Averglades National Park

Am 9:15 bini im Hostel abgholt worde, zum chönne mitem Car in Averglades Nationalpark gah. D Fahrt isch öbe 1h 15min gange.
Nach 30min warte, hend mir chönne eh Präsentation go luäge, wo eine öbis über Alligatore verzellt het und en andere es ah de Tier zeiget het. Zum Glück het ers überlebt…
Mir hend nach dere Präsi no chönne anderi Tier im Gheg ahluäge, wie Baby Alligatore, en Albino Alligator, Waschbäre, en Fuchs, riise Schildchrote und eh Schlange. Ganz ehrlich, sind zwar herzig zum ahluäge, aber die Tier hends ned schön det inne. Viel z wenig Platz.
Mer het au chönne es Bild miteme Baby Gator mache, wo es zueklebets Muul gha het & das han ich bi Gott ned welle unterstütze.💔
Ich und mini Gruppe sind denn ufes Boot gsesse und sind dur d Averglades gfahre. Das isch sooo cool gsii, mega schön zum ahluäge & vorallem mega krass, dass mer Alligatore im Wasser gseh hend!🐊

Ich han hüt au vieles glernt, sie z.B.
- dass Alligatore s chräftigste Gebiss vo de ganze Tierwelt hend
- dass sie eigentlich gar ned grüän sondern schwarz sind, obwohl das überall falsch zeiget wird, z.B wenns zeichnet werdet oder wie z.B. das Emoji🐊 oder wie ufem Bild (eigentlich ischs offesichtlich, wenn mers ahluägt, aber ich han nie drüber nahdenkt haha)
- dass sie alles essed, was ihne vor d Schnauze fallt (Vögel, Schlange, Fisch oder im Notfall au Artgenosse). Sie chönd aber au Tage, Wuche oder sogar Monate lang nüt esse.

Nach dem ufregende Trip, bin ich öbis go esse und in Park gsesse.
Ich bin denn no los is Macys go Schueh für in Usgang poste. Ich chan nämmlich ned mit mine Strandlaatsche oder mit flache Schueh in Club…🥲 (staht so im Dresscode)
Uf jedefall han ich mir denn wunderhübschi Schueh kauft & 2-3 anderi Sächeli.
Ich han eigentli denn welle ih sone Bar gah, wo mir empfohle worde isch, aber iwie bini denn mit de zwei Jungs vo mim Zimmer am Strand glandet, wo mer Wii trunke hend.Read more