Americas Trip

Nach eusere 5 stündige Zugfahrt simmer denn am spötere Namitag in Toronto acho. Villicht wüsseder das Toronto e bitz mini Hass-Stadt in Kanada isch, us verschiedene Gründ. Churz vor Akunft hett de ganz Zug (und alli andere ide Region Toronto) e Notfall Nachricht vode Kanadische Regierig ufs Natel becho. E Schüsserei ime Vorort, Täter isch bewaffnet und uf de Flucht. Danke Toronto, fangt ja wieder guet ah. Mit de U-Bahn hemmer den euses AirBnb erreicht und churz eusi Köffere abglade zum öppis go esse ide nöchi. S Indische esse womer gha hend isch mega guet aber viel zvil gsi (wie immer bim Inder). Zrugg im Airbnb hemmer eus denn serstemal richtig umeglueget und es isch e Katastrophe gsi. Dräckig, fremdi Haar und grad e Wuche vor eus hett öpper e Bewertig gschribe dass es Müüs ide wohnig gitt. Super, es isch denn au scho spaat gsi also hemmer niened andersch me ane chönne und hend müesse probiere dete schlafe. Danke namal Toronto.

Nachere sehr unruhige Nacht hemmer am nächste Morge de Support vo AirBnb kontaktiert, usversehe 2 mal, was sich den als Glück usegstellt hett. De ersti Typ hett nemli gfunde das segi nur es "chlises Problem mit de Suuberkeit" und mir müessed selber storniere und krieged nur 10% vom Pris vode erste Nacht zrugg, us goodwill😂 Die Dame im zweite Chat hett jedoch gfunde das Apartment gächi gar nöd und sie storniere sofort alles und gitt eus s Geld für alli restliche Nächt und no en Guetschii für e neus Apartment. Mir sind dänn also zerst mal ohni Unterkunft dagestande, und hend im Tim Hortons mit eusne Köffere es Heissi Schoggi trunke und en Cookie gässe. Schlussendlich hemmer e neus Airbnb gfunde und hend am spätere Namitag chönne ichecke. Bis dete hemmer eusi Köffere noimed abgeh und sind is Royal Ontario Museum. S Museum isch absolut eis vode beste woni je gseh han, gigantisch und mega guet gmacht. Es git sogar e Ustellig über "Fantastische Tierwesen" momentan, wo sie zeiged was für Tier d J.K. Rowling inspiriert hend bim schriibe. Zum Znacht simer is Byblos, dass isch es mega guets Restaurant und sogar relativ edel. Sie hend den en Teil vom Restaurant abgsperrt für es ziitli, anschinend isch irgend en Star go esse cho (momentan isch ebe s Toronto Film Festival, darum sind alli guete Unterkünft au so sack teuere). S Esse da isch fantastisch gsi, vorallem die türkische Teigtäsche sind öppis womer muess probiere. Im Neue AirBnb simmer den am abig icheckt, und für mich isches ganz OK. Es isch aber sehr Zentral und darum sehr luut, au ide Nacht. Aber immerhin viel besser als s letste (trotzdem würis nöd wiiter empfehle).

Am Mittwuch simmer denn mitem Flixbus (ja die gits au da, aber in schlecht) uf Niagara Falls gfahre. De Bus het uf de helfti vode Strecki ahfange pfiffe und de Fahrer hed ufem Highway ufem Pannestreife müesse ahalte. Eimal me, danke Toronto. Mir hends denn mit müeh und not und vil verspötig gschafft in Niagara Falls ahcho. Und da isches natürli mega schön gsi, ich bi ja schomal da gsi aber im Winter und im Rege und han praktisch nix gseh. Dasmal isch s Wettere perfekt gsi. Nacher simer zude Niagara Brewing Company zum alli ihri Bier probiere (nöd schlächt) und den ime super Amerikanische Resti go esse. Uf de Rückfahrt hemmer den en ganze Bus gha und sind pünktlich in Toronto acho trotz Stau. Mir sind denn direkt id Bar Volo, e mega cooli Craft Beer bar. S Esse dete (Crostini mit Tomate und e Panini mit Mortadella) und vorallem d Bieruswahl ("Lino" s Westcoast IPA und es Sour beer mit Yuzu 😍) sind meeeeega gsi. Det simmer denn bitzli verhöckled und denn via Uber zrugg is Airbnb. Bi gspanne was Toronto sust no uf Lager hett ide nögste 3 Täg zum eus s Läbe schwer mache.Read more