• Day55

    Reservat, Indisch und de Abschied

    October 25 in Argentina ⋅ ☁️ 23 °C

    A eusem letste Tag simmer nachere guete Mengi schlaf ines Natur Reservat wo praktisch ide Stadt isch. Dete hets vil interessanti Pflanze, Vögel und sogar Reptilien. Det simmer denn flisig spaziert und hend Föteli gmacht (D Simona, ich nur vom riesige Reptilieviech). Nacher simmer no id Bodega des Cervezas zum paar Bier chauffe als Mitbringsel für dihei. D Simona hett gfunde da chamer shoppe bis zum umfallen (Sie isch wortwörtlich umgheit, kei sorg nur es uftätschts chnü). Und den hemmer denkt zum Abschied gömmer doch entli na i das Indisch/Südamerikanische Fusion Resti. Det acho, Warteziit: 1.5h 😂 Janu, mer hend euse Name uf d Liste gsetzt und sind ide Bar Cervelar (Ja, mindestens 10 wortspil mit Cervelat minersits sind gfalle "denne isch s Bier nöd wurscht" usw.) es ganz laaangsams Bier go trinke (Ide bar hends kei priise agschribe, will weg Inflation alles so schnell änderet, das es gar Sinn macht die ahzrschriibe). Und nacher hemmer denn entli en Platz gha (am 10i am abig) im Resti. S warte hett sich glohnt, so öppis speziells hani fasch na noe gesse, mir hend 5 verschiedeni Sache probiert und die sind alli mega gsi, vorallem ihres Labne und ihres Dosa sind abattig guet gsi. Und das wärs dänn gsi mit Buenos Aires.

    Am nögste Morge simmer an Flughafe gfahre und jetzt hocki gad im Flüger und chume bald in Madrid ah. Argentinie isch echt sehr cool gsi, ich wird mini ziit da nie vergesse.
    Read more

  • Day54

    Gaucho, Friedhof und Stranges Bier

    October 24 in Argentina ⋅ ⛅ 27 °C

    Am Sunntig simmer abgholt worde zum ufe Estancia (e Farm) gah, wommer esse werdet und au bitz über die Argentinische Cowboys lerne und au gseh chönd. Mir sind pünktlich abgholt worde. Leider hets den nacher ewig duret zum die letsti lüt vode Tour abhole. Euse Guide isch eher Old School aber ganz OK gsi. Eigentlich hettemer ufem weg na sölle en Stop ime Dorf mache und es Muesum go aluege. Da sich aber alls verspöted hett, hett euse Guide gfunde: Jaaa im Dorf isch es fäscht und mir wäred eh nume 10min dete gsi (Lut Kommentare vo anderne Gäst online wärs aber über e Stund gsi) drum wenn ihr zuestimmed gömmer direkt uf Ranch. Da so natürlich all Lüüt zuegstumme hend, hend mir den für ihri langsame Abholige zahlt, i dem mer nöd becho händ was eigentlich abote worde isch. Anyway, uf de Farm acho isches mega cool gsi. Sie hend eus gad esse und Apero bracht (alles inklusive) und denn hemmer chöne uf de Farm umeluege, mit de Hünd spile usw. Isch richtig entspannend gsi. Und den hets es typisches Argentinisches Asado geh. Also öppe 5kg Fleisch pro Person. Mega fein aber zviel. Mir hend eus mega guet mit 2 Amerikaner us San Francisco verstande, und mit ihne über Veganer glästeret 😂 (Mir hend aber alle zuegstumme das generell zvil Fleisch gässe wird). Nacher hets na e Pferdeflüsterer Show geh, isch zimmli Krass wie guet die Viecher dressiert sind. S beste isch gsi das de eint Hund vo dem Farm eifach scho vorde Show nebed Ross ahfange het die gliche Tricks mache. E Hündin namens Rena, mir hetted sie am liebste mitgna. Nach de Show simmer denn wieder heigfahre worde. Für die letst strecki hends eus mit dem Amis zvierte ines mini Taxi quetscht, das isch ihri idee vo Transfer gsi. Dihei acho hemmer nix meh gässe, 5KG fleisch hend glanget.

    Am Mäntig simmer den us eusem Airbnb uszoge. Mir hend für die letste 2 Täg eus na es 5 Stern Hotel buecht, was au bitter nötig gsi isch. S andere Apartment isch e Katastrophe gsi (S Wc und S Brünneli hend grünnt, s Bett isch steihert gsi usw, merked eu: Südamerika = Hotels, Airbnb isches nöd wet). Im Alvaer Art Hotel acho hemmer eusi Sache abglade und sind in El Ataneo Grand Splendid Bookshop. Das isch en Buechlade wo inere ehemalige Opere isch. Fantastisch zum aluege, Büecher sind leider all uf Spanisch. Mir hend den eusi 2 Amerikaner vode Estancia per zuefall dete troffe. Die hend empfohle uf de Fridhof in Recoleta zgah, de seg mega iidrücklich. Das mag jetzt echli makaber töne, aber de Friedhof isch mega bekannt und zimmli beliebt bi touris. Er isch wükli mega speziell, es isch wie e Stadt us Mausoleum. Einige sind mega prachtvoll, und anderi eifach krass abgfuckt, schibe igschlage und teilwiis sogar d Särg fasch offe usw. D Simona häts nöd so guet gfunde bi de abgfuckte, ich han e Challenge gstartet s creepiest Grab vom Friedhof zfinde 😂 (Ich has gfunde, wie useme Horrorfilm ). Nacher simmer churz ine Iichaufszentrum go lädele und denn go Pasta esse. Und denn hemmer den entlich chönne is Hotel iichecke. Bi eus wärs keis 5 Stern, aber s Bett isch genial ! Am Abig hemmer denn natürli wiedermal e Beer Tour buecht. De Frank euse Guide isch en Ami gsi. Mir sind die einzige 2 Gäst gsi, aber er hett na öpper mitbracht, de Jackson wo in Zuekunft au söll Guide werde. Er hett scho gwüsst das mir au Guides sind, also mir hend eher zäme Bierled als e Tour gmacht. Mir hend s gfühl gha ihn, de Frank, hets au bitzli agschisse, zumindest am Ahfang. Es hend au vil Sach zuegha, das Mentig gsi isch. Mir sind zerrsch is Charlone Brewpub, det hemer so zimmli all Bier probiert, sind zimmli guet gsi für es chlises Brewpub. Und nacher simmer id Strange Brewing, und dete ische meeega volle gsi. Und nachdem mer paar Bier probiert hend hemmer au gwüsst wieso, die sind eifach Bombe gsi. Mir hend denn mit de beidne Amis über gott und die Welt gredet und ich han no e Fläsche Suurbier offeriert am Endi. Alles in allem isches sehr witzig gsi, eusi Tour isch trotzdem vil besser😂 Nur als Beispiel D Simona hett d Frank bim eine Bier (sis Lieblingsstout) gfrlgt öbs Kaffi i dem heg, und er so: nei nei das isch nur vom Malz. Uf de Dose staht aber es isch mit Kolumbianischem Kaffi braut. Anyway, ab nach hause is Bett.
    Read more

  • Day52

    Bagels, Beef und Bier

    October 22 in Argentina ⋅ ⛅ 14 °C

    Am nögste Morge simmer go Bagels ässe (Ihr erinneret eu villicht dasmer in Montreal vil über d Herkunft vo dene glernt händ). In Buenos Aires gits au sehr grossi Jüdischi community, drum ghöred Bagel au zu ihrne typische zmorge. Die bim Sheikob's Bagels sind mega gsi. Nacher simmer mitem Uber is Museum of Latin American Art gfahre. Das isch es eher chlises aber iidrücklichs Museum. Ich bin ja nöd sooo de Kunstfan, aber ich hans da echt cool gfunde. Nacheme churze Mittags oder besser Namitagsschlaf simer den für en Apero in Valk Taproom. Das isch e sehr spezielli Beer Bar gsi, da s Personal eher so uusgseh hett als würdets ade Langstrass inere Szenebar schaffe. S Bier isch mega gsi und sie au mega fründlich. Und nacher simer ines Resti wo eus de Matthias damals in Salmon Arm empfohle hett. Im Fògon Asado chmer nur mit Reservierig go ässe. Es fangt am 19.45 ah und all essed gliichzitig, es gitt 5 Gäng (plus mehreri Überraschigsgäng wiemer spöter usegfunde händ) mit Wii begleitig. Alles wird direkt vor de Auge kochet und präsentiert, immer mit erchlärig vode Chöch. Ihr gsend ja s Menü und Bilder vom esse, isch es uuuuunglaublich guet gsi. Nur scho für das Restaurant lohnts sich nach Buenos Aires z flüge. Mir sind denn sehr guet gfüllt hei und direkt go verdaue (aka Schlafe).

    Am Samstig simmer nacheme zmorge im Airbnb richtig San Telmo gfahre (en witere Stadteil, die Stadt isch eifach zgross). Dete simmer den spaziert und hend echli glädelet, am Namitag hemer e Tour im El Zanjon buecht. Mir hend 300 verschiedeni Alfajores kauft (e typischi Süssigkeit vo da, Dulce de Leche, Schoggi....genial). Mir hend den na churz welle eis go trinke womer per zuefall ame Markt verbi gloffe sind, drum hemmdr euse zmittag gad det ane verschobe, Empanadas mit Morcilla und Chorizo und dezue es local craft beer, genial. Nacher simer is El Zanjon, das isch es alts Gebäude womer per zuefall im Chäller es Tunnelsystem entdeckt hett. Es git en mega guete iiblick wied lüüt da früehner gläbt händ, und vorallem gits es Tunnelsystem, ich mein wie cool isch das 😂 Eusi Guide ische au mega guet gsi, mer hett richtig gmerkt das ihre das mega wichtig isch. Nachde Tour hemmer den eigentli ines Indisch/Südamerikanisches Fusion Resti in Palermo (euse Stadtteil) welle go ässe. Da das namig offe gha hett simmer den na zerrsch im Bronson Brewing Taproom und den na im Desarmadero eis go trinke. Die hend s cooli Bier gha, und allgemein sinds eifach mega nice gsi, dass mer eus entschide hend au grad da z esse. Und segemers mal so, s Bier isch da de Star, nöd s Ässe😂 Empandas mit Oxtail sind aber nice gsi, mis Argentinische Schnitzelbrot (Milanesa, au sehr typisch da) isch eher mässig guet gsi, Schnitzelbrot mached mir ide Schwiz aso besseri. Uf jedefall iaches en mega lustige abig gsi, vorallem d Bier vode Brauereie Itzel und Strange Brewing aind überraged guet gsi. Ich han den no e spezielli Fläsche zum mitneh kauft, nachdem mir wiedermal mit Sprachproblem kämpft hend😂
    Read more

  • Day50

    Buenos Aires, butze und Bargeld

    October 20 in Argentina ⋅ ☁️ 21 °C

    Am Morge früeh am 6.30 hettemer eigentlich sölle abgholt werde für an Flughafe. Tja, mer sind da aber in Südamerika, es isch also eher 7.15 gsi (D Simona isch scho panisch im Hotel näbedra go fröge öb sie eus es Taxi rüefe chönd). Am Flughafe acho isch alles guet gange, usser dasmer über e Stund agstande sind für Gepäckabgabe, da sie für de ganz Flüger ein Schalter offe gha hend. De Flug mit de weltbekannte JetSmart Airline isch dänn eigentlich ganz oke und ohni Zwüschefäll verloffe. In Buenos Aires simmer denn direkt i euses Airbnb wo eus d Vermieterin persönlich empfange hett. D Emmy isch e Dame ide 50ger und hett anschinend scho über 50 Länder bereist. Zum Znacht hemmer denn Esse bstellt da mer zimli kaputt gsi sind (Choripan vom Chori, das sind praktisch Sandwich mit Wurst drin, Isch recht beliebt da). Euses Airbnb hett e mega location gha, aber leider isches susch nöd überragend gsi. Zitat Simona: D Emmy hett anstatt 50 Länder bereise vllt lieber mal ihri Wohnig butzt😂.

    Am Dunstig simmer denn am Morge zerrsch go Geld abhebe. Und das isch das so gange: mer sendet sich selber Geld via Western Union, und holts den dete als Cash ab. Mer kriegt so so zimmli de doppelt Kurs als wennmer mit Charte zahlt oder an Bankomat gaht. Das liit dra das die Argentinisch Wirtschaft am Arsch isch, und de offiziell Kurs eher es Wunschdenke vode Regierig isch. De Kurs womer da uf de Strass oder bi Western Union bechunnt isch de sogenannti Blue Dollar Kurs. Also wie gseit, als Tourist het mer da also praktisch alles zum halbe Priis. Nachdem mer den zwei riise hüffe Bargeld dete abgholt hend, simmer den zude Free Tour im Zentrum gange. De Martin isch en guete Guide gsi, und hett eus mega vil überd Gschicht vom Land verzellt. Es isch echt krass was da alles abgange isch und immerno abgahr (siehe ihri Wirrschaft und fasch 100% Inflation). Nacheme churze Bier simmer denn im nögst beste Ort e Pizza go ässe (Mösi, lueg ufem Föteli wied Pizzeria gheisse hät 😂) und den hei, eus hett die Tour gad es bitz schockiert.
    Read more

  • Day47

    Gletscher, Galaxie und Gipfeli

    October 17 in Argentina ⋅ ☁️ 16 °C

    Am nögste Morge hett d Simona es gschäftlichs Gspröch gha am Mittag. Nacher simer go brunche im "PANtagonia", super Name für e Bäckerei (soo schlecht)😂 Gipfeli mir Dulce De Leche sind mega gsi. Nacher hämmer müesse eusi Chleider wäsche drum hemmer es ziitli ime Waschsalom verbracht. Am Abig simmer denn zume spezielle Event abgholt worde, e Astrotour. Mir sind uf e Farm, go Znacht esse (s schlechtischte Esse uf de ganze Reis, de Linseiitopf hett nach Aschebächer gschmöck) und denn hemmer en chline Vortrag über Planete und Sterne gha. Denn simer veruse wo eus de Guide mitem.Laser am Himmel erchlärt hett welli Sterne und Planete dasmer gsehnd, mer hend sie au dur zwei verschiedeni Teleskop chönne aluege. Isch echt cool gsi, damer da ide südliche Hemisphere ja anderi Sache gseht als bi eus. Leider isch s Wetter e bitz zu bewölkt gsi. Sie hend den na paar cooli Föteli gmacht und denn simmer um Mitternacht wieder dihei gsi.

    De Zistig isch den au scho wieder euse letsti Tag in El Calafate gsi. Mir sind den zude warschindli spektakulärschte Sehenswürdigkeit ide Gegend gfahre: de Perito Moreno Gletscher. Mer hetted den ufes Boot sölle und nöch zum Gletscher fahre. Nach 5 minute hends denn das Boot wieder umdreiht und gseit mir müessed ines anders. Anschinend isches kaputt gsi. Mir hend eus den entschiede lieber z spaziere. Und das isch mega gsi, es git ganzi Trails womer mega nöch an Gletscher chan lauffe. Mer hett regelrecht chöne zuluege wie Teil vom Gletscher abbreched, was echt spektakulär gsi isch. Weniger spektakulär sind die lüüt gsi wo applaudieret und gjubelt hend wenn das passiert isch😅 Nach vil Stägelauffe simmer denn sehr kaputt zrugg in Bus und hei. Znacht hemmer den im "La Zorra" taproom gesse, richtig guets Bier und gueti Burger.

    Das wärs au scho wieder gsi vo El Calafate und Patagonie. Wasi no ha welle erwähne isch die unglaublichi Mengi a Strassehünd da, es isch echt krass und truurig was da los isch. D lüt kastrieret ihri Hünd nöd wills ihne ztüür isch. Und d Ergebniss vo dem streuned denn durd Strasse, und sind teilwiis recht aggressiv. I de Hauptsstrass laufsch nie ohni en Hund nebed dir ume. Villicht isches eifach vo eusem punkt dass z sege, aber da müesst mer de lüüt eifach erchläre was sie mached. Wenn kastriere z ztür isch sötmer villicht kein Hund ha, de choschted nemmli au.
    Read more

  • Day45

    Calafate, Chalten und Chill

    October 15 in Argentina ⋅ ⛅ 12 °C

    Mitem Bus hemmer denn d Grenze nach Argentinie überquert, was lustig gsi isch. De ganz Bus hett müesse uustige, eimal in Chile und denn nach 100m im Bus wieder in Argentinie. Bim aahstah uf de ARG siite simmer denn zemme miteme Strassehund ahgstande und hend mit de Grenzbeamtin probiert z kommuniziere, obwohl sie keis Wort Englisch gredet hett und s Wort "Airbnb" bi ihre au nüt usglöst hät. Am Endi het das denn aber zimli ok klappet. In El Calafate acho simmer i euses Airbnb und denn churz im Zentrum go iichaufe. Mir hend au na welle go Geld wechsle, im Exchange office hett de Dude aber gmeint er nimmt kei Chilenischi Pesos, aber mer chan im Restaurant nebedra wechsle. Ok, weird. Naja denn wechsle mer hald paar CHF. Nei nimmt er au nöd. Uf d Frag was nimmsch du denn: Euro und US Dollar 😂 Womer ihn dezent druff hiigwise hend das CHF meh Wert isch als die beide hett er gfunde: nei nei, das wott niemert. Comedy puur. Aber es wird na witziger, im Restaurant nebedra hemmer senn tatsächlich eusi Chilenische Pesos chönne wechsle, ime chline Büro obe. Mir hend lustigerwiis fast a dopplete a ARG Pesos becho als dass euses Geld wert gsi wer lut offiziellem Wechselkurs (S Geld isch echt gsi). Zum Thema Geld in ARG verzelli zumend spötere Ziitpunkt me.

    Am Tag druff simmer am Morge früeh abgholt worde zum mach El Chalten fahre, em Trekking Capital vo Argentinie. Es isch extrem witzig wie überrascht all lüt da sind wenmer kei Spanisch redet, als würd die Möglichkeit gar nöd existiere (d Toure sind all als zweisprachig uusgschribe). Umgeh vo wunderschöne Berge simmer denn uf en Viewpoint gwanderet. Nachdem mer auna en Wassefall sind go aluege hemmer 2h Freizeit gha und sind im Dorf es Bier go trinke und go spatziere. Nachdem mer wieser zrugg gsi sind simmer denn na im Patagonia Brewing go esse (richtig gueti Empanadas, a Bier iach au ok gsi).

    Am Sunntig hemmer den richtige Chill Tag gmacht, wasmer echt sit eme monet nüme gha hend. Am Abig simmer nur churz im Restaurant gad nebed eus go esse. Im "Morrison's" hemmer meeega fründliche Service gha. Ich han 2 Bier vome Lokale Brauer probiert wo i mega chline Menge braut und die sind echt guet gsi. Er isch sogar selber a de Bar ghockt😂 D Dessert isch au abartig guet gsi. Nacher simmer zrugg is Airbnb und go schlafe.
    Read more

  • Day43

    Puerto Natales, Schnee + National Park

    October 13 in Chile ⋅ ☁️ 10 °C

    Wiiter isches mitem Bus nach Puerto Natales gange, wieder e bitz nördlicher. Leider nöd wükli bessers wätter. Nachem ichecke im AirBnb hämmer zerrsch mal well go d lag uschecke, aber vorher simer mal in en chline Supermärt go Proviant iichauffe, da mer am nögste Tag in National Park gönd. Nachdem mer eusi Sache abglade händ simmer denn richtig Zentrum und mer sind fascht verfrore, trotz Chappe, Schal und lange Underhose. Mer sind dänn is La Finestre go ässe, es Italienisches Resti, mitere Überraschend krasse Bierliste. Speziell d Bier vode Bodega Ergo sind mega starch gsi, alls fassglageret oder Wii hybride. Mer hend eus wükli dur alles dureprobiert. Ich han den nacher no mitem Brauer Kontakt ufgno, er isch en ehemalige Wiiproduzent (erchlärt als die Grape Ales 😉). S Ässe isch au mega guet gsi übrigens (Gnocchi mit Lamm Ragout👌). Nacher simmer mitem einzige Uber vo Puerto Natales heigfahre 😂

    Am nögste Tag simmer denn vo de Tourfirma abgholt worde zum in Torres Del Paine National Park gah. Obwohls gheisse hett mir hend en zweisprachige Guide hett euse lieb Antonio öppe 5 Wörter uf Englisch kennt und jedes wiitere mit Google translate übersetzt. Anyway, de Park isch so unglaublich schön dasses eus nöd gstört hett. Zerrsch simmer ine Höhli womer überreschte vomene Milodon gfunde hätt (en 2 Meter, 1 Tonne schwere Vorfahre vom Fuultier). Und nacher simmer wiiter dur de Park gfahre und hend jensti schöni See, Berge und Wasserfäll geh. Es isch e unglaublich schöni Gägend. Es hett au mega viel Tier, mir hend Adler, Kondo, Flamingos und jenstes anderi Vögel gseh. Und au na viel Guanacos (e Mischig zwische Lama und Antilope) , Hase, Schaaf, Rösser und Chüe gseh (letzteri sind eher nöd Wildlebend gsi 😂). S einzige wo a de Tour chli gnervt hett isch das d Stopps eifach bitz z lang gsi sind. Sie hend eus am Morge am 7i abgholt und mer sind ersch am 9 am Abig wieder zrugg cho. Kaputt aber glücklich. Nachem znacht (Ich han es Guanaco stew gässe, han fasch müesse nach dem ich die Viecher gseh han) simmer denn hei gloffe (Der Uber Fahrer hett wohl scho gschlafe). Morn verlömer Chile au scho wieder und fahred mitem Bus wiiter nach El Calafate, Argentinie!
    Read more

  • Day41

    Punta Arenas, Pingus und Piär

    October 11 in Chile ⋅ 🌬 7 °C

    Am Mäntig isches den. Wieder mal ab an Flughafe gange. Next stop: Patagonie, genauer gseit Punta Arenas. De Flug isch super verloffe (mir händ eus nur gwunderet wieso das all Chilene im Flug Schachtlewiis Dunkin' Donuts mitnehmed). In Punta Arenas acho simmer denn erstmal fasch wegblase worde. Chalt und windig, Südamerika 😂 Es stimmt also definitiv wasmer über s Wätter da une seit (da une.... So wiit im Süde und Weg vo dihei bini echt nanie gsi. Im AirBnb acho hemmer eus denn au uf de weg gmacht go ässe im "La Luna". E mega cools resti wo eifach voll Chleber, Bierdeckel, Banknote usw. Gsi isch. Mir händ natürli en Beer Tour Chleber dete glah. Am Abig simmer früeh is Bett damer am nögste Tag nämmli uf Isla Magdalena gönd, det wohned 🐧(jetzt chönder eu s Klima da vorstelle, echt nöd wasmer denkt wemmer Südamerika ghört😂)

    Am 6.30 isch Tagwach gsi und mer sind ab zu de Tourfirma. Mir sind den zerrscht mitem Car zum Bier öppe 25km usserhalb vo Punt Arenas brscht wurde und den uf Schnellboot umgstige. De Guide hett sich müeh geh au uf Englisch zu verzelle, hett aber nöd immer klappt. 1h später simmer denn uf de Insle acho und das isch echt mega gsi. Soooooo viel Pinguin ide freie Wildbahn. Echt mega de hammer gsi. Nachem Rundgang uf de Insle simmer denn na zu de Nachberinsle wo Robbe und Seeloie wohned (und au ab und zue mal en Pinguin verbii luegt). Mer hend den ufs Dach vom Schiff chönne und hend die Viecher vo mega nöch gsi. Mega guet!

    Zrugg an Land simmer den is Zentrum gfahre worde und vo dete go zmittag im Estilo Magellanico, es guetes Rib Eye steak und e Scotch ale👌Nacher hemmer gschnelm müesse go iichauffe und denn chli go Schlaf nahole. Am abig simmer den im "Birra" go esse. Echt e cooli Craft Beer bar mitere feine Pizza. S Imperial Stout mit Chili isch 👌 gsi. So morn gahts scho wiiter, wieder chli in Norde nach Puerto Natales!
    Read more

  • Day38

    Italie, Viña del Mar und Valparaiso

    October 8 in Chile ⋅ 🌬 16 °C

    Am nögste Tag hemmer eus uufgmacht i eis vode coolste Viertel. Im Barrio Italia hets unglaublich cooli shops, bars und Restis. Mir hend paar exotischi (also da lokali) Frücht kauft und es Glace gässe. Da isches mega farbig und gmüetlich gsi. Nachdem eus die Chilenischi Früehligssunne chlinzerstört simmer ide Rubiks Restobar go ässe. Es hät en Art Iitopf mit Fleisch, Gmües, Rahm und Chäs geh, wommer mit Sauce ine Tortilla gwicklet het. Meeega guet. Die hend au fantastisches Bier gha, mis Session IPA vo de Jester Brewery isch mega gsi.

    Am Abig hämmer eus mit ere Kollegin vode Simona us ihrere Erasmus ziit und Ihrere Frau troffe. De Abig isch mega witzig gsi und mir hend mega vil über di Chilenischi Kultur vo echte locals erfahre. Und au dass sie nöd würdet i eusem Viertel wohne im Moment. Cool. Sie hend eus denn au hei gfahre (bis vord Huustür😂)

    Am nögste und letste Tag in Santiago hemmer e Tour buecht nach Valparaiso und Viña del Mar. 2 Städt am Meer. D Tour selber isch unglaublich schlecht gsi, und wiedermal eher e Verchaufaverahstaötig (stops mit "Tasting" und Zmittag esse ime übertürte Resti). Aber d Städt, vorallem Valparaiso sind fantastisch schön gsi. Negstmal gömmer nöd uf Santiago sondern uf Valparaiso. Am Abig simer nach grossem Stau denn dihei acho. Mir hend eus welle Esse bstelle was nöd klappt het, also hemmer eus selber HotDogs gmacht. Am nögste Tag gahts ab uf Patagonie!
    Read more

  • Day36

    Neue Kontinent, neui Kultur, neus Esse

    October 6 in Chile ⋅ ⛅ 22 °C

    Am Mittwuch hämmer dänn nüt gmacht usser Flüge. 4h nach Toronto und dänn 2h später wiitere 10h nach Santiago de Chile. 16h reise, und 10h nebedeme sehr breite Mitpassagier ufem Mittelsitz, Yey! Susch isch uf dere Reis eigentlich alls guet gange, kei verspötige oder ähnliches. Mir sind dänn am Dunstig in Santiago acho und händ eus vorab en Transfer buecht, da mer ghört händ das Touris im Taxi gern abzockt werdet am Flughafe und das mit Uber in Chile e bitz speziell isch (es existiert, aber sie chömed nöd gern an Flughafe da sie eher ime Graubereich legal sind und darum nöd sehr beliebt sind bide Taxifahrer). Plus simer au würkli zerstört gsi, drum wäri eusi Uufmerksamkeit warschindli nöd allzu gross gsi. Ufem weg hemmer gseh das d Stadt einiges schlimmer ugseh hett als uf Bilder und s au vili Homeless geh hett (Vancouver says hello), dadezue spööter meh. De Transfer isch super gsi, und so simmer dänn i eusem Airbnb acho, es isch im Viertel Bellavista gsi (Uusgangsviertel in Santiago, verzelli spöter meh). Im 2. Stock hät de Guille euse Gastgeber uf eus gwartet. S Apartment isch mega cool gsi, und de Guille hät eus au na vil cooli Tipps für Restaurant geh. Mir händ dänn au genau no eis vo dene um de Egge bsuecht zum Znacht zum den au bald go schlafe.

    Am nögste Tag hemmer denn nacheme churze Zmorge (Empanadas) es Uber gna zum is Museum of Human Rights zcho. Ja, Uber isch speziell, wie erwartet hett de typ kei Englisch chönne und sis Auto isch bitz abgfuckt gsi. Easy keis Thema, aber das er fasch en Bus crasht hät, zimli es Thema. Mir händs überlebt und sin im Museum acho (ab jetzt nurna Uber Black in Samtiago😂). Das isch mega spannend gsi, es gaht dete um d Opfer vode Ziit ide 70/80 wo Chile undere Diktatur glitte hett, vil lüüt sind verschwunde und vili hiigrichtet worde.

    Nachem Museum simmer uf e Free Walking Tour im Zentrum. De Carlos euse Guide hett eus den vil überd Gschicht verzellt, vorallem au über die letste Jahr. Die viele Homeless sind nemmli hauptsächlich lüüt us Venezuela wo ja inere grosse Krise steckt, und Chile isch I wenige Jahr krass gwachse ide Iiwohnerzahl. Deswege hets nöd gnueg wohnige und Jobs. Das hett im 2019 dezue geführt dases massivi Protest und Uuschritige geh hett. Die ganz Stadt isch komplett volle mit Graffiti, au Monument, Statue und Chilene (Kirchen, nöd d lüüt us Chile). Eus hend mehreri lüüt verzellt dass das vor 2 Jahr komplett andersch gsi isch. Chile isch eigentlich es sehr stabils Land gsi bis dete. Mir in Europa händ das aber nöd so mitbecho, hüt isch vorallem Santiago nüme so sicher, und vorallem Bellavista (wo mir wohned, super) isch als Epizentrum vode Protest nüme so sicher wie auscho. Mir händ eus aber usser paar komische Gestalte nie gross unsicher gfühlt.

    So nach de Tour simmer zerrsch mal en Apero im 'El honesto Mike" go neh, super Westcoast IPA vo Almeada. Am abig simmer im Peumayén go esse, es Resti wo Esse serviert wo vode Mapuche Kultur inspiriert isch (d Uuriiwohner vo Chile) dete hämer i 4 Gäng 20 mini Esse probiert wo fantastisch gsi sind. Nacher simmer in Bellavista no is Tamango Beer House, de Taproom vode Tamango Brebejas. Mega nice IPAs, hopburn und meeeega früsch. Ich bin mega überrascht gsi. Und danach gings ab ins Bett
    Read more

Join us:

FindPenguins for iOSFindPenguins for Android