wir sind dann mal weg

Ich mache hüt en Usritt ufe ‚Old man‘s Range‘ und an Puponga Beach. Um di 3 Stund ritte, chli am Strand, über Hügel und Wiese und dur Buschland. Yeah!
Well ich kei Erfahrig mit ritte ha, hani de Scooby, es chliwüchsigs Ross becho, wo anschinend chli Komplexe het. D‘Frau het gmeint er sig wie eine vo de müehsame Patiente, wo allbot mues go rauche und nie ume sigi, wemmer ne brucht... I müesi ehm zeige, wer de Boss sigi, sösch wördi er di ganzi Ziit Gras frässe und mache was er welli. Er heigi scho Lüt zum brüehle brocht. Zudem sigi er mängisch fis zu de andere Ross🙄. Oookey, noch dere Asag beni ned wörklech entspannter gsi - aber... d‘Useforderigspatiente hani ame gern gha - los gohts!
Noch de erste Kurve beni di Hinderst gsi und alles Atribe mit ginge het chum öpis brocht. I ha zwar met de Ziit chli ufgholt gha, aber bi de froh gsi, wo de zwoiti Gruppebegleiter mit sim Ross noche cho esch und so mim lahme Ross vo hinde chli Dampf gmacht het😅. De Ritt esch witer recht guet verlaufe und i ha de Scooby au ned schlecht gfüehrt. Dur das, dass emmer weder gseit worde esch, dass er chli ‚grumpy‘ sigi, het niemer vo de andere Ritter z‘nöch bi ehm welle si😁. Nebem Scooby kontrolliere, hani di schöni Landschaft um eus ume mega gnosse!
S‘Beste esch aber gsi, wenn mer galoppiert send. Denn het sogar de Scooby chönne Gas geh🥳!
De Dävu het bem Stall mega lieb uf me gwartet und nochdem dassi meh mit Öpfel bem Scooby bedankt han, esches im Auto südwärts gange.Leggi altro