Joined July 2021 Message
  • Day322

    Whitsunday Island 💍

    June 22 in Australia ⋅ ☀️ 21 °C

    Vo Shute Harbour semmer met erere chline Fähri nach Whitsunday Island gfahre, wo mer drü Täg lang d’Insle i erere volle Pracht hend dörfe gnüsse. ✨

    De Camping esch ganz chli ond familiär xii ond mer hend s’Zelt direkt am weltbekannte Whitehaven Beach gha. De Strand esch ganzi 7 Kilometer lang, de Sand esch wisser als wiiss ond s’Wasser esch uh mega klar ond schimmeret hellblau bis türkis, je nach Sonnestand. Es absoluts Paradies, vor allem au wills zu eusem Erstuune wörkli nome wenig Lüüt gha het. 🏝

    Jede Tag semmer vo eusem Camping die 7km em Strand entlang spaziert uf de Suechi nachem “Swirl”: Bi Ebbe vermischt sich de wissi Sand mitem wenige, türkise Wasser ond das xeht eifach bombastisch uus! 🤩 Eigentlich erreicht mer die Lookouts nome meteme Boot, bi Ebbe aber glangt mer halb schwömmend/halb laufend ebefalls of die anderi Siite ond chan so die wunderschöni Ussicht au ohni en Tour müesse z’bueche gnüsse. 🥳

    De Ort werd för emmer ganz en spezielle Platz i eusem Herze ha & mer hoffed, dass mer ergendwenn weder do hii chönd zrogg cho. 💞
    Read more

  • Day315

    Magnetic Island 🐨

    June 15 in Australia ⋅ ☀️ 22 °C

    Vor de Küste vo Townsville liit d’Magnetic Island: Es chlises Paradies! ✨

    Mer send met de Autofähri öbere ond hend bide bekannte Horseshoe Bay ufem Koala Bay Camping euses Zelt ufgstellt. En unglaublich tolle Ort zum schlofe, wells ständig raschlet ond ergendwo weder es Wallaby usem Gebüsch springt ond jede Morge semmer pünktlich vo de velle ond relativ luute Kakadus gweckt worde. 🤭

    Mer hend d’Insle vor allem z’Fuess erkundet, uf herzige Wanderweg über Stock ond Stei. Eis vo eusne Highlight send die wilde Koalas xii. 🐨 Emmer mol weder het mer eine ufem Eukalyptus-Baum obe xeh fresse oder pfuuse. D’Koalabäre send früehner ufem Festland weg ihrem wasserdichte Fell gjagt worde - Tierschützer hend Angst gha, dass mer sie usrotted ond hend drum 20 Exemplar uf de Magnetic Island usgwilderet. Sie hend sich uf Ahieb wohl gfühlt ond d’Population esch bis höt of rund 800 Koalas agwachse. 🥳

    För eus gohts nach dere super schöne Ziit wiiter an Airlie Beach, vo wo us mer ines paar Täg d’Whitsundays werdet bsueche. Mer send gspannt ond freued eus riesig! 🙌🏼
    Read more

  • Day308

    Daintree Rainforest 🌿

    June 8 in Australia ⋅ ⛅ 25 °C

    Im tropische Norde vo Queensland liit de Daintree Rainforest. Er esch de grössti Regewald vo Australie ond de ältisti Regewald vo de Welt (meh als 135 Millione Johr alt).

    D‘Dichti vom Regewald ond s‘intensive Grüen hend eus wedermol extrem beidruckt! Mer send vell go wandere, hend onterwegs die schöne Ussichte gnosse ond send zwöschedure imne natürliche Pool en Abchüehlig go neh. 💦

    Ned nome eus hets gfalle, wie de Regewald of d‘Küste trifft - au d‘Krokodil 🐊 findet das zimmli lässig! Öberall bide Stränd hets drum au Warntafele ond s’heisst mer sell ned z’nöch as Wasser. Natürli semmer d‘Krokodil go sueche, hend aber leider keis gfonde.

    Gege Schluss hets denn nome no gregnet, so hemmer s‘Zelt zämepackt ond reised jetzt langsam d‘Ostküste durab. 🚙
    Read more

    Ginger Travelbird

    hey, so toll! wo sind ehr go Bade?

    Corinne Wiederkehr

    Mason‘s Hole, Mossman Gorge & Josephine Falls 💦😉

    Ginger Travelbird

    🐨😍

    3 more comments
     
  • Day305

    The Great Barrier Reef 🦈

    June 5 ⋅ ⛅ 25 °C

    Nach zirka 4 Stond flüüge semmer am Samstig Morge früeh guuet in Cairns acho. Do mer s‘Mietauto erst ab em Mäntig reserviert hend, semmer die erste zwei Nächt ines Hostel go schlofe ond hend so guet Ziit gha eus Cairns azluege - es Städtli met Charme! ☺️

    S‘weltbekannte Great Barrier Reef esch vo Cairns us sehr guet z‘erreiche ond mer hend eus grad för am Sonntig en Usflug metem Katamaran buechet. Mer send en ganze Tag lang ofem Meer unterwegs xii ond hend drü verschiedni Riff/Ort bsuecht. De Andrin esch go schnorchle ond d‘Corinne go tauche. 🤿

    Nach dem Tag semmer beidi extrem beidruckt ond aber au „erliechteret“ xii! 😅 Mer send mittlerwile doch a einige Ort jetzt scho xii go tauche ond no vell öfters go schnorchle - ond zu oft hend d‘Riff eifach „tot“ gwirkt, s‘het nömme glebt ond mer het dütlich xeh, was mer (jo au mer zwei!) eusem Planet atüend… Wenn mer also nach somene Tag dörf usem Wasser cho ond mer het wedermol farbigi Koralle ond Schuele vo Fisch erlebt, denn eschs eifach es schöns Erlebnis! 🤩 Ond mer xeht, dass die Teil wo gschützt werdet, au wörkli weder ufblüehet ond das schenkt extrem Hoffnig!

    Gnüssed d‘Bilder & gaaanz liebi Grüess! 😘
    Mer hend ide Zwüscheziit s‘Mietauto abgholt ond verbringed die nächste paar Täg im Regewald. Nach so vell Trockeheit ond rotem Stei ade Westküste, wirkt das Grüen im Oste sehr erfrüschend. 🌳

    PS: Thanks Dave for the pictures! 📸
    Read more

    Gina Saner

    Es ist einfach wunderbar,sigue disfrutando😍

    Corinne Wiederkehr

    💜💜

    Marliese Megner

    Es freut mich, dass Ihr so schöne Unterwassererlebnisse habt.

    2 more comments
     
  • Day296

    Karijini National Park 🦅

    May 27 in Australia ⋅ ☀️ 22 °C

    Vo Exmouth velli velli Kilometer is Landesinneri liit de Karijini National Park. Mer hend eus lang öberleit, eb sich de wiitii Weg au wörkli lohnt…

    …rückblickend chömmer säge, dass es sich definitiv glohnt het! ☺️ D’Abglegeheit, d’Eifachheit ohni Luxus, kei Empfang, kei Trinkwasser, kei Strom, kei Duschene - mer merkt wedermol, wie wenig mer eigentlich brucht zum glücklich sii! 🥰

    Am beste gfalle het eus d’Schlucht (Gorge) ide Hamersley Region - de Ursprung vom Nationalpark ond en bedütigsvolle Ort för die iheimisch Bevölkerig. Nebst de Gorges hemmer s’schöne Wetter, d’Abchüehlige ide natürliche Pools, d’Dingoes (wie sie einem ums Zelt schliched & id Nacht ie hüüled), de stark lüchtendi Sternehimmel ond d’Ziit zu zweit gnosse. 💞

    Jetzt gohts ab zrogg nach Perth, wo mer denn no es paar Täg Ziit hend, bevor euses Abentüür im Oste vom Land wiitergoht. 🥳
    Read more

    Marianne Wiederkehr

    DAS gseht ja „magic“ us eues Plätzli. Wiiter gnussvolli und schöni Ziit in Australie🤗💕💕

    5/28/22Reply
    Ginger Travelbird

    he, wo gönd ehr em Oste vo Australie ane?

    5/29/22Reply
    Rilana Perl

    😍😍

    5/30/22Reply
    4 more comments
     
  • Day291

    Ningaloo Reef 🐠🐙🦈🐡

    May 22 in Australia ⋅ ⛅ 24 °C

    Vo Coral Bay bis Exmouth befindet sich s‘Ningaloo Reef - s‘Great Barrier Reef vom Weste. Mit 260km eschs eis vode grösste Koralleriff vo de Welt. Jedes Johr werd s‘Riff vo Walhaie, Mantaroche, Buckelwale, verschiedne Haie, riesige Groupers (Zackenbarsch - siehe Foto), Schildchröt, unzähligi Fisch, ond ond ond… bsuecht. Mer hend d‘Ziit im Cape Range National Park drum vor allem zum Schnorchle & Tauche gnutzt. 🤿

    De Küste entlang findet mer ein wunderschöne Sandstrand am andere & WEST IS BEST for sunsets! Mer hends extrem gnosse ond wäred gern no bitz länger blibe. ☀️
    Read more

    Marliese Megner

    Definitiv bessere Sicht beim Tauchen als auf Galapagos :-)

    5/30/22Reply
     
  • Day286

    Coral Coast Part II 🐬🐬

    May 17 in Australia ⋅ ☀️ 23 °C

    Chlii wiiter doruf de Westküste entlang liit de Kalbarri National Park. De Murchison River het sich über Millione vo Johr en Weg durch de roti Sandstei „grabet“ - was die spezielli Schichtig erst zum Vorschii brocht het. Au iidrücklich send die steile Klippe ond d‘Sonneuntergäng xii. 🌅

    Nach zwei Nächt im Kalbarri semmer denn wiiter gfahre bis Denham und hend höt vo do us en Usflug nach Monkey Mia ad Shark Bay gmacht. Es absoluts Highlight! 🤩 D‘Shark Bay esch entgege im Name nämli ned bekannt för Haie, sondern för Delfine ond die xeht mer so reeechtig nöch, well sie gern im seichte Gwässer tüend fresse. So xeht mer de ganzi Tag emmer wedermol es Grüppli verbii schwömme - ond wenn mer denn, so wie mer zwei, i dem Moment grad am bade esch, denn schwömmeds neugierig wies send ganz nöch a einem verbii. Es unglaublichs Erlebnis wo mer nie meh werdet vergesse! 🥰
    Read more

    Ginger Travelbird

    es esch alles so "ozzie-live"! Es chunt mer alles so vertraut vor. dAustralier läbed ächt sbescht läbe uf de wält.... gnüssens!🐨🦘

    5/17/22Reply
    Claudia Barbagallo

    😲😍😍

    5/17/22Reply
    Emmanuelle Meyer

    Oh wunderschön😍

    5/18/22Reply
    5 more comments
     
  • Day283

    Coral Coast Part I 🐨

    May 14 in Australia ⋅ ☀️ 20 °C

    Vo Esperance semmer velli velli Kilometer weder zrogg nach Perth ond es Stückli dra verbii. Ofem Weg hemmer in Hyden en Halt gmacht, zum Mol en richtigi Welle surfe: The Wave Rock! 😉

    De Westküste entlang duruf findet mer ein Nationalpark am andere ond im Yanchep National Park hemmer denn au eusi erste Koalas xeh. Sehr herzig, wie sie entweder pfuused oder denn am Eukalyptus fresse send - ond ab ond zue bim Fresse weder ischlofed! ☺️ Generell hets eus do sehr gfalle, well de chlini Camping jede Tag vo Kängurus bsuecht werd. Bem Zmorge - nach de erste Regenacht öberhaupt - hemmer sie rechtig lang chönne beobachte ond gnüsse.

    In Lancelin bide Sanddüne hätted mer eus churz en 4x4 gwönscht, das hätti secher no meh Spass gmacht als Spaziere! 🥳 Nach de Düne semmer ab id Wüesti, mit 100‘000ige Kalksteizipfle, bevor mer denn weder en Stop igleigt hend bim Hutt Lagoon, oder au de Pink Lake gnennt.

    Ond no es grosses DANKE a alli wo gester a mich denkt. Als Abschluss vomne super Tag hemmer en rechtig schöne Sonneuntergang dörfe gnüsse! De schönsti Moment esch xii, wo en Delfin usem goldige Wasser uftaucht esch. Eifach WOW! 🤩
    Read more

    Marianne Wiederkehr

    Soooo spannend😍 - und schööön die Wälle👌vo de Natur!

    5/15/22Reply
    Marianne Wiederkehr

    😍😍😍

    5/15/22Reply
    Marianne Wiederkehr

    Magisch schöni Bilder fanged ihr iii👌🍀💖!!

    5/15/22Reply
    10 more comments
     
  • Day279

    All Around Esperance ✨

    May 10 in Australia ⋅ ☀️ 25 °C

    Zirka 8 Stond vo Perth entfernt liit Esperance. En chline Ort met mehrere Nationalparks und unzählige Traumstränd, wie usem Katalog! 🤩

    Am bekanntiste esch wohl d‘Lucky Bay im Cape Le Grand Nationalpark. En wiitläufige, wisse Sandtrand mit soooo klarem Wasser, dasses vo hellblau bis türkis schimmeret! Ond s‘Best: Es hüpft immer mol weder es Känguru am Strand verbii. So süess! 🥰 Aber au alli andere Stränd send im gliche Stil ond eine schöner als de anderi. Plus: Es het fast keini Lüüt, das heisst mer het de Strand au emmer mol weder för sich alleige. Es chlises Paradies! 🏝

    Interessant esch för eus xii, dass es do s‘Hobby „4WDing“ git. D‘Australier liebeds, met ihrem Auto direkt an Strand z’fahre (oder au em Strand entlang z’fahre). Natürli hemmer das denn met eusem Auto (keine 4WD!) au mol müesse usprobiere! 🤣

    Ab morn gohts för eus via Hyden weder zrogg uf Perth ond vo dete denn d‘Westküste wiiter doruf.
    Read more

    Theres Miotti

    De wisi Sand unglaublich wunder schön

    5/13/22Reply
    Gabi Miotti

    🤣🤣hoffe es klappet ohni stecke bliibe 🤣

    5/14/22Reply
    Gabi Miotti

    eifach emmer herrlich euchi bilder und de bricht dezue so dörf mer au chli a dene herrliche ort debi sii...eifach schöööön gnüsseds witerhin 😍😘

    5/14/22Reply
    Corinne Wiederkehr

    Danke Gabi, freut mer dass der Spass macht eus z‘folge. 😘

    5/15/22Reply
    Lisa Delshad

    😍😍😍

    5/28/22Reply
     
  • Day274

    The Golden Outback 🍂🦘

    May 5 in Australia ⋅ ☀️ 18 °C

    Vor 3 Täg hemmer euses Mietauto abgholt ond send denn zerst Mol go shoppe. Do mer die nächste Woche weder met Zelt werdet unterwegs sii, hemmer eus en bequemeri Matraze, Campingstüehl ond en Chüehlbox kauft. Top usgrüstet hemmer denn am gliche Tag no euse ROADTRIP chönne starte. 🚙

    Die ersti Ziit semmer südlich vo Perth unterwegs ond werdet eus de Südweste ond s‘Golden Outback gnauer aaluege. Mer merkt, dass es doch langsam herbstelet: D’Natur lüüchtet rot, orange, gelb 🍂 ond ide Nacht werds scho zimmli chalt; tagsüber aber hemmers bis jetzt zom Glöck no super schön ond au warm gha! ☀️

    Ond yessss, en chline Traum esch wohr worde ond mer hend scho ganz velli Kängurus xeh! Velli vo wiitem, aber am Meelup Beach au ganz nöch ond mer hend sie eeewigs chönne beobachte, bis sie denn ergendwenn devoo ghüpft send (Video). 🦘🦘🦘

    Nebst de Kängurus hemmer höt au no riesigi Stingrays xeh. Of de Suechi nach Nahrig schwömmed sie ganz nöch am Strand - ond sie sind gwundrig ond chömed go luege, wer sie do beobachtet. Es einzigartigs Erlebnis ond extrem iidrücklich!

    Ebefalls idrücklich send d‘Welle do. Leider vell z’gross för eus zom surfe, aber perfekt för d‘Profis - ond so hemmer de beste SurferInne vode Welt am Margaret River Pro 2022 Contest (Teil vode Weltmeisterschaft) chönne zueluege ond hend eifach nome gstuunet!
    Read more

    Antoinette Wiederkehr

    jööööö

    5/6/22Reply
    Marliese Megner

    Hallo Ihre Zwei, sagenhaft, was Ihr alles erlebt! Eure Bilder und Berichte sind immer so schön! Viele tollt Erlebnisse weiterhin. Viele Grüße von Marliese (Galapagos)

    5/7/22Reply
    Gabi Miotti

    😱 da chont öpis woww

    5/14/22Reply
    Lisa Delshad

    😍

    5/28/22Reply
     

Join us:

FindPenguins for iOSFindPenguins for Android