El Calafate

Hött esch Abreisetag ond somet de letschti Tag be üsne Hosts. Noch ere chorze Nacht hemmer üs no liecht verkateret troffe, zom no paar Ässware för Patagonie (buy north, bring south heissts öberall) chaufe, nochhär semmer i Glacelade Rapanui, wo sowohl em Dani sini Hosts, sowie au d'Gloria de Jasi empfohle hend. Chli Glace ged doch es schöns Abgschiedsgschänk (hed üs d'Roxana gseit). Met je emene 1 kg-Chöbel Glace semmer nomol hei zom fertig packe ond Adé säge. D'Jasi hed no Glace gässe met de Gloria, bevor de Dani verbii cho esch ond mer zäme a Floghafe send.
Üs esch zwor bewosst gsi, dass wägem Carneval es langs WE bevorstohd (Sa-Di), dass de Floghafe drom so voll chönnt sii, hemmer ned dänkt. Zom Glöck semmer so früeh dete gsi ond so hed üs s'eistündige Astoh för s'Check-in ned so gstresst. V.a. ned, wo sech denn usegstellt hed, dass de Flog 1 h Verspötig hed.
Wo mer in El Calafate acho send, eschs Obig am nüüni gsi, met em (tüüre) Taxi semmer i d'Stadt gfahre ond hend im Hostel e leider chalti Duschi gnoh.

Am nöchschte Morge hemmer usgschlofe, send is Touricenter, zom denn ohni allzu vel wiitere Infos chli im Ort omezschlendere. Mer send zuefällig bemene chliine Themepark verbii cho, wos paar Infos zo de Erkondigsgschecht vo Patagonie gäh hed ond au es Infozenter zom Perito Moreno-Gletscher, wo mer aber erscht öbermorn gönd go bsueche. Wiiter eschs a See gange, wo sech d'Jasi ab de ongwohnte "Weidehaltig" vo de hiesige Ross gwonderet hed. Ofem Röckwäg semmer no go iichaufe ond hend üs Ravioli zom z'Nacht gmacht.

Am Mäntig hemmer welle go Velo fahre. De Dani hed online e Routebeschrieb gfonde, wo no guet tönt hed, leider hemmer vo dem Plan mösse abröcke, wo mer feschtgstellt hend, dass di eint Strosse, wo de Grossteil vom Trail darstellt, als Privatstrosse kennzeichnet gsi esch. Zom üs im Fall vom Verwötschtwärde ned mösse of Spanisch erkläre (ond au, wel starche Wend + Chiesstross kei agnähmi Kombi esch), semmer also stattdesse abe a See ond send ofere schöne Velospur gäg de starch Wend om d'Bucht gfahre ond hend det Mettagspause gmacht. Met em Velo semmer schnell weder of de andere Siite vo de Bucht gsi ond send is Naturschotzgebiet Laguna Nimez, wo mer paar Vögel gseh hend, leider kei Flamingos.
Mer hend weder sälber welle z'Nacht choche ond hend üs för Spaghetti met Rahmsauche entschede. Leider esch s'Salz i de Hostelchochi ufbruucht gsi ond i üsere Verzwiiflig hemmer de halt met Sojasauce gwörzt... Mässig fein gsi, d'Duschi emmer no chalt.

Am Tsiischtig eschs zom Perito Moreno Gletscher gange. Im Bus esch weder döst worde, obwohl mer gnueg gschlofe hend ond d'Landschaft eigentlech schön gsi wär. Wohrschiinlech hemmer das no so vo Asie här denne, dass im Bus gschlofe werd :)
Chorz vor Akonft heds afo rägne ond mer hend scho chli Angscht becho, dass mer i üsem Blog (😉) nor verrägneti Fotene vo dem Gletscher chönd poste, aber die Beförchtig hed sech denn zäme met de Rägewolche verzoge. D'Ussecht ofe Gletscher esch met jedem Schrett besser worde, s'Wätter au. Vo verschedne Ussechtsplattforme chamer de Gletscher guet bestuune, mer hend mehrmols sogar s'Glöck gha, em Gletscher chönne bem "Chalbe" zuezluege.
"Sonderbari Chueh, dä Gletscher" ond "Zom Glöck bruuchts mech be dem Chalbere ned" hed sech d'Jasi dänkt. Am halbi drüü semmer met em Car weder zrogg of El Calafate brocht worde, wo mer nomol iigchauft hend (u.a. Bouillon), v.a. för d'Reis morn, wo mer i Süde of Puerto Natales in Chile fahred.En savoir plus