Portugal

Euse letschti Tag in Lissabon hät chli durchzoge gstartet. 🫣
Gestert hämmer eigentlich nur wele es Velo miete. Nach langem hi und her hämmer eus entschide es Velo über "Gira" z miete. Das segi praktisch und unkompliziert... so vill zu dä Theorie. D App spinni amel chli, sind d Bewärtige, aber suscht für Touristen am eifachstä. Na guet, easy mir händ ja kein Stress, also simmer a sonen Velo-Abstellplatz.
Nach gfühlte 1000x neu starte und amälde häts eifach nöd wele klappe. Dä Nico hät irgendwänn mal äs Velo gschafft z miete aber bi mir isches eifach nöd gange. Ich, inzwüsche steihässig über die scheiss App, ha mini letschtä Nerve verbrucht. Irgendwänn hämmer mal gluegt öbi chan über "Uber" es Velo miete, wills mer eifach nach über 45min z dumm worde isch. Uber hät gestert uf dä Heifahrt no funktioniert, also söttis keis Problem si. Zägg Velo agwählt, druff ghockt und los... oder au nöd! Das doofe Velo hät blockiert. Was isch jetzt los?! Mini Geduld ächt am ändi. Uf eimal chunnt ä Nachricht vo Uber das mini Kreditcharte nöd funktioniert. Hä?!
Lange Rede, kurzer Sinn: mir sind verarscht worde! 🤬
Gira oder ä Fake-Version hät mir 300.- belastet und zum Glück hät s Sicherheitssystem vo dä Kreditcharte das gmerkt und sie grad gesperrt. Toll... isch ja guet passiert das, aber irgend ä Nachricht siitens Kreditcharte wär ja no hilfrich gsi, dänn hetted mer eus vill Ziit und Nervä gsparrt. 🤦🏼‍♀️ Äs Telefonat mit äm Kreditcharte-Heini später und mini Charte isch gsperrt und ich ha nomal Glück gha. So en Mist ächt! Naja shit happens, mir wänd glich go Velo fahre. Bim Nico schiint alles in Ordning z sii also hämmer sis Velo gno und ich han über Uber eis wele miete. Da aber au det mini Kreditcharte hinterleit isch gaht das nöd. 🙈 Keis Problem, dä Nico hät ja eini, also schnäll sini hinterleit und los! Ändlich! 😅
Am Abig isch dänn es SMS cho vom Sicherheitssystem, nomal es Telefon id Schwiiz, offebar häts det au en Wurm drin gha. Super, jetzt isch aber alles klärt!
Hüt morge hani eifach keis guets Gfühl gha und am Nico grate schnäll bi sinnäre Kreditchartefirma azlüte öb alles i.O. isch. Sicher isch sicher. Und was meined er? Au bi ihm häts doch tatsächlich 300.- reserviert! Unglaublich!
So än scheiss! Zum Glück hämmer alles au bi ihm chönne kläre. Aber, au sini Kreditcharte isch jetzt gsperrt! Super 😅🙈
Zum Glück gits ja no anderi Wäg zum a Gäld cho, aber unnötig isch das ganze scho!
Mir händ ursprünglich mal dä QR-Code vo dem Velo-Vermieter a sonnere Info-Süüle gscannt gha. Luut mim Kreditcharte-Heini segi das jetzt dä Neust, das so QR-Code gfälscht werdet, sogenannts "phishing" (übrigens au vermehrt i dä Schwiiz) und mer dänn halt dadurch die falsch App hät.
Tja wie au immer, mir händ grad nomal Glück gha und sind i Zuekunft sicher vorsichtiger!!

Uf dä Schreck abe, hämmer eus än feine Brunch gönnt!! 😜😋Leer más