Nulstil søgning
NORWAY
  • Meri beim Reisen
  • Meri beim Reisen

NORWAY

U i go ufen ufen ufen immer höch u höcher ufen aber oben abe chumeni nümm.
(momou) Læs mere
FølgOversigtOversigtKalenderKalenderBillederBillederDelDelTræskoliste
OversigtKalenderBilleder
  • Meri beim ReisenNORWAYRejsende

    Lofoten 1. Tag

    18. marts 2023, Norge ⋅ ☁️ 1 °C

    Hütt hanis chli gmüetlech gno, ig bi afe chli kabutt vom geng Ungerwägssii 😅. Ig bi aber gliich äs Ründeli go springe. Derbii bini geng vor wunderschöne Natur abglänkt worde. Ig bi amne zuegfrornige See entlang gsecklät, wo gd vorem Hostel isch. Und es hett wider einisch sehr gluftet!

    S Hostel isch nice aber für mi Gschmack fasch ä chli zu stylish. Aber jo, wenigschtens hettsech mou öbber Müeh gäh, äs schöns Hostel zmache. Und ig muess zuegäh äs inspiriert mi ou chli für töu Elemänt deheime umzsetzä (dr Ascht mitder Liechterchötti fingeni sehe hübsch 😊).

    Und itze no d Gschicht zum letschtä Föteli... Ig weiss, äs isch definitiv unvortöuhaft, aber ig hätt jo ou vüu lieber die zwöi Öuche gfötelet, wo uf dr angere Siite vor Kamera keni 50 m vor mir si übers Strössli si glüffe !! Tja, dr Büudschirm isch so dunku gsii und aues drum ume so häu, dassi überhoupt nid ha gseh, dassi no d Rückkamera iigstöut ha und gar nid d Öuche fötele 😅 (übrigens no d Iistellig vom Füumli, wo ou ufeglade isch). Die Öuche si plötzlech eifach wie usem nüt cho. Und si si ächt riisig gsii!! Ig bi wie versteineret dört gstange. Si hei mi gar nid beachtet (bi no froh gsii). Und wo dr erscht isch düre gsii, isch tatsächlech no ä zwöite hingernoche cho. D Lofote heisech ih däm Momänt für mi no gad einisch toppet!    Læs mere

    Se oversættelse
  • Meri beim ReisenNORWAYRejsende

    Lofoten 2. Tag

    19. marts 2023, Norge ⋅ ☁️ -1 °C

    Dr Radu, eine vom Hostel, hettmi hütt mitem Outo mitgno und bimne Strand abgsetzt. Es isch sehr schön gsii, aber ou würk chaut und es hett rächt gluftet 🥶. D Sunne hett hütt offebar nid so Luscht gha uf d Wäut und drum hettmese nume säute mou gseh düredrücke. Ig ha aber trotzdäm mini Spiegureflexkamera füregno und probiert aues Liecht woni verwütsche iizfoh 😊.

    Ir Nöchi vom Strand hani sogar no Gstöu entdeckt mit Stockfisch. Ou äs spezieus Erläbnis 😅. Luutem Reisefüehrer wird ä grosse Töu vo däm sogar exportiert.    Læs mere

    Se oversættelse
  • Meri beim ReisenNORWAYRejsende

    Lofoten 3. Tag (4)

    21. marts 2023, Norge ⋅ ❄️ -1 °C

    Jap, dä schön und spannend Tag verdient sogar no ä vierte Post 😁.

    Ds Wätter ade Stränd isch sehr wächsuhaft gsi. Am Schluss hetts sogar plötzlech ufgrisse und d Sunne isch cho, fantastisch! Leider hett mis Handy ke Akku meh gha und dr Spicher vor Kamera isch vou gsii. Drum hani de hurti äs paar Föteli glösche, dassi ds Schouspüu gliich no cha feschthaute.

    Und öbbe die ungloublechschti Gschicht: Bim ah Strand loufe bini mit dr Mama am telefoniere gsi, woni plötzlech näb dr Stross gschibleti Fische gseh lige, nonid gfrore und nid Stockfisch. Äs gseht uus, wie öbber hätt wöue Tier fuere. D Mama frogt mi am Telefon, öb de nid irgendwelchi Viecher ume si, zum Bischpüu Bäre... Do wirdmer gad chli mulmig und i luege ume. Tatsächlech, ä Seeadler hocket öbbe 100 m vor mir ufemne Stei! Was fürne schöni Überraschig! Nach es paar Sekunde breiteter d Flügu uus (2 m gschetzt, cha ds si?) und gleitet dr Hügu hinger abe, wäg ischer gsi. Wunderschön und iidrücklech!

    Und zletscht no s paar Föteli, wie hie d Supermärkt so usgseh 😊.    Læs mere

    Se oversættelse
  • Meri beim ReisenNORWAYRejsende

    Lofoten 4. Tag

    21. marts 2023, Norge ⋅ ⛅ -3 °C

    Hütt hetts gschneit und zwar so fescht, dass töu Busse nid gfahre si. Ä Brügg isch so zuegschneit gsii, das nütmeh isch dürecho. Mini Plän hütt:

    1. Plan: Ä Rundi go secklä u näre gmüetlech
    richtig Henningsvaer und Svolvaer mitem Bus. Plänänderig wäge Schneestürmli.

    2. Plan: Schlächtwätterprogramm Wikingermusuem wäge starchem Luft und Schnee. Bus isch nid cho, drum Planänderig.

    3. Plan: Mitem nöchschte Bus uf Svolvaer, dört gmüetlech gone externi Feschtplatte choufe, näre ih auer Rueh mitem Bus uf Henningsvaer. Bus isch nid cho, drum Planänderig.

    4. Plan: 3 Stung nach Plan 3 dr Bus uf Svolvaer näh, Feschtplatte choufe, mitem Bus uf Hennigsvaer. Bus isch nid cho, drum Planänderig.

    5. Plan: Bir Busstation hani zwöi vom Hostel glehrt kennä, wo ou uf Svolvaer wei. Fründe vo ihne si mitem Outo ungerwägs und chöme üüs 1.5 Stung spöter cho reiche. Ändlech, das klappt!

    Ig verpasse aber dr Bus z Svolvaer für uf Henningsvaer und muess drum dört bis am 8ti ufe nöchscht Bus warte. Go sider öbbis go Znacht ässe.
    Dr Bus hett de ouno rächt Verspätig. Mir überlege scho amne Taxi ume (ds hätt aber lang duuret, wüu gad ä Flüger isch aacho), do chunnt ändlech dr Bus. Am haubi Zähni am Oobe bini im Hotel, öbbe 4-5 h spöter aus planet. Und ig ha gmeint, nume d SBB cha nid mit Schnee umgo 😂!

    D Föteli si übrigens aui vo Svolvaer (Houptstadt vode Lofote). Schoggi mélange gits hie ou ☕️🍫.    Læs mere

    Se oversættelse
  • Meri beim ReisenNORWAYRejsende

    Lofoten 5. Tag

    22. marts 2023, Norge ⋅ ⛅ -3 °C

    Mometan bini z Henningsvaer und hütt hani chli ds Dörfli aagluegt. Henningsvaer isch bekannt und ziemli touristisch, im Summer si d Strosse äuä vou mit Touris.

    Aber esch äs sehr härzigs Dörfli, um jedä Huuseggä chunnt wider ä angere Bärg füre. Rund ums Dörfli si d Fischerboot ungerwägs.

    Hütt hetts nume churz gschneit und dr Räscht vom Tag hett d Sunne gschune. Aber ou mit Sunne isches geng no sehr chaut!

    Znacht hetts Fisch gäh imne Restu, wo schiins ouscho dr Kaiser vo Norwege gässe hett. Isch ömu fein gsi 😊.    Læs mere

    Se oversættelse
  • Meri beim ReisenNORWAYRejsende

    Henningsvaer - Sortland

    23. marts 2023, Norge

    Hütt isch wider einisch ä Reisetag gsii. Mit Bus und Fähre bini uf d Vesterålen gfahre, d Insugruppe nördlech vode Lofote. Die si weniger touristisch aus d Lofote.

    Wider einisch ä sehr schöni Fahrt dür verschneiti Bärge und töifblaui Fjore gsi 😊.

    Und hütt hani äääändlech s Nordliecht gseh! Zwar nume schwach, aber es zöut gliich 🌌!    Læs mere

    Se oversættelse
  • Meri beim ReisenNORWAYRejsende

    Sortland - Nyksund

    24. marts 2023, Norge

    Wenni nid hätt glehrt, dass d Wäut ä Chugele isch, ig wär überzügt, dassi hütt s Ändi vom Ändi vor Wäut gfunge hätt: Nyksund (usgsproche: Nüksünd oder so ähnlech, me cha auternativ ou zwöimou niesse 🤧🤧).

    Phuu, was fürne ahsträngende Tag womi ah mini Gränze brocht hett. Fougendi Situation: Nachere sehr unagnähme Erfahrig im Hotel mit öbbe 3 h Schlof, voubepackt mit Rucksack und Täschene, hani mi imne Schneesturm imne absolut unturistische Dörfliii gfunge, wo s Iichoufzäntrum am Dorfändi die einzegi Müglechkeit fürne Ungerschlupf isch gsi. Und dört ä Stung ufe Bus gwartet. 3 h Schlof + Schneesturm + unbekannte Ort! Nid luschtig!
    Obwou d Busfahrt nume 20 min isch gange, ischsimer lenger vorcho aus so mängi Fahrt ide letschte Täg. Mir si ä komplett verschneiti Stross entlang gfahre, s paar Meter unger üüs die raui See und uf dr angere Siite Bärg. Für mi ä Gränzerfahrig, für s chliine Meiteli näbe mir im Bus dr täglech Schuuwäg.

    Hütt bini mehreri Mou verzwiiflet und es hett äs paat Telefon us dr Schwiiz bruucht, dassi mi ha chönne zämrisse ♥️.
    Hie gits nüt ztüe, und vor däm hani chli Angscht. Wes morn würk dr ganz Tag schneit wie gmuude, de chame nidmou gross go loufe. Aber hei, ig has as Ändo vom Ändi vor Wäut gschafft.    Læs mere

    Se oversættelse
  • Meri beim ReisenNORWAYRejsende

    Nyksund - Narvik

    26. marts 2023, Norge ⋅ 🌙 -10 °C

    Wunderbars Wätter isch hütt gsii und drum si ou d Busse wunderbar gfahre 😊. So hanis problemlos uf Narvik gschafft, wos dr nördlechscht Bahnhof vo Norwege git.
    Ig bi säute so überrascht gsii, plötzlech wider Zugschine zgseh. Für öbber wie mi, wo im Land mitem öbbe dichtischte Isebahnnetz vor Wäut läbt, isch doch die letschti Wuche ohni Züg scho fasch Entzug gsi.

    Narvik isch z Ändi vore Bahnlinie wo eigentlech vorauem dür Schwedä geit. Sehr wichtig isch d Verbindig Kiruna (Schwede) - Narvik. Z Kiruna isch die wäutwiit gröschti Iiseerzmine. Vo dört us wirds Iiseerz i länge Züg uf Narvik brocht und hie verschifft. Schiins entgleise zwüsche Kiruna und Narvik regumässig so Iiseerzzüg. Uf derä Strecki geits nitzi und wüu d Züg so schwär si überforderet ds offebar d Zugtechnik.    Læs mere

    Se oversættelse
  • Meri beim ReisenNORWAYRejsende

    Narvik - Fauske - Trondheim

    28. marts 2023, Norge ⋅ ⛅ -12 °C

    Uf dr hüttige Busfahrt hetts nomou chli (Polar-)Safari gäh : äs Füchsli 🦊, ä Seeadler 🦅 und zwe Elche 🦌🦌.

    Generell gits für die nöchschte zwe Täg nume ei Richtig: Süde. Drum bini itze ufem Nachtzug womi bis uf Trondheim bringt 🚅😴. Ds isch wider mou ä Disu-Zug, hett veii Lärme gmacht mit iifahre.Læs mere

    Se oversættelse
  • Meri beim ReisenNORWAYRejsende

    Fauske - Trondheim

    28. marts 2023, Norge ⋅ 🌙 -13 °C

    No ziemli gnau 36 h näre sötti ir Schwiiz aacho 🚅🇧🇻🇸🇪🇩🇰🇩🇪🇨🇭.

    Se oversættelse
  • Meri beim ReisenNORWAYRejsende

    Trondheim - Oslo S

    28. marts 2023, Norge ⋅ ☁️ 3 °C

    Ih genau däm Momänt lohni Oslo hinger mir 🙋🏼‍♀️! Es geit wiiter uf Stockholm. D Landschaft isch ungerwägs geng grüener und schneeärmer worde. Esch fasch chli wieni würd ih Früehlig fahre😅.

    Se oversættelse
  • Meri beim ReisenNORWAYRejsende

    Oslo S - Stockholm C - Hassleholm C

    29. marts 2023, Sverige ⋅ ☁️ -4 °C

    Uf Schwedä simer ohni ID-Kontroue cho. Ds hettmi erstuunt, disewäg sisi nämlechsehr sträng gsi.
    Je meh Schwedä desto waudiger isches worde. Ds Stockholm hätti no fasch dr Aaschlusszug verpasst. Dr Nachtzug, woni momentan dermit ungerwägs bi. Dä Zug isch rächt vou und am 04:49 muessi scho wiiter. Dr Schlof bini drum momentan afe am sueche.Læs mere

    Se oversættelse
  • Meri beim ReisenNORWAYRejsende

    Kopenhagen - Hamburg

    29. marts 2023, Tyskland ⋅ ☁️ 6 °C

    Bis itze hani häb chläb aui Züg verwütscht und es hett sowiit ganz guet usgseh. Plötzlech isch dr aktuell Zug aber gstange und Durchsag isch cho: "Wir habe ein Problem auf der Strecke. Da ist ein Zug liegengeblieben." Ig weiss nid, wievüu Verspätig dassmer hei, aber mir fahre ömu wider. Mou luege öbs längt füre Aaschlusszug.

    Dr Zug isch brätschvou, drum hani leider ke Fänschterplatz und nideso gueti Föteli 🙋🏼‍♀️.    Læs mere

    Se oversættelse
  • Meri beim ReisenNORWAYRejsende

    Hamburg - Basel SBB

    29. marts 2023, Tyskland ⋅ ☁️ 17 °C

    Ih knapp 25 min bini ir Schwiiz. Ä rächte Töu vor letschte Strecki hani verschlofe.

    Uf au Fäu hetts hie offebar kei Schnee. S hett vüu grüeni und bruuni Flechine und ke Meer wiit und breit. Itze nimmts mi de wunger, wie warm dasses isch bim Umstige z Basu 😊.Læs mere

    Se oversættelse
  • 2026© FindPenguins
  • Hjem
  • Om os
  • Gruppesporing
  • Presse
  • Betingelser
  • Privatliv & Cookies
  • Hjælpecenter
  • Aftryk