Jacqueline

Geschter Abig simmer ächli früehner füre is Restaurant. Mir hend denkt, mir gsächid de Sunneundergang no. Hend aber Päch gha...die isch hinder de Bäum, Hügel und Wulche abe. Defür hämmer en mega schöne Vollmond gseh.
Mir hend sehr fein g'ässä und uf eimal isch e Gruppe i traditionelle Fell und Tüecher cho, wo trummeled, gsunge und tanzed hend. Isch faszinierend gsi zum luege. Die hend d’Bei ufeklöpft uf de Takt vo de Trummele, sind ufs Füdli knallt und grad wieder ufgstande, hend mit de Füess uf de Bode gstampfed. Hend mit ihrne Stimme Tön und Grüsch usebracht, mer hett s’Grühl gha, mer sigi grad im Stammesdorf zmitzt im Busch. Mir vermutet, dass die vonere Reisegruppe organisiert worde sind. Die hend mittanzed und s’Personal hett au mitgsunge und tanzed. Chuchi, Service und alli vom Empfang sind am tanze gsi! DAS isch en Abschluss gsi!
Am Morge alles packe und wieder anders verteile wegem Gwicht. 😊Churz bevor mir is Restaurant füre sind, zum Zmorge ässä, mir hend müsse am 9i usem Huus, sind doch die Ververt Affe namaö verbi cho. Hahahaha….die hend denkt, mir segid namal eso doof!
Am Krokodil River hemmer die letschte Stunde nochli gnosse. Mer ghört nüt als Wasserrusche und Vogelgezwitscher. Keis Auto, kein Flüger, die derfed ja nid über de Krüger flüge. Mer chan sich fasch nid vorstelle, dass mer 24 Stund später wieder i de Zivilisation isch.
Am 12i hemmer euis denn uf die knapp 5 stündigi Fahrt nach Johannesburg gmacht. Bi 32 Grad simmer losgfahre. 2 Nashörner grad nebe de Strass hend euis no Adieu gseit. Es hät no gwittered ufem Weg und anschienend heftig grägnet, das han ich verschlafe. Bi 24 Grad simmer acho und hend s’Auto abgeh. Das isch nach fasch 2800 Kilometer nümm suuber gsi. Aber es hett kei Problem geh. Wenn mer en 4x4 Hilux für 2,5 Wuche mietet, isch azneh, dass mer nid i de Stadt umefahrt.
Itschägge und nochli Ziit i de Läde vertrödlet. De Flug vom Vorabig isch anulliert worde. So isch am Morge am 8i e Maschine gstartet, am viertel vor 8i am Abig acho und 2 Stund später sind mir drin gsi. D’Sarina, mis Gottemeitli schafft bi de Swiss und isch uf dem Flug gsi. Bin denn grad mal richtig g’sässä, alles sortiert gha und mich agschnallt, isch sie cho und hett gseit, ich müssi s’Handy mitneh und derf führe is Cockpit! Ich ha denkt, schnell go luege…und denn han ich derfe anesitze und bim Start debi si. Läääääääääck bobi! Das sich ja voll cool gsi. De Vollmond han ich uf minere Sitte gah und d’Stadt mit all dene Liechter. Am Horizont han ich no en Waldbrand gseh…nid schön!
Wo mer uf 5000 meter obe gsi sind, bin ich vom hübsche Copilot wieder hindere begleitet worde. Nachemene ruhige Flug simmer mitere Stund verrspätig wieder uf Schwiizer Bode…bi 4 Grad.
Mit seeeeeehr vill Idrück, Erlebnis un voll erholt chan ich jetzt no lang devo zehre!Baca selengkapnya