Reset search
Nina OdermattNina Odermatt
Satellite
 
Message

Nina Odermatt

Joined July 2019 Message
  • Ägypten 2021
    Day20

    Welcome Back 🇨🇭

     September 25 in Egypt ⋅ ⛅ 20 °C

    Am morge am 6i wärded mier vo üsem Privattaxi abgholt wo üs a Flughafe fahrd. De Taxifahrer fahrt gmüetlich, gad no go tanke und macht nach 30min bereits en Kaffestop. Nah faht die 2 stündig fahrt erst richtig ah und mir fahred wider mal de Wüesti entlang richtig Hurgada. Üse fahrer gniesst d Klimaalag i sim Auto und so verfrührt d Nina fast mit zwei Pullis i dem Auto inne (er het sie uf wunsch es BIZLI abe treid). Am Flughafe wärded mier freudig empfange vo Ägypter wo üs unbedingt üsi Koffer fahre wend und nach 5min 200Ägyptischipfund (ca. 12.-) verlanged. Natürlich gäber mir nur es bizli und so gönds gschnell und igschnappt zu ihrne negste Opfer.
    Koffer abgäh, Zertifikat zeigt sind mir froh, das mir ohni problem üsi Flugticket bechöned. Lediglich bim Sicherheitscheck wärded mier wider einisch usegno und speziell "abgscant". (warschindlich gsend mier eifach gfärlich us 😉)

    Nach nid ganz 5h Flug chömed mier i de Schwitz ah und gniesseds scho im Flugzüg wider schwizerdütsch z ghöre. D häifahrt mitem Zug isch au gli gschafft und so freued mir üs sehr uf üses dehei, uf feins Ässe, de greglet Verkehr und natürlich au, dass üs niemer uf de Strass ebbis verkaufe will. 😂🇨🇭    Read more

    See translation
     
    Map
  • Ägypten 2021
    Day19

    Last Day 😪

     September 24 in Egypt ⋅ ☀️ 32 °C

    Nachere 20 Tägige Reis chund ez scho de letsti Tag dra. Mier gniessed üse letsti Tag, begliched Rächnige. Drinked chli, Gniessed nomal en Massage und spieled Botscha. En richtig glungnige letste Tag.

    So lueged mier uf en turbulänte Start ohni Koffer zrugg, spannendi und Idrücklichi Täg in Kairo mit de Pyramide und de Sphinx. Häissi Täg in Assuan. Üses Boot und diversi Tämple und Grabstätte wo mir gseh hend. Nach Stränge 1.5Wuche sind mir de doch froh no chli entspannteri Ferie z gniesse. So sind mir glücklich nachere lange Fahrt dur d Wüesti i üsem Hotel a zcho. I dene knapp 1.5Wuche gniessed mir s All-inklussive und wüssed nach es paar Täg s Ässe scho uswändig wo s gid. Mier mached vieli Tauchtäg und chömed so uf 12 witeri Tauchgäng womer i üses Logbuech chönd iträge. Mir mached en cooli Quad tour dur d Wüesti wo üs de wider einisch es bar Beduine empfanged (und züg wend verchaufe 😂😉)

    Ez gniessed mir nu üse letst Abig bimne gläsli Bier und freued üs nach dere Abendtürliche Reis scho wider es bizli uf üses deheime (und uf üses Ässe 😋)    Read more

    Andrea della Torre

    Wir wünschen euch noch einen traumhaften schönen Tag in Ägypten. Habt morgen eine gute Reise zurück nach Hause. Wir freuen uns auf euch. Liäbä und sunnigä Gruäss aus Alpnach

    9/24/21Reply
     
    Map
  • Ägypten 2021
    Day15

    Halbzeit im Paradies 🍹🏜️

     September 20 in Egypt ⋅ ☀️ 31 °C

    Mittlerwiile hend mier s Ziitgfühl chli verlohre, aber ungfähr sächs Täg sind mir ez scho in Marsa Alam i üsem schöne Resort. Wie mir üs la säge la hend, sigs s gröste Resort i de Gägend und das gmerked mier au indem täglich ca. 10'000 Schritt mached bim nüt mache 😂. Es het ganz vill chlini Hüsli und so sind mier wienes chlises Dorf mit 5 Restaurants, eigentem Strand und unglaublich viele Pools. Da mier nid so die früeufstäher sind, isches meistens en Kampf no es baar Liegene a üsem lieblings Pool z becho.

    Mittlerwiile hend mier scho vier Tauchtäg gmacht ( =acht Tauchgäng), hend debii scho einiges dörfe erläbe und cooli lüt kenne lerne. So hend mier sogar scho drümal es Schildchröttli🐢 dörfe gseh, unglaublich vieli Blaupunktroche, Lionfisch und Pufferfisch🐡, es Paar Muräne und gester hend mir grad bim usstig vom Ufer us en Delfin gseh (leider ganz knapp verpasst im Wasser). 🐬
    So freued mier üs ez uf die negste Erläbnissriche unf erholsame Täg hie im warme Ägypte.    Read more

    See translation
     
    Map
  • Ägypten 2021
    Day8

    Tal der Könige

     September 13 in Egypt ⋅ ☀️ 37 °C

    Am 6:30 lüted s Telefon:" Good morning. Wakeup Call." und so stönd mier uf, packed de Rest id Koffer ih und checked nachem Zmorge usem Schiff us. De Hussein het üs gaanz vill Wasser und es paar Snacks für die langi fahrt am Namitag bsorgt. (er luegt guet uf üs 😂)
    Als ersts gönd mir is Tal der Könige wo mier zwüsche grosse Felse, drü Grabstätte besichtige chönd. Das vom Ramsses I, Ramses IX und em Merenptah. I die Grabstätte sind Reisefüerer verbote, und so hend mir de Hussein dusse gla und sind elei inegange. Da er üs aber scho vill verzellt het, hend mir scho sälber agfange die Wänd und Kunstwärch z interpretiere 😉. S Grab vom Tut Ank Amun sind mir nur vo usse go aluege, da das nid inbegriffe gsi wär und lutem Hussein au gar nid spannend sig. S Turistemässige Föteli vorem Igang het aber natürlich nid dörfe fähle.

    Witer gads zum bekannte Totentempel von Hatschepsut was au ser idrücklich gsi isch. Nach dem gids no en halt innere Steifabrik, wo handafertigunge us Granitstei, Alabastarstei und vielem meh gmacht wird.

    Es bizli müed vo dene viele Sehenswürdigkeite gad üsi fahrt im Auto los richtig Marsa Alam. De Hussein möcht üs für die Fahrt begleite, als Fründschaftlichi geste (wiener so schön gseit het). Und so fahred mier mitem Fahrer Tyson und em Tourguide Hussein dur d Steiwüesti vo Ägypte. Am ändi vo de Wüesti werded mier am Kontrollpunkt aghalted und de Fahrer mus usstige. Lachend und es bizli verläge chunder zrugg zum Auto und so gmerked mier, dases wohl au i de Wüesti au Radar gid 😂.
    Nach 4h Autofahrt chömed mier i üsem Hotel in Marsa Alam ah. Mier verabschieded üs vo üsem Fahrer und Reiseleiter und so gönd mir i das risige Hotel. A dem Abig hend mier nümm vill vor, so gniessed mier eifach s All Inklusiv und das feine Ässe wos hie gid. 😋    Read more

    Oski della Torre

    Da kommen Erinnerungen von unserer Reise ano dazumal in den Sinn. War auch damals sehr interessant und vorallem eine Affenhitze.

    9/15/21Reply
     
    Map
  • Ägypten 2021
    Day7

    Voll Gas voran 🚢🏛️

     September 12 in Egypt ⋅ ☀️ 36 °C

    Früe am Morge lüted üses Telefon:" hello, good morning, its the Wakeup Call. Byebye"
    So stönd mir a morge am 6i scho uf und losed zue, wie s i allne Zimmer um üs ume s Telefon lüted.

    Nachem Teatime i de Bar gads uf die 6:30 los zum Edfu Tempel. Nachere churze Kutschefahrt chömed mier bim Tempel ah. Obwohl erst morgefrüe isch, sind d Temperature scho sehr hoch. Im Tempel innere gsend mir wider gigantischi Mure und verschrecked fast e chli womer ganz vill Flädermüs a de Decki atrifed. Üse Reisefüerer (de Hussein) isch weniger fasziniert vo de Flädermüs und will üs lieber no chli meh vo de Wandmalereie verzelle.
    Zrugg mit de Kutsche hend mier üs s zmorge verdient und de gads los mit de Fahrt richtig Luxor.
    Mier gniessed die schön ussicht ufem Deck und sünneled echli. Wo ufeinisch ganz vill blaui Bötli uf üs zuepadled lueged mir gspannt zue was sie mached. Sie packed s Seil us und einigi schaffeds sich a üs festzmache. Was sie den mached bringt s ganze Schiff zum lache (usser warschindlich de Kaptain). Sie packed tüechli us und versueched s züg z verchaufe. Nach de Schleuse blibed au die blaue Bötli zrugg und gönd wider uf position für s negste Nile Cruise schiff.

    Nach ungfähr 6h fahrt chömed mier in Luxor ah. Als ersts bsueched mier de Karnak Tempel und laufed dur de berüemti Saal der Säulen (wo au de James Bond scho gsi isch 😉).
    Nah gads no wiiter zum Luxortempel wo dur en ca 3 Km langi Spinxalée mit em Karnak Tempel verbunde gsi isch. Ez sind leider vieli chlini Sphinkstatue gstole worde und für de bau vo Hüser benutzt worde.

    Nachem Znacht gsend mier no en tradizionelli Orientalischi Show ufem Boot mitere Buchtänzerin und mene Farbig verkleidete Typ wo 15min lang nümm ufghört het im Chreis z treie (halt sonen traditionelle Tanz).
    Müed vo dem lange Tag verbinded mier die letst Nacht ufem Schiff.    Read more

    Andrea della Torre

    Da kommen so viele schöne Erinnerungen hoch...... Auch wir haben vor fast 30 Jahren mehr oder weniger die gleiche Reise gemacht und waren sowas von beeindruckt. Geniesst es weiterhin in vollen Zügen.

    9/14/21Reply
     
    Map
  • Ägypten 2021
    Day6

    Leinen Los.. 🏝️🚢

     September 11 in Egypt ⋅ ☀️ 37 °C

    Vor de grosse Hitz gönd mier scho los und bsueched de Staudamm vo Assuan. Hinderem Staudamm gseht mer de Nassersee wo wägem Staudamm entstande isch. Üse dütschi Füerer verzellt üs, vo de entstehig und vom Bau vom Staudamm. Sitem Stausee sind vieli Nubiendörfer, tämple und Chile überschwämmt worde. Ägypte het die Dörfer umgsidle lah und wäg UNESCO sind einigi Temple und Chilene versetzt worde, damit sie witerhin erhalte blibed. So bsueched mier de Tempel von Philae wo ebefalls vor ca 40 Jahr versetzt worde isch. Unglaublich wie guet de Tempel erhalte isch, trotz ere Ziit woner unter Wasser verbracht het. D Wandzeichnige sind immerno guet sichtbar, es bar ibuchtige vo de Wälle gseht mer au, nur d Farb isch nümm erhalte blube.
    Nach dem wunderschöne Tempel gönd mier wiiter zumne Antike Steibruch, wo früener us de Rosegranit diversi Obeliske und Statue gmacht worde sind.

    Gäge Mittag fahred mier zrugg zu üsem Schiff und planged uf s Losfahrt. Mit ca 35min Verspätig fahred mier am 15:05 los. Ufe Sunneuntergang chömed mier i Kom Omboh ah und besichtiged de Doppeltempel vo Kom Omboh und es Krokodil Museum. Früener het s Krokodil i dem Ort als Heilig gulte und so gsend mir einigi Mumifizierti Krokodil i dem Museum. Nachem Sunneundergang fahred mir gäg die 19:00Uhr witer richtig Edfu um det d Nacht z verbringe.    Read more

    See translation
     
    Map
  • Ägypten 2021
    Day5

    Welcome to Assuan 🛳️

     September 10 in Egypt ⋅ ☀️ 40 °C

    So es feins z Morge wie im Mövenpick Hotel hend mier scho lang nümm gha. Immerhin hend mir scho zimmlich gschnell de Kaffe becho... nur leider ischer dasmal nid fein gsi 😅. Nachem Uschecke wärded mier zu üsem Nile Cruise Schiff gfahre d "blue Shadow II". Üse dütschi guide warted hie scho uf üs und erklährt üs s schiff. S erste zmittag an Bord isch OK gsi und so verzichted mier au schön brav, wie üs Kuoni gseit het, uf Salat und ungschälts Gmües. Üsi Kabine isch chli, gmüetlich und erfüllt ihre zwäck. Nachere Siesta gads los zu nem Nubien Dorf. Mier fahred ei Stund ufem Motorböötli und gsend det scho unglaublich villi schöni Landschafte. Im Dorf acho, gönd mir uf en Tee zunere Familie, und gsend det sogar iri Hustier (die arme Krokodil 😯). Grad bi Sunneuntergang fahred mier wider los zrugg id Stadt und laifed no chli dur d Gasse vo Assuan. Nach dem schöne Usflug, sind mier froh wider zrugg bi üse Schiff z sii und gniessed de Abig ufem Boot.Read more

    See translation
     
    Map
  • Ägypten 2021
    Day4

    Old Kairo 🕌⛪

     September 9 in Egypt ⋅ ☀️ 36 °C

    Mier started de Tag mitmene Zmorge ohni Kaffe (üse Service isch nid de best 😔). Üsi Tagestour wird wider begleited vom Ahmed und em Fahrer José. Mir fahred los und nämed üsi Koffer grad mit. Zerst lueged mier d Moschee the Citadel of Salah-el-dim vom Mohamed Ali ah (nid de Boxer) . De Ahmed erklährt üs die wichtigste Sache über de islamischi Glaube und wie s Gebät gad. Nach de Moschee gads witer id Altstatt vo Kairo und so besichtiged mier zwei Katholischi Chile und aschliessend en Synagoge vom Judetum. De Ahmed lad üs au det, vo sim grosse Wüsse teilha und stellt sich immerwieder als super Fotograf use. Nach dem gads zum berüemte khan el Khali Bazar, wo mir im 150Jahr alte Coffeehouse en Türkische Kaffee gniessed.

    Ungfäh uf die 16:00Uhr wärded mier a Flughafe gfahre und wärded det wider vom Mamdouh in Empfang gno. E chli Skeptisch gäbed mier üses Gepäck wider i de Gepäckufgab ab und so checked mier, mit guet packtem Handgepack (wo alles dinne wär für alli fäll) i Flüger richtig Asswan ih. Nach dem 1,5h Flug wärded mier am Flughafe wider vomne Herr mit Schild Abgholt (und dasmal sogar mit Koffere) . De Verkehr stellt sich hie als chli ruhiger use als in Kairo, defür reded üse Begleiter einiges meh. Nachere asträngende fahrt chömed mier bim Hotel in Asswan ah. Mier wärded mitem Boot uf üses Hotelinseli übere gfahred und sogar mitem Golfchäreli bis vor s Hotel begleited. Mier verbringed en wunderschöne Abig i dem tolle Hotel und gniessed am Abig no die warme windige Temperature vo 37°C in Asswan.    Read more

    See translation
     
    Map
  • Ägypten 2021
    Day3

    Sonne, Sand, Kamel 🌞🏜️🐫

     September 8 in Egypt ⋅ ☀️ 38 °C

    Am Morge wached mier uf, mid ussicht uf d Pyramide. Chli Improvisiert mit üsne chleider gads los mit üsere erste Tagestour. Hüt begleited üs de Ahmed, wo sogar dütsch reded, und üse Fahrer José. Mir started i de Alte Stadt in Memphis und lueged die risig Skulptur vom Ramses II ah. Mier lerned sogar scho die erste Buechstabe vo de Hieroglyphe z läse. Wiiter gads nah uf Sakkara zu de bekannte Stuffepyramide Pyramide Djoser und Unas. Id Pyramide Unas gönd mier sogar dur en schmale Wäg id Grabchammere, wos unglaublichi Wandmalereie hed. No meh farbigi Wandmalereie (sogar nach 4000 Jahr isch d Farb no dra) und en Opfergabekalender gsend mir imne Tämpel näbedra.

    Nachmene chline Zwüschestop bimne Beduin wo Parfume und Heilöl sälber härstellt gads au scho wiiter zu de Pyramide vo Gizeh (Cheops-Pyramide, Chephren-Pyramide und Mykerinos-Pyramide). Mitmene Kamelritt chömed mier zumne schöne Ussichtsplatz zum es bar föteli z mache. Mier laifed vo de Chephren Pyramide zu de Cheops Pyramide übere und länged ganz vill Pyramidestei ah um d gschicht vo 4000 Jahr z erläbe (wie de Ahmed allig seid). Als letsts gids nurno en churze Zwüschestop bi de Sphynx will üs langsam d Hitz e chli zuesetzt. Nachem Zmittag gids no en zwischebsuech imne Papyruslade (dasmal chli professioneller als gester) und scho gads wider zrugg i üses Hotel.
    Freudig wärded mier vo üsem Gepäck erwarted, und mir sind glücklich, dass üses Gepäck vollständig und ganz acho isch. So gniessed mier de Abig am Pool (sogar in eigete Flipflops und Strandchleider) und lueged dasmal es bitzli Gschider zu de Pyramide ufe... 🤗    Read more

    See translation
    Mariann Odermatt

    👍🏻 etz chend d Feriä richtig losgah! 😁

    9/8/21Reply
     
    Map
  • Ägypten 2021
    Day2

    Der Tag zum Entspannen

     September 7 in Egypt ⋅ ☀️ 34 °C

    Nach nur bar Stunde schlaf isch scho wider Morge. Nachem Zmorge und em gang dur d Souveniershops, gmerked mier das üses Hotel gar nid vill sache verkauft (halt nur souveniers) . Sie bieted üs aber ah, mitmene Taxi gschwind id Stadt z fahre, das mir üs es bar Chleider chönd chaufe. Üse Taxifahrer gseht das nid so wichtig, und so machemer no en Touristestop im ne Papyrusshop. Bitzli gnärft und churzi ziit speter fahrt üs üses Taxi doch no zumne Chleiderlade, und so findemer wenigstens es Badhösli füre Mario und bizli ersatzchleider und Kopftüecher. Zrugg im Hotel warted au üses eigentliche Zimmer uf üs. Das wo mier üs gwünst hend mit Pyramide blick. 🏜️😍
    Über Whatsapp chated mier mit üsem nätte Reisefüehrer wo witerhin im Kontakt mit üsem Gepäck staht, det erfahred mier dases leider nümm hüt Abig gschickt wird. Schad 🙌
    Trotzdem lönd mier de schöni Abig binnere Rundi Skipo und mene Drink i de Hotelbar la usklinge. 🍻😊    Read more

    See translation
     
    Map

Join us:

FindPenguins for iOSFindPenguins for Android

  • 2021© FindPenguins
  • Home
  • About Us
  • Blog
  • Group tracking
  • Press
  • Terms
  • Privacy Policy & Cookies
  • Support
  • Imprint
  • English