Papa rellena,.. (am Afang eher zrugghaltend hend mirs am Schluss umsomeh usgnutzt)
    - Colectivos (es hed no immer Platz gha)
    - Salteñas
    - HUARAZ und üsi 2. Familie wiit weg vo dihai❤️
    - Liqueur de Coca (oder doch nöd ?!)
    - Kräcker (obwohl - tout est sec!)
    - arriba, abajo, al centro, sexy movimiento y para dentro🍻
    - depende de la resaca
    Read more

  • Explore, what other travelers do in:
  • Day113

    Huayhuash

    November 13, 2019 in Peru ⋅ ☁️ 6 °C

    Nachdem mir üs entschide hend, nomal uf Huaraz zrugg z goh, isch für üs klar gsi:
    Das Mal wend mir de Huayhuash mache, en 8 tägige Trek, wo als aini vo de schönste Wanderige ufde Welt bezeichnet wird.
    Bald hend mir au e Agentur gfunde, wo de Trek abüted, leider isch denn s Ganze abgseit worde, wils ufgrund vo starkem Rege en Erdrutsch geh häd. Glücklicherwiis hed aber alles gruumt werde chöne und mir sind denn e Wuche spöter als ursprünglich plant uf de längsti Trek vo üsere Reis.

    Wanderig
    Jede Tag simer am 5i ufgstande, hend alles zemepackt und s Zält zemegruumt. Nachem
    Zmorge simer losglaufe und sind am Tag so zwüsche 5 - 8h glaufe. Afangs ischs sehr guet gange, mitde Ziit sind denn aber d Muskle rächt müed worde und mer hend es paarmol möse uf d Zää bisse... Mir sind insgesamt über 7 Päss glaufe, de höchsti Punkt uf 5200 MüM und de tüüfsti 3500 MüM. Jedes Mol nachdem mer e Pass ufeglaufe sind, simmer mit ere Hammerussicht belohnt worde, sodass mer die Strapaze vom Ufelaufe schnell wider vergesse hend!

    Wetter
    Aktuell fangt in Huaraz d Regesaison a, dementsprechend hend mir üs vor dem Trek uf Rege igstellt. Wettertechnisch hend mir unglaublich Glück gha, entweder hets gar nöd gregnet oder erst agfange, wenn mir scho im Camp gsi sind und d Sicht a allne Usichtspünkt isch aifach unglaublich gsi!
    Mir hend aber schnell müese feststelle, dass d Nächt seehr chalt sind, vorallem wenn de Schloofsack scho d Hälfti vo de Daunefedere verloore hed. Ja mir hend no nie so chalt gha i de Nacht und au no nie so viel Kleider zum Schloofe agha!

    Gruppe
    Mir sind es chlises, ganz gmischts Grüppli vo 6 Lüt, em Guide und em Donkey Driver gsi und au do hend mir extrem Glück gha. Niemert wo Angst um de Pass hed, niemert wo immer es Bitzli vom Esse übrigloht oder z Gfühl het s git zwenig Protein, niemert wo ständig umeschreit, niemert wo Stei de Hügel abeschmeisst,.. (jo es git würklich uu müehsami Lüt i Gruppe!!)
    Read more

  • Day112

    Pachamanca

    November 12, 2019 in Peru ⋅ ☀️ 25 °C

    De José organisiert zeme mit Ihaimische immer emol widr es "Pachamanca" - es traditionells Esse. Dodefür sind mir in es chlises Dörfli chli usserhalb vo Huaraz gfahre und sind döt binere ihaimische Familie dihai gsi.
    Uf ihrem Feld hend mir fürs Pachamanca es Füür gmacht, wo denn en Huufe Stei erhitzt hend. Sobald d Stei heiss gsi sind, isch s Esse (vieli verschiedeni Härdöpfel, Yucca, Bohne, Chicclo, verschiedensts Fleisch, etc.) druf verteilt und mit Blätter und Erde abdeckt worde. Dur das Vorgehe entstoht en sogenannte Erdofe, wo s Esse chan drin gare. Nochdem s Esse dur d Hitz vo de Stei kochet worde isch, hend mir d Erdschicht und Blätterschicht chöne wegneh und s Esse usgrabe.
    S Pachamanca isch denn a alli verteilt worde (d Portion isch riiisig gsi) und mir hends üs schmecke loh. Mhhh!
    Read more

  • Day111

    Schwiizer Zmorge im KAME House

    November 11, 2019 in Peru ⋅ ☁️ 13 °C

    Mir hend usegfunde, dass de José bi sich dehei e Bachofe het. Chum hemer das usegfunde, hemer das natürli wele usnutze, will das e Selteheit do isch. Eimol hemer Herdöpfelgratin gmacht und am nächste Tag simer uf die super Idee cho zum e Sunntigszopf für all im Hostel z bache. D Südamerikaner kennet guets Brot nämli nöd...
    All Zuetate kauft hemer de Zopfteig im Hostel gmacht und sind denn zum José dä go bache. Gar nöd so eifach mit dem Gasofe, mer cha weder Temperatur no öpis anders als Underhitz istelle. Au es Bläch hets nöd gha und so hemer de Zopf ide Gratinform bache und en ab und zue vo Hand dreht sodass er au obe bruun wird.
    Am nächte Morge heds denn pünktlich am halbi 8i zum Zmorge de Zopf gä (aber kein Jugo, aso nei Chris!!). Will au de peruanisch Kollegechreis de Zopf so gern gha het hets zum Znacht Gonfibrötli mit 5 verschiedene Gonfene gä. Lustigs Bild gsi, all Peruaner mit ihrem Gonfibrötli :)
    All sind begeisteret gsi und hend wele wüsse, woe das "beste Brot wos je gässe hend i ihrem Läbe" gmacht wird. So hemer es paar Täg spöter e "Bachkurs" gstaltet, wo all hend chöne mithelfe.
    Read more

  • Day107

    Huaraz 2.0

    November 7, 2019 in Peru ⋅ ☁️ 14 °C

    D Lage in Bolivie und Chile hed sich au i de letschte paar Täg nöd entspannt. Us dem Grund hend mir entschide üsen Rückflug umzbueche (anstatt vo Santago de Chile vo Lima us) und nomal noch Huaraz z reise und do die letschte 3 Wuche vo üsere Reis z gnüsse
    Mir hend in Huaraz nume öpperem gseit, dass mir widr zrugg werded cho. So isch d Überraschig umso grösser gsi, wo mir noch öppe eme Monet widr im Hostal gstande sind.😊
    De Plan wär gsi, dass mir i denen 3 Wuche e 8tägigi Wanderi undernehmed. Leider hed üs s Wetter und de Afang vo de Regeziit chli en Strich durch de Rechnig gmacht und s Ganze isch abgseit worde. So mached mir jetzt verschidene Tagesusflüg und je noch Wetter au mol e 2tägigi Wanderig.
    Read more

  • Day87

    Montaña de los siete colores

    October 18, 2019 in Peru ⋅ ☁️ 2 °C

    Au das hend mer ufde "mues-mer-eifach-mache-in-Peru-Liste" gha. Drum simer au uf de "Montaña de siete colores" (bekannt als Rainbow Mountain). Au wider mitde Ponchos im Gepäck hend mir de Berg erklumme. De höchsti Punkt isch 5036 m.ü.M. gsi, wobi de Astiig i dere Höchi mit weniger Suurstoff ächt e Useforderig gsi isch. Seehr langsam hend mirs denn aber gschafft und sind bimne Schneesturm und viel Wolke dobe acho. Doch mir hend Glück gha, für churzi Ziit isch doch nu d Sunne füre cho, d Wolke sind verschwunde und mer hend de farbig Berg chöne bestuune. S schönste isch nöd de Berg selber, sondern die ganz Landschaft rundume wo im gliche Farbgmisch erschiint. Die Regebogefarbe sind jewils es Gmisch vo verschiedene natürliche Mineralie und Metall. D Andebevölkerig het sich mit Erfolg degege gwehrt, dass die Metall abbaue werded, will sie ihri Umgebig und somit ihres Dehei so wett loh wes isch.
    Nachere churze Fotosession hend Nebel und Schnee denn wider dominiert und mer hend im nasse, chalte Wetter wider dörfe zrug laufe.
    Read more

  • Day86

    Machu Picchu

    October 17, 2019 in Peru ⋅ ☁️ 18 °C

    Obwohl mir gwüsst hend, dass de Machu Picchu als eis vode neue Weltwunder überfüllt vo Touriste sii wird, das hend mer trotzdem als ein Muss in Peru erachtet.
    So sind mir ufem Weg det ane ein Tag es paar Kilometer ufme Inkatrail glaufe. Insgesamt ziehnd sich d Inkatrails uf über 30'000 km vo Quito bis Santiago de Chile. Will mir jetzt ide Regesaison acho sind isch d Stimmig vode Landschaft ganz anderst. Immer chli bewölkt, das stört aber überhaupt nöd, sondern git numol en ganz eigne, mystische Scharm.
    Womer denn am Morge früeh am 7i ufem Machu Picchu acho sind, isch scho alles volle Lüüt gsi, keis Wunder, denn jede Tag chömed 5000-6000 Bsuecher det ane. Trotzdem sind mir erstunt gsi, wie gross alles isch und wie d Inkas teil so steili Häng hend chöne bebaue. Aber au, wies die ganz Stadt usme Legobau vo riesä Steiblöck baut hend wo exakt ufenans passet, wo erdbebefest isch, und das zu dere Zit mit Mänschechräft. De Alex, üse Guide, het üs ganz e huufe zude Inkastadt verzellt:
    De Machu Picchu (uf Quechua und bedütet "alter Berg" - sprich "Matschu Pigtschu", die Ussprach wo mir kenet bedütet öpis anders - nöd jugendfrei!) isch im 15. Jahrhundert vode Inkas erbaut worde. Wobis s "Inkavolk" gar nöd git, Inka bedütet nämlich eifach "König", sprich am Oberhaupt het mer so gseit. De richtig Begriff isch "Quechuavolk", denn Quechua isch die Sprach wo au hüt nu all traditionelle Andelüüt nebst Spanisch redet.
    S Quechuavolk het sich de Ort umgä vo Berge usgsuecht, wills det Wasser gä het und zwüsched em Tal, Ande und Regewald liit. Sie hend sich vode Landwirtschaft ernährt und es friedlichs Läbe gha. Bis zude Zit vode Spanier...
    Will d Spanier im 16. Jh. in Peru vordrunge sind, hend d Machu Picchu-Bewohner Schiss übercho und sind vo dem Ort überstürzt gflohe. Drum sind teils Baute gar nie fertig gstellt worde und d Archäologe hend e huufe Alltagsgägeständ gfunde. Erst im 20. Jahrhundert isch de über d Jahre überwucheret Ort entdeckt, usgrabe und erforscht worde. Obwohl mer scho vill über die Siedlig weiss, es git trotzdem immernu Rätsel mit viel Vermuetige und Theorie, wie s Quechuavolk damals gnau gläbt het.
    Read more

  • Day78

    Cusco

    October 9, 2019 in Peru ⋅ ⛅ 19 °C

    Noch de Akunft mit em Nachtbus in Cusco isch üses erste Ziel gsi, es Kaffi für de Zmorge z finde. Bereits denn sind mir überrascht gsi, wie schön d Altstadt vo Cusco isch - vieli chlini Gässli, schöni Plätz, en huufe Kathedrale, alti Gebäude,...
    Ganz oft sind mir do aifach dur die Gässli glaufe, dur Märkt gschlenderet und zwei Mol sind mir sogar zuefällig uf en Festumzug mit Musig und tanzende Peruaner in traditioneller Kleidig gstosse.
    Rund um Cusco heds au die verschiedenste archäologischi Usgrabigsstätte und Baute us de Inkaziit. Die hend mir natürlich au wele besichtige, sind de Hügel ufeglaufe, hend es tüürs Itrittsticket kauft und sind vo luuter Touriste überrennt worde, wo aifach mit em Bus direkt ane gfahre worde sind. D Baute sind idrücklich gsi, für üsen Gschmack aber aifach z viel Lüt rundume.
    A aim Tag hend mir e Tour buecht, um Moray (Terasse wod Inkas agleit hend, zum Gmües abaue) und d Salineras de Maras (Salzterasse) azluege. S Highlight sind definitiv d Salineras gsi, 3000 Becke wo dur es Kanalsystem mit Salzwasser gfüllt werded. Die stark Sunneistrahlig lot s Wasser verdunste und zrugg bliibt s Salz, wo als wisses Gold vo de Ande bekannt isch.
    Denn hend mir au e Huaraz - Reunion mit em Felicien gha. Er und sin Kolleg sind sogar is gliche Hostel züglet und mir hend mitenand 2 Täg in Cusco verbroocht. Zeme hend mir chli nebedusse sogar Usgrabigsstätte gfunde, wos chum Touriste gha hed. En ruhige, magische, naturnöche Ort, wo viel Lüt zum meditiere anecho sind.
    Read more

  • Day74

    Colca Canyon

    October 5, 2019 in Peru ⋅ ☀️ 15 °C

    Isch mer in Arequipa, chunnt mer um de Colca Canyon nöd ume, also hend au mir en 3tägige Trek buecht.
    So sind mir am erste Tag pünktlich am 3 am Morge parat gstande, abgholt worde sind mir aber erscht am 3.45 - guet sind mir so früeh parat gsi😂
    Mit em Bus ischs den Richtig Colca Canyon gange und grad als ersts hend mirs Glück gha, Kondore z gseh, üsen Guide hed nämlich scho siit 2 Wuche kai meh gseh.
    Bald ischs denn au mit em Abstig ist Tal losgange und mir hend ca. 1000 Höhemeter verlore, bis mir denn Zmittag i üsem Camp gnosse hend. Mhh Alpaka :)
    De 2. Tag isch sehr entspannt gsi, theoretisch hets am 6.30 Zmorge geh - s isch denn aber glich öppe 7ni worde (peruanischo Ziit hald 😉). Underwegs sind mir ca. 4h gsi. Das heisst öppe 3h wandere (also spaziere) und en Huufe Stopps wo üs de Guide alles Mögliche über Pflanze, die Iheimische und ihres Läbe und Traditione,... verzellt und zeiget hed. Das Mal isch üses Nachtlager inere Osase gsi, sozege es chlises Paradies Mitte im Colca Canyon. En grüene Fläck inmitte vonere karge Landschaft, wills det e Quelle git. Das hend mir au usgnutzt und de Nomittag am Pool mit em Quellwasser gnosse.
    Am dritte und letschte Tag ischs denn widr früeh losgange, am 4.45 Uhr hed d Wanderig gstartet und mir hend mit de Stirnlampe de Weg glüchtet, bis Sunne denn so wiit ufgange isch, dass mer de Weg au so gseh hed. Gemäss Guide hed mer für die 1200 Höhemeter ufe ca. 3h, mir hends i 2h gmacht - jaja so sportlich sind mir 😁
    Read more

Never miss updates of Irene Bruhin with our app:

FindPenguins for iOS FindPenguins for Android