Florenz

Tag 2
Am Fritig simer am morga go jogga. Au do hemers gad mitra Sehenswürdigkeit verbunda, mit em „Piazzale Michelangelo“. Das isch de schönsti Ussichtspunkt über Florenz. Zum Glück simer früha morga los, wel d Hitz isch gega Nomittag den immer meh worda.
Noch em Jogga simer gmüetlich go zmörgala. Kurz vor em Mittag simer zum „Mercato Centrale“. Das isch an Überdachta oder besser gseid an Indoor Markt. Mit vielen frischem Gmües, Frücht, Fleisch, Fisch und vieles mehr. I lieba so Märkt, finda das amigs so spannend was es alles so git. Kauft hemer Frücht und Fleisch. Z Fleischabteil isch nüd für schwachi Nerva den es het diversi Innereia, wie z.B Kuttlana, Leber, Herz, Darm, Maga und hebend eu fest Gebärmuatter siehe Foto😵‍💫
Noch dem mier üsi Ikäuf is Hotel brocht hend simer ina Kunstusstellig. „Galleria degli Uffizi“ , das isch fast ein Muss in Florenz. Es isch eis vu da bedütensta Kunstmuseum der Welt. I. Dem Museum sind Kunstwerk vu Botticelli, Leonardo da Vinci und Michelangelo. Es isch alles in einzelna Rümlichkeita ufteilt. Dia einta Rüm hani super schön gfunda und anderi langwillig haha aber das bin halt i. Noch ca 1.30h simer den dura gsi. Und dussa den vu 36 Grad halbwegs erschlaga worda 🥵

Am Obig hemer üsi Koffera packt und sind no kli im Erinneriga am schwelga gsi. Es isch a wundervolli und spannendi Ziit gsi. Am schönsta für mi isch d Zweisamkeit mim Erol. Zema neui Ort entdecka und Erinneriga schaffa❤️Read more