47 - 48: Matopos Nationalpark

Mer händ ehn wunderschöne Tag ih de Umgäbig vom Matopos Nationalpark verbrocht. Mer sind de ganzi Tag mit ehmene sehr liebe Guide wo ehn mega schöni erzähl-Stimm hed unterwägs gsii und händ so viel verschiednigi Sache gseh.

Am Morge simmer im Park sälber umegloffe und händ Nashörner gsuecht. Mer sind denn au mega nöch ah die Tier häre cho und es esch beidruckend gsii sie z beobachte. Zuesätzlich simmer informiert worde wie bedroht d Nashörner sind und was mer nach de Meinig vo üsem Guide mösst mache zum sie schütze.

Denn simmer zum Zmittagsplatz gfahre wo üs Salat und Brot und chli Ufschnitt zur Verfüegig gstande sind :). Nach ehm Mittag simmer zu ehnere Höhli ufe gloffe wo mer Malereie vo de Buschlüüt gfonde hed. Üse Guide hed üs det au öber sini Begägnig mit dene Mänsche, wo bis Höt ih dere trochnige und läbensunfründliche Umgäbig läbed, verzellt.

Ganz am Schluss simmer de zu ehmene Ussichtspunkt gfahre und gloffe zum de Sunneuntergang luege. Begleited vo no meh Gschichte und ehmene chalte Bier esch das de perfekti Abschluss vo ehmene wunderschöne Tag gsii.Leer más