Rangali Finolhu

Dr Flug uf d‘Maledive hätti eigetlech nume 1h15 söue ga. Scho bim Abflug het aber de Pilot schlechts Wetter agmeldet für Malé. Wüus de tatsächlech e eher grosse Sturm mit viu Räge isch gsi, isch de Flughafe churzzitig gschlosse worde. Da mir dementsprechend nid hei chönne lande, heimer i dene recht holprige Bedingige müesse überem Flughafe kreise. Mir hei uf üsem Bildschirm d‘Flugroute genau chönne mitverfouge, und spätestens bim 6. Boge hani denkt mir wärde vermuetlech wieder zrugg uf Colombo flüge (wüus recht gschüttlet het wäri i dem Moment garnid so unglücklech gsi 😂) Mitere guete Stund verspätig heimer de doch no chönne in Malé lande. De Bremsweg isch ufgrund vom viele Räge um einiges länger gsi aus o scho 🫣 Am Flughafe si mir scho vomene Mitarbeiter vom Hotel empfange worde. Üsi Reis isch aber nonid verbi gsi, wie vieli Insle uf dr Maledive isch o üsi nur per Wasserflugzüg erreichbar. Mir si auso zumene Schalter bracht worde, zum üses Gepäck nomau abgäh und si miteme Bus zum Wasserflugzüg-Terminal bracht worde. Recht churz nach Akunft isches de o scho losgange. Es het zum Glück nüm mega fest gstürmet u grägnet, u drum isch dä 25 minütig Flug recht ruhig gsi. Nach de Landig simer scho ganz härzlech empfange worde. Obwohl z‘Wetter immer no nid Top isch gsi heimer üs vo Afang super wohl gfüut. Z‘Hotel ligt ufere sehr chline Insle, wome i ca. 15 Minute z‘Fuess umrundet het. Mir hei es mega schöns Zimmer gha mit offnigem Bad und direktem Strandzuegang. Es grosses Merci a dere Stell nomau a Cueni für d‘Hotelempfählig, bi dere Uswahl a Insle und Hotels bini bim bueche richtig überforderet gsi 🤭.
Üse Tagesablouf isch eigetlech recht schnell beschribe: Am Morge simer verhäutnismässig früeh (füre Yännu wärs immerno eher spät) ufgwacht, si ga z‘mörgele und hei üs a Strand pflanzt. Zwüschedüre simer bim Huusriff ga schnorchle und hei mega viu schöni und lustigi Fische gseh. Üse absolut Lieblingsfisch: de Flöte- bzw. Trompetefisch, oder wie mir se nenne, „Stäcke“. Sie si mega läng und schmal und gseh würk eifach us wiene Stock mit Ouge, aber ufne härzigi Art und Wis. Ab und zue si sogar Riffhaie düregschwumme, mau chlineri, aber zum Teil o grösseri. Am Mittag simer immer im Resti öpis ga snacke, und derna no chli am Pool und am Strand ga chille, bevormer vorem Sunneuntergang nomau si ga schnorchle. Währendem Sunneuntergang isch immer am meiste los gsi ar Poolbar, viu heisech e Drink bstellt und si när am Strand bliebe zum luege wie d‘Sunne hinderem Horizont verschwindet. Nachem z‘Nacht simer meistens recht früeh scho iz Bett und hei no chli Narcos gluegt, mir si aber beidi immer nach ca. 20 min scho igschlafe. Am einte Abe isch aber vom Hotel us Filmabe gsi unterem Stärnehimmu, u da simer när usnahmswis nach de 10i iz Bett wüu de Film (Harry Potter und der Stein der Weisen) ersch am 11i isch fertig gsi 😂. 2 mau simer am abe ono ufe Stäg use gloffe, wüumer hei ghört dases dert am abe immer mega viu Roche het. Und tatsächlech si beidi mau ganz viu dert gsi, und dank de Belüchtig hetmese o guet gseh.
Zämegfasst heimer auso immer super gässe, ganz viu schöni Sache gseh bim Schnorchle und heis eifach gnosse, üs um nüt müesse z‘kümmere. Iz geits per Wasserflugzüg wieder a Flughafe u vo dert us über Doha nach Züri. Es isch schwirig, sone schöne Ort z‘verlah, mir freue üs aber iz glich nach meh aus 3 Monet wieder zrügg id Schwiz z‘cho! 🤭Read more