Indien

Heil und gsund dihei zur Tür inelaufe, de Wunsch isch in Erfüllig gange. Aber es isch so befremdlich gsi, nach minere ewigslange Weltreis wieder id Wohnig laufe und es isch no glich wie vorher, kei Gras drübergwachse, kei undurchdringbari Staubschicht uf verlotterete Möbel... und es wird mer bewusst: es sind nur 3 Wuche gsi, zumindest da i dere Wält...
Es isch en anderi Wält, es hät so viel Platz uf de Strasse, kei Verkehr, keis Gehupe, keis Gedränge. D Trottoir und Siitestreife sind so läär ohni Verkaufsständ, Buuchlade, Ramsch uf Räder und all Lüt wo dezwüsche stönd, tratsched, handlet, läbed. Und denn fahreds und laufed au no uf de falsche Siite und musch so doof uswiiche wills unflexibel uf ihre Weg bestönd. Immerhin grüessed all fründlich bim Sunntigsspaziergang ufm Brüehlberg, chli schwiizer Charme zum aacho 😊
Nur de Müll suechi vergeblich: i de Baumgruebe nebm Veloständer stuuni, wills kei Petfläsche, Plastiksäck und andere Grümpel dinne liit und es hallt im Kopf was de Yogalehrer gseit hät woner vo sim eine Bsuech ide Schwiiz verzellt hät: its so clean.
Und so bini zrugg i dere altbekannte Welt, im gschäftige Alltag und versueche biz Indie zbhalte, zumindest die Zueversicht, die Glasseheit, die Flexibilität und de Moment chönne znäh wiener isch... und au chli offnener d Chance nutze wo zuefällig min Weg chrüzed...Leer más