Spare Day

Hüt isch euse Reserve-Tag gsi - der Tag hemmer eus frei ghalte gha, falls eusi Plän in de letschte paar Täg nid ufgange wäred und mer meh Zit hätted brucht. Doch abgseh vum Hike ufe Gunung Inerie womer wege vermeintlich schlechtem Wetter nid gmacht hend, sind all eusi Plän tiptop ufgange... doch so hemmer hüt plötzlich nüm recht gwüsst was mache!
Somit hemmer das gmacht, womer i dr Langwili so macht: lang usgschlafe (vu 9ni am Abig bis am viertel vor 7ni), wege nix gstritte und eus bis am Mittag usem Weg gange... doch bi dem herrliche Wetter hemmer eus denn doch nu ufgrafft und sind zunere Wanderig ufbroche.
Zerscht simmer de Hauptstrass entlang, halbwegs ufe Kelimutu, zu de Air Panas Kolorongo. Die heisse Quelle lieged zmitzt in de Riisfelder und hend en herrlich lauwarmi Temperatur, perfekt nachere liechte Wanderig. Nachdem mer dQuelle zerscht für eus gha hend, isch nu en Familie vu Maumere derzue cho - völlig schüch, wel sie nid sicher gsi sind öb sie als "Touriste" überhaupt derfed cho :)
Dernach simmer nu chli wiiter deruf und durch es Wanderwegli imne Boge uf Moni derab. Immer wieder hemmer schöni Chüeli gseh, da wird mer als Schwizer ganz niidisch :) Imene simple Cafe am Strasserand hemmer denn nu was gesse und zwei dütschi Touris, Tanja und David, troffe, wo eus vu ihne letschte 4 Mönet backpacke verzellt hend.
Nacheme Bintang bi eus im Hotel und emene churze Schläfli simmer wieder ganz eus selbst und hend der Reserve-Tag bimene Znacht mit Tanja und David usklinge la :)*Meer informatie