Satellite
  • Day89

    Now that's way better!

    July 16, 2018 in Fiji ⋅ ⛅ 24 °C

    Hüt het euse Fidschi-Ufenthalt en 180 Grad Chertwendi gnu! Agfange hets dermit, asmer zumene strahlend blaue Himmel ufgwacht sind - die dick Wulchedechi hets über Nacht verblase. Zudem hemmer hüt euses Auto überno: zum erschte Mal nach zwei Mönet umechauffiert werde, chemmer wieder selber Auto fahre! Zwar immernu Linksvercher, aber en riesige Underschied zu Sri Lanka oder Indonesie: kei TukTuks, kei Roller, all Spure nur einisch beleit... all paar hundert Meter gits Überholspure, alles isch suuber uf Englisch agschribe... fascht scho heimelig :)
    Vu Lautoka simmer uf Denarau gfahre, en Halbinsle vor Nadi, wo v.a. vu Luxustouriste bsuecht wird... und oh Wunder, da hemmer eus wieder pudelwohl gfühlt :) dHüser, Palme und Kanäl hend eus anen Mischig us Hawaii und Florida erinneret, am Hafe hets en paar gueti Surf Shops gha und zum Zmittag simmer zumene sehr authentische Italiener... uf das hemmer sitem MadeInItaly in Labuan Bajo planget! Fun Fact: für das Resti hemmer eus entschide, wel de Bsitzer wohl en schlechti Rezension uf TripAdvisor im Stolz verletzt het und er voller italienischer Insbrunst sis Menu und Chochwis verteidigt het :)
    Churz vor Sunneundergang hemmer eus ufe Weg richtig Süde gmacht, uf Sigatoka and Coral Coast. Nachem Reinfall im erste Hotel hemmer sehr ghofft, as szweite Hotel besser wird... aber sOutrigger Beach Resort het all üsi Erwartige übertroffe! Mier sind scho mal mimne luutstarche "Buuulaaaaaa" vum Portier empfange worde, denn het eus en Valet sAuto parkiert, a de Reception hemmer es Upgrade für es Superior Ocean View Room becho - und gniessed etz so Butler Service inkl. tägliche Champagner und Canapés :)
    Womer eus so sehr motiviert fürs Znacht parat gmacht hend, het de Sämy gmerkt aser sini einzige "vorzeigbare Restaurant-Schueh" (sprich: Turnschueh) im Auto gla het, wo etz irgendwo ufem wiitläufige Resort parkiert isch gsi. Als Alternative sind nur FlipFlops oder Bergschueh blibe... oder ebe die hüt kaufte Riff-Schueh :) gesagt, getan - kombiniert mit paar schwarze Socke hets zwar immernu sportlich, aber nach Martina ganz ok usgseh... aber dServiertochter im eher edle Resti het trotzdem zimli blöd gluegt :)
    Zum zweite Mal hüt hemmer en herrlichi Mahlzit gnosse: de Sämy mit "nur grad tsch-tsch" Thunfisch-Filet und dMartina mit SweetCorn-RedPepper-PersianFeta-Shallot-Risotto... derzue es guets Glas Rote... was fürne tolle Abschluss!*
    Read more