Chinchero

Hött hemmer chli öppis welle öber Cusco lehre ond hend drom e Stadtfüehrig buechet. Obwohl die met 11.00 ned öbermässig glii agfange hed, semmer am Schloss gliich no i Stress cho, wel mer vorhär no öppis Chliises hend welle ässe ond natürlech i de Nöchi vom Träffponkt nüüt Guets gfonde hend. Mer send de gliich no pönktlech gsi ond send im Verlauf vo de folgende zwoiehalb Stond vom Sergio (wo öbrigens grosse Bärn-Fan esch) öber d'Urspröng vo diverse Strossenäme, Mythene öber heiligi Mumie ond Jesusstatue, emmer no sechtbari Spure vo de Inkas ond d'Entstehig vo Cusco ufklärt worde. Of Nochfrog hed er üs au verzellt, wie är als Iiheimische d'Veränderig vo de Stadt döre Tourismus wohrnehmt. Natürlech ned nor positiv (Biispel: Früehner hesch am Plaza de Armas no es Kafi för 2 Soles chönne trenke. Neus Kafi, neui Priise: 12 Soles). E wiiteri loschtigi Anekdote: D'Fahne vo Cusco, d'Rägebogefarbe, sorgt be velne Gays zerscht för Begeischterig, denn för Ernöchterig.
Cusco gfallt üs sehr guet, aber es schmärzt scho z'gseh, dass osser Tourischte niemmer im Zentrum wohne cha - ond dass d'Spanier d'Stadt of de alte Inkastadt errichtet hend.
Noch de Tour hemmer welle go Gäld abhebe. Wies mettlerwiile normal esch be üs wenns om Gäldfroge goht, hed au das ned of Ahieb klappet, aber gschafft hemmers am Ändi de doch. Als nöchsts hemmer de Jasi ehri verlorne Händsche ond Chappe welle ersetze. Wel sie e rächt genaui Vorstellig defo gha hed, was sie wett (oder ehnder: ned wett) ond komischerwiis nor öppe 10 % vo de ganze Läde in Cusco Füüschtling öberhaupt im Agebot hend, hed sech d'Suechi als sehr ziitintensiv ond närveraubend usegstellt. Mer hend d'Hoffnig scho fascht ufgäh gha, wo de Dani im x-te Souvenirlade onder all de Händsche ond Chappe au paar Füüschtling gfonde hed ond sie de Jasi zeigt hed. Ond tatsächlech: Grössi stemmt, einigermasse schön, Alpakawolle. Ändlech! Noch dere Asträngig semmer no Gerstesaft go chrömle ond de zrogg is Hostel. Före nöchschti Tag esch e früehchi Tagwach agseid gsi.

De Start i Tag hed medem Weckton vom Handy am 5 vor 4i gstarted, 4.25 Uhr semmer nämli abgholt worde för üse Usflog noch Palcoyo, zo de Rägebogebärge. Mer hend üs bewosst gäg Vinicunca entschede, wil det täglech tusigi vo Lüüt hiiströmed. Im Büssli send näbscht em Fahrer ond zwoi Guides 6 Französinne ond Franzose gsi, en gmüetleche Rahme also. Noch rond zwoi Stond hemmer imene chline Dorf z'Morge gässe ond send denn wiiter, no einisch öbe en Stond de Högel ufe. Onterdesse eschs hell worde ond mer send wach gsi, sodass mer d'Natur chönne hend gnüsse. Ofem Ufewäg hemmer vel Alpaka ond natürlech entstandni Terrasse gseh, mer hend üsi Ussicht gnosse.
Bim Parkplatz acho hemmer üs parat gmacht för üsi rond 3 stöndig Wanderig. Mer send z'zwoite medem Joel onterwägs gsi, demet mer en änglischsprächende Guide hend, die andere sächs hend de Jimy gha, wo Französisch gredt hed.
De Ufstieg zom höchschte Ponkt of chli weniger als 5'000 Meter hemmer relativ bald gschafft ond vo det obe för üs elei d'Ussicht gnosse. D'Franzose send denn scho rächt wiit zrogggheit gsi.
Do en chorze geografische Ischub zor Entstehig vo de Rägebogebärge: Öber veli Millione Johr hend sech im damals no vorhandene Meer mehreri verschedni Schichte ofenand abglageret, jewiils met onderschedlecher chemischer Zämesetzig, was die verschedne Farbe erklärt. Wo sech denn d'Nazca-Platte onder di südamerikanisch gschobe hed ond dör das d'Ande entstande send, hend sech die Schichte vonere horizontale Position ine sänkrächti verschobe, wobiis zo de Beldig vo dene Rägebogebärge cho esch.
Vo det hemmer üs denn of en Abstieg ines anders Tal gmacht, onterwägs hemmer niemmer atroffe ond üses z'Mittag gnosse.
Wo mer denn bim Büssli, wo det scho of üs gwartet hed, acho send, hed de Joel gmeint, die andere heiged wohl no en Stond, bis bi üs seiged. Mer hend üs denn dezue entschede z'Fuess noch Ananiso ond zom Cañon, wo det esch, z'go. Au dä Teil vo üsere Wanderig esch landschaftlich sehr schön gsi. Ofem Wäg zom Cañon hemmer ganz vel Alpaka ond bim Cañon Chinchillas gseh.
Wo mer scho weder ofem Röckwäg gsi send, hed de Joel d'Nochrecht becho, dass di andere z'müed seiged ond de Cañon nömm wärded bsueche.
Bim Bus acho hemmer denn au gseh, wie di meischte bereits halbtot im Sitz hanged. Bim nöchschte Stopp, om vo obe i Cañon z'luege, send denn aber all usgstege. Vo det eschs wiiter gange, zrog noch Cusco. Bald hemmer de nöchscht, onvorhärgsehnig, Stopp igleit. De Sohn vo de einte Familie hed entweder Müeh med em Fahrstil vo üsem Fahrer, em Edy, oder med de Höchi gha ond hed üs das luutstarch ond med Material medteilt. Zom Glöck i Sack. Mer glaubed ehnder, dass am Fahrstil gläge hed, wel de Edy scho wiene Wahnsinnige gfahre esch: Waghalsigi Öberholmanöver send sini Spezialität, Kulanz anderne gägenöber könnt er ned, was fascht zomene Onfall gfüehrt hätt. Do esch üs au schier schlächt worde. Mer hends aber heil of Cusco gschafft ond send am Obig imene coole Resti go vegan ässe. Vorhär hemmer aber no üse Röckflog id Schwiiz bueched.Read more