S o

Joined February 2016
  • Day57

    Na biz anderi Themä

    November 2, 2018 in Romania ⋅ ☁️ 18 °C

    Das wemmer auna festhalte und mir sind gspanne obs ines paar Jahr/Jahrzänt scho ganz andersch isch...

    Di allgemein Arbetsmoral isch sehr gedige, Effiziänz hemmer nani gross erlebt :) und hauptsach alles i de Finke/Crocs mache und di einte am beste i de Trainerhose :) Am Friitig wachsts Gras au nid schneller isch ois gseit worde. Und am Sunntig id Disco isch normal, Mentig isch eh doof ;)

    D Strass teilt me sich mit Fuessgänger, Velofahrer, Kutsche (Esel/Ross/Ochse) Traktore, Chüe, Schäf, Geisse, Gäns, Hüener, Truthän, Chatze und Hünd :) Trotzdemm fahreds mit 100 dur d Dörfer.. uff.
    Es wird au na viel Autostopp gmacht, wil de ÖV so selte fahrt.

    Rumänie het a vielne Ort en unverkennbare Duft i de Luft, und zwar wird überall Laub, gmischt mit sus na War/Abfall, verbrennt/vermottet.
    De Abfall müends wie mir eigentli zalle. Wil mer da aber schiinbar nideso müe het demit, das di ganz Landschaft und d Gwässer vermüllt sind, kippt me die War eifach in Wald/Fluss/See oder direkt hinders Huus an Abhang ane. Nidmal d Gmeindsmitarbeiter nehmeds zämme, sondern mäied eifach drüber mitem Fademäier.
    Die wo de Müll denn doch echli stört, zünded en aa. Schlachtabfäll werded hinders Huus/in Wald kippt, was Zabig es riese Gebäll vo striitende Hünd mit sich bringt.

    Hünd ghöred natürli au zum normale Strassebild. Die einte gsehnd besser uus, di andere weniger - mit brochnem Bei, abgmageret, Huutchrankete... vieli au Tot uf de Strass... Sie ernähred sich hauptsächlich vo Abfall, wovos da ja riichlich git. Die Hungrige Vierbeiner ässed alles was chli ässbar schmöckt, also au d Plastikseck. Di einte sterbed dra, bi de Andere wo glück hend chunnts denn wider hinne use - so gseht me oftmals Hundehüfe mit Plastikwar drinn...
    Wemme id Gärte luegt, gseht me oft au Hünd, die meiste annere Chettä (Isechettä um de Hals wo sich zemmezieh chönd, damits de Hals au schön verletzt/abschürgt). Bi dene Chettähünd gseht me amig de Radius wos chönd laufe, so zwüschet 30cm - 3m, det hets nämmli kei Gras meh.

    Die Vierbeiner sind es grosses Thema bi de Lüt wo sich einigermasse Gedanke mached. Es git viel Organisatione wo d Hünd gratis würed Kastriere. Bi de Strassehünd gaht das ja, s Problem sind aber au d Hundebsitzer. Bi vielne stosst me uf taubi Ohre wenns drumm gaht z Kastriere. (Es wer aber Gsetz, das wemme en Hund het, de muen Kastriert und gimpft sie.) Me machts lieber so, das me all 6 Mon wos Jungi git, die uf d Strass/id Mülltonne rüert...
    D Tunde het sonen Fall mal de Polizei gmäldet - sie isch nur uusglachet/belächlet worde. Dä mitem Gsetz duresetze chamme bis anhin vergässe. D "Lösig" vo de Regierig isch Strassehünd z fange, i Tierheim/Töstigsstatione bringe und nachere Frist vo 14 Tag (nid adoptiert worde) abmurgse. Und zwar so wies dene Lüt denn gad passd.
    Read more

  • Explore, what other travelers do in:
  • Day55

    camping panorama

    October 31, 2018 in Romania ⋅ 🌙 11 °C

    Mal en Camping mit supper wiitsicht. Uund es het na anderi Lüt da - en düdsche Sozialarbeiter mit Fründin und Pflägchind. Au de Bsitzer reded düdsch, wil er us Holland chunnt unds det schiinbar scho chli glernt het. D Duschene sind herrlich! Heiss Wasser und keis einzigs Fiichli i de ganze sanitäre Aalag! :) Mir bliibed gad 2 Nächt. Am zweite Tag hemmer na e Wanderig gmacht, begleitet vom Campinghündli und zwei Strassehünd. D Cuni muen na a de (Lange)Leine bliibe und macht das aber suuper :)
    De Rückweg isch recht Aastrengend gsii, mir zwei Baumnüssli hend de Weg widermal nid gfunde und sind Querwaldein de Hoger duruuf durs Laub... Mit oisne Handys/GPS hemmer denn de Heiweg dochna gfunde :)
    Read more

  • Day54

    Bärepark

    October 30, 2018 in Romania ⋅ ⛅ 12 °C

    Mir sind bis zu demm Naturschutzgebiet/Park gfahre, eigentli hettis au en Camping und weri recht Touristisch da obe... Aber jez im Herbst isch natürli alles zue :) Also hemmer da ufem Parkplatz pfuuset uund scho bald isch en Gwunderfiz cho am Auto schnuppere!! Im Dunkle hemmer e Bäregstalt erkennt, nid allzu gross, drumm gömmer devo uus, dases en Schwarzbär gsii isch!!! Soo coool!!
    Oises stille Hündli hets glaub garnid gmerkt und nüt degliiche tah, sones Pflaatsch :)

    Am nächste Morge hemmer na en Spaziergang zum Seeli gmascht und dunne zwei Strassehünd aatroffe. Ufem Weg zrugg zum Auto simmer denn also z foifte gsii, die Zwei hend ois bis is Dorf begleitet und uf Fueter ghofft. Mir bliibed trotzdem starch und gebed ihne nüt... ;)
    Read more

  • Day54

    Bsüechli

    October 30, 2018 in Romania ⋅ 🌙 12 °C

    Am Domi sin ehemalige Arbetskolleg (Farkas) chunnt vo da, sini Eltere wohned natürli na z Rumänie. Drumm hemmer sie derfe ga bsueche :) Die hend ois ganz härzlich empfange und gaanz viel feini Sache kochet und uuftischet. Fasch alles usem eigene Garte. Cholwickel, Pilztätschli, Schnitzeli, Suppe, Lammhacktätschli, Zakuska (Peperoni-Paprika-BohneMues oder so :) ) uind ganz feini Öpfelschnittli. Dezue na huusgmachte Wii. mmmh!
    Denn simmer na am Fsrkas sis Huus ga aaluege wo no im bou isch. Gseht aber scho sehr schön uus! De Spaziergang det ane isch echli aastrengend gsii für d Cuni und ois -mir hend dummerwiis nur di churz Leine gha mitgnah und s het uu viel Hünd gha und au viel Weg de Strass entlang. Uff.

    Wider zrugg hemmer sie is Auto gsteckt zum echli abefahre :) und denn hemmer au scho bald wiiter müesse - am Samstig söttemer Rumänie verlah wegem Gsundheitszügnis vo de Cuni.
    Was mer leider nid gwüsst hend isch das "Bsuech" in Rumänie schiinbar öpper 2 Übernachtige beinhaltet... So hemmer ois ganz fesch müesse entschuldige und disskutiere zum denn wiiter fahre...
    Read more

  • Day53

    Widermal es schöns Högerli gfunde

    October 29, 2018 in Romania ⋅ ⛅ 17 °C

    Geg de Mittag hemmer ois eimal meh und leider ez definitiv für die Reis vom Janos und de Clary müesse verabschiede.
    !! Übrigens!! : wen öpper mal en "Work away" job suecht derf me sich gern bi ihne mälde. Es paar Stund ufem Hof/Camping etc hälfe für Chost und Logie (seeehr guets Ässe und gueti Gspröch <3 )

    Denn rasch ga Poste inkl. eme grosse Sack Hundefueter - das isch s Einzig wo ois gad in Sinn cho isch womme de Tunde chennti bringe...
    Denn ab zu de Tunde, d Cuni ga tschüss sege und mir ga d "Quittig" entgegeneh. Us demm isch denn eimal meh es guets Ässe und langi Gspröch worde. Am Schluss het d Tunde ois na es ganzes Rako Chistli voll Sache mitgeh wo si gfunde het das chenntemer auna bruuche. :) Danke!

    E Stund spöter simmer denn da ufeme Högerli aachoo.
    Ez hemmer ois gad gfröget wie spat dases isch und ob mer scho is Bett "derfed" s isch ja scho sit ere Stund stockdunkel... ehm ja, s isch 19.30... ;)
    Read more

  • Day51

    Zrugg bim Janos und de Clary

    October 27, 2018 in Romania ⋅ ⛅ 16 °C

    Ufem Weg simmer namal bi de Tunde verbii, chli go plaudere. Sie het ois na Tipps geh und muen mit de Cuni ihrem Pass namal zum Tierarzt, damits en Stempel git, dass de Hund gsund segi für die baldigi Uusreis us Rumänie. Also machemer uf de Mentig namal ab, zum alles Papierzügs z übergeh etc.

    Jez simmer zrugg ufem Camping und per Zuefall isch d Rita, d Tochter vo dene beidne au da! Dank ihre hemmer d Tunde kenneglernt :) Es isch en lässige Abig wommer all mitenand ässed und plaudered.

    Und jez hani mer endli wider chli Ziit gnoh zum de Blog aktualisiere, juhuu, finitoo! :) jez isch Fuulänze aagseit.
    Read more

  • Day50

    Sarmizegetusa

    October 26, 2018 in Romania ⋅ ☀️ 12 °C

    Ufeme Camping, s isch chli schmutzig da... E toti Muus im WC und es Grillefiich i de Duschi nebst allne andere Spinne und Insekte. Ich Taufe s Grillefiich Fred, das machts chli weniger schlimm zumen jedesmal gseh wemmer ufs Klo gaht ;)Mir entscheided morn wider zum Janos und de Clary z gah, bis min Mage wider fit isch.Read more

  • Day49

    Transalpina

    October 25, 2018 in Romania ⋅ ☀️ 2 °C

    So, ändlich machemer d Transalpina. Am Aafang vo de Strass hets zwar uf de einte Strassesiite sones Iseteil gha mitere runde Tafle wo ine wiiss isch und usse en rote chreis het... aber die ander siite isch ja frei gsii, de chamme sicher durefahre. Ich versueche zämme z fasse:

    Schöni Landschaft, chli Schnee, meeh Schnee, nomeh schnee... Schneechette montiere, schneechette verlüüre, Hoger ufe, Hoger abe, cherä isch hüt kei Option meh, glück ha das e Passage es bizli pflüegt isch, hoffe das mer dur en halbe meter Schnee dure chömed, fürelaufe und luege wie schlimms na wird, zwiifle, wiiter mache, durecho! froie, aber nid z fesch, s isch nani gschafft, Kurve um Kurve, Teer isch z gseh, es chliises Auto chunnt entgege, gschafft!!
    Da mueni schoni vermerke, das de Hund völlig entspannt und lauschend im Auto ghöcklet isch! Sie het de ultimativ Bergfahrtest mit bravur bestande :)
    Read more

Never miss updates of S o with our app:

FindPenguins for iOS FindPenguins for Android