Hebridean Way

Naked Survival Read more

Follow Insights Calendar Photos Share

Trip start
June 3, 2024
Hebridean Way
1
Welcome to Teneriffe
June 3, 2024 in Scotland ⋅ ⛅ 12 °C
Üsi Reis hed am 04.00 Uhr gstartet. Die gmüetliche Flughafe Musig in Züri hed üs de bis uf Schottland begleitet. Sogar bim umstiege in London hemer die wunderschöne Gigekläng chönne gnüsse.
S Wetter in Glasgow isch bedütend besser gsi als i de Schwiiz. Mit de Ussag "Welcome to Teneriffe" simer vom Busfahrer in Glasgow begrüesst worde.
Nachme Trip dur jeglichi Sportgschäft in Glasgow hed au d Linda denn alles gha für üsi Reis. Da d Sunne sich immerno zeigt hed, hemer de gmeinsami Entscheid troffe üse ersti Sunnebrand abzhole imne schicki micki Restaurant. Da sie sich bitz Ziit glah hend bim zuebereite hemer üsi Pizza i 10min abgeschlunge und sind ufe Zug nach Oban "gsprunge" (stimmt ned, reimt sich aber). Det hemer mit üsem Ciao Sepp s ganz Zugabteil unterhalte. Nach Fish n Chips hemer no en Verdauuigsspaziergang zum Kolloseum gmacht, wo mer en super Ussicht vo oben über ganz Oban gha hed. Churz drufabe simer alli völlig erlediget is Bett.Read more
See translation
Oban von Oban :D [Franco]
6/4/24ReplyTranslate
4 likes
Hebridean Way
Üse Bluetzucker isch Oban use
June 4, 2024 in Scotland ⋅ 🌬 10 °C
Die letzt Nacht und vor allem die letzt Duschi hemer so richtig gnosse. Zum z Morge hemer üs en Zuckerschock i de Chocolat Company gholt. Es isch uu fein gsi. Denn ischs au scho mit de Fähri übers wiite Meer nach Castlebay gange. Am Afang isch das no schön gmüetlich gsi aber wo mer denn ufeinisch im offne Meer usse gsi sind, simer de alli ruhig worde und hend üs müesse uf üsi Büüch konzentriere. Froh simer gsi, wo mer nach 4.5h wieder feste Bode under de Füess gha hend. No en letzte ikauf in Castlebay (mer hend es riiiiese Bedürfnis nach Gmües gha) ischs mit em Taxi an Startpunkt. Det hemer üsi Zelt ufbaut und üsem Name alli Ehr gmacht. Füdliblutt simer is Meer go bädele, umgebe vo sehr vielne Qualle.
Ässe, Zähndputze, Schlafe. Wobi s Schlafe sehr schwierig worde isch.. SEHR.
Für die einte hed d Nacht denn i de Duschi bim Spitzmüüsli gändet.Read more
See translation
5 likes
Hebridean Way
D Weg währed beschildered
June 5, 2024 in Scotland ⋅ 🌬 10 °C
Nach knapp 2h Schlaf simer putzmunter uf und hend üsi Sache zämegruumet. Punkt 9ni simer losmarschiert. Am 10i hemer scho die erst Insle überquert gha und üs an ersti Ufstieg gmacht. Nach einigem ufe und bitzli abe, chli Sunne und viel Hagel hemer denn gmerkt.. d Weg währed eigentli markiert.
Pflotschpfludi nass simer de im nächste Ort acho. Det heds es Kafi gha und mer hend ned lang müesse überlegge öb mer es gsunds z Mittag nass und chalt verusse wennd oder es Stück Chueche und en heisse Tee a de Wärmi. Nachdem alli Schueh und Hose wieder isatzbereit gsi sind ischs witer gange, dank em reminder vom Füüralarm dasmer mal wieder los selled (S Hotel isch ned abebrännt). Über Stock und Stei und vor allem Wasser (die trochne Schueh sind ned lang troche blobe) hemer üs de nächst Hügel ufe und wieder abe kämpft. Am Abig am Siebni simer nach 25.5km und 1275Höhemeter a eusem Ziel acho. Tragischerwiis heds kei Platz zum Zelte gha und mier hend üs denn im Waiting Room vo de Fähri igrichtet. Es isch en Traum gsi und ned ganz legal.Read more
See translation
6 likes
Hebridean Way
Hallo Blattere 👋
June 6, 2024 in Scotland ⋅ 🌬 10 °C
Nachere sehr erholsame Nacht im Warterüümli simer am Siebni uf die ersti Fähri nach Eriskay. Det acho ischs am Strand und na uf Asphalt wiiter uf South Uist gange. Det ischs nomal öppe 5km über Asphalt gange wo sich gfühlt unendlich zoge hend. Znüni Pause heds im Windschatte vomne Camper geh und s unglaublich härzige Ehepaar hed üs heisse Tee, Guetzli und vieli Tipps zu de Inslene gäh. Denn ischs knapp 20km wiiter gange immer meh oder weniger am Strand entlang. Es hend unglaublich viel Hase uf de Düne gha und mer hend sogar zwei Robbe gseh. Im Sand hemer denn alli d Schueh abzoge da sich doch die eint oder ander Blattere am zeige isch. Nach insgesamt 30km hemer üses Zelt ufgstellt. Und churzdrufabe wieder abbaut, wills im sandige Bode in Kombination mitm Sturm ned wüki ghebt hed. Mer hend denn paar hundert Meter wiiter imne leere Schlafstall Schutz gfunde und üsi Zelt det ufbaut. Distanz: 31.5km, Ziit unterwegs: 7h20minRead more
See translation
5 likes
Hebridean Way
I could use one
June 7, 2024 in Scotland ⋅ 🌬 10 °C
Zum Glück simer im Schafstall glandet. Am Morge am 2 isch totali Weltuntergangsstimmig gsi. Es hed gstürmt und gregnet und immer wenn mer s gfühl gha hed meh Wind und Rege gahd ned, ischs no meh worde.
Ohni de Stall wäremer nömme hie, vermuetli mitsamt Zelt ufm Festland glandet 😂
Am Morge ischs wieder los gange, aber mer sind eifach nömm i Trott ine cho und d Füess hend halt vo Afang a scho weh gmacht.
Nachere churze Mittagspause am Strasserand hemer de grad de Bus gno. Im Bus hemer 4 komischi Käuz känneglernt und ja. Sid denn hemer si a de Bagge, öb mer wennd oder ned. Mit em Satz: "I could use a Whisky" ischs iis broche gsi und mer hend en richtig guete Namittag gha.
Nachere Duschi und me lustige Abig hemer üs no so gern is warme Bett im Hostel kuschled.Read more
See translation
TravelerI wär eifach froh we dir nid ihri Gsangskünscht anäht🙈
6/8/24ReplyTranslate
7 likes
Hebridean Way
Tschau Sepp
June 8, 2024 in Scotland ⋅ 🌬 10 °C
Am Morge simer gmüetlich i Tag gstartet und hend üsi früsch gwäschne Chleider wieder verstaut. D Daria hed en Pausetag igleid ufgrund vo ihrne überbeaspruchte Füess, darum hemer eus dezue entschiede ihre d Rucksäck mitm Taxi mitzgäh und nur mit liechtem Gepäck z wandere. D Jungs hend sich eus agschlosse. Ohni die schwäre Rucksäck ischs laufe uf einisch cheibe ring gange und mer sind doch guet vorwärts cho. Es isch dur Moorland und de letzti Teil de Strass entlang gange. Mer hend en ältere Herr troffe, wo mer am Tsistig uf de Fähri kenne glernt hend und er hed gmeint er tued abbräche ufgrund vom Wetter. Absolut verständlich will de Wind macht eim echt zimli z schaffe. Uf de Strass hemer no d Jenny troffe wo zäme mit üs im Hostel gsi isch, de heds natürli no müesse es Selfie gäh mit ihre.
S Wetter isch vo Chalt und Windig zu no chälter, no windiger und nass worde. Darum hemer umso meh freud gha wo mer uf em Camping acho sind und Daria üsi Zelt scho ufgstellt gha hed. Die heiss Duschi isch mal wieder en absoluti Wohltat gsi. D Jungs hend für eus z Nacht koched und na hemer no paar Rundene Tschau Sepp gspielt. Wo s Spiel irgendwenn immer chaotischer worde isch hemer üs entschiede is Bett z gah. Alli Zelt sind ufgstellt gsi aber mer hend alli chli amne andere Ort pfuused. Daria die ganz Nacht a de wärmi im Wöschruum, de eint vo de Jungs i de Chuchi und ich de ab em Morge am 5i au im Wöschruum. Es isch halt eifach iischalt gsi.Read more
See translation
4 likes
Hebridean Way
Tschüss Hebridean Way
June 9, 2024 in Scotland ⋅ 🌬 10 °C
Nachere erneut windige Nacht ischs am Morge wiiter gange. D Wanderig dur s Moor isch erneut z Dritte losgange, nur hed dasmal d Zohar usgsetzt. Währed de Wanderig simer wiiterhin fliessig vo de Jungs "verfolgt" worde. Am 12.30 hed d Zohar üs mit em Taxi ufglade und mer sind wiiter bis uf Berneray ad Fähri Station. Det acho ischs uf Erkundigstour an ageblich schönsti Strand vo de Welt gange. War schon toll. Wieder zrugg bi de Fähri hemer Planänderig müesse starte. Da d Daria en kaputte Fuess und d Zohar Fieber hed machts wiiter Wandere nömm so vell Sinn. Uf de Fähri heds fliessigs Unterkunft sueche gäh, was sich als sehr schwierig usegstellt hed. In Harris acho hemer d Zohar i es BnB verfrachtet und hend i de nöchi üsi Zelt ufgstellt. Nacheme gmüetliche Spaziergang ume See simer de gli go schlafe.Read more
See translation
4 likes
Hebridean Way
En Tag zum Vergässe
June 10, 2024 in Scotland ⋅ ☁️ 8 °C
Ja de Titel seids... aber mer hend super fein brunched im BnB, unterwegs en schöne Strand gseh, en feine Kaffi gha und zum z Nacht Fajitas gmacht 👏
See translation
5 likes
Hebridean Way
Vo de Wanderschueh zum Velosattel
June 11, 2024 in Scotland ⋅ ☁️ 8 °C
Nach mehrere Krise am Bikerental hemer üsi Faltvelos entfaltet und sind losgradlet. Mer sind bis ganz as Endi vo de Puffin Insle gfahre und mer hend alles gseh. Nebst de Ussicht sogar es paar Vögel.
Mer hend festgstellt, de Wind hed es persönlichs Problem mit eus. Egal i welli Richtig, egal was mer mached, mer hend immer Gägewind. Nach ungfähr 30km hed au d Linda müsse ihgestah mit ihrere 120km Tour wo sie für de nächsti Tag planet hed isch sie grad chle sehr übereuphorisch gsi. (Obwohl.... wenns ez ned Faltvelos währed.....?!) Glichziitig ufgwärmt vom radle und absolut duregfrore vom Wind hemer eus am halbi Füfi i es Kafi verdrückt. Und det simer de grad blobe bis am Achti. Nach de heisse Schoggi als Vorspiis heds es superfeins z Nacht gäh und tolli Unterhaltig vo de Teenies am Abschlussball uf de andere Strassesiite. Nachdem mer si über Stunde beobachtet hend hemer de glich no müesse es Föteli mache mit ihne.Read more
See translation
4 likes
Hebridean Way
SINGLE TRACK & Alpakas
June 12, 2024 in Scotland ⋅ ☁️ 11 °C
Hüt simer wieder mit de Faltvelos unterwegs gsi. So chli wies sind, mer chunnd halt glich vom Fleck. Knapp 60km hemer gmacht dur absolut einsami Moorlandschaft. Grad am Afang simer vomne ältere Herr sehr bestimmt durf ufmerksam gmacht worde dass mer gfälligst i einere Reihe sölled fahre und ned nebenand. Wär ja au gföhrlich uf dere Strass, mer gsehd ja nur die nächste 10km vorus 😂
Mer sind uf Callanisch d Steichreis go aluege und denn zu de Alpaka Farm nebedra. Die hend en ganze Streichelzoo und mier hend grad bim Füettere chönne helfe. Es isch richtig, richtig toll gsi.
Wieder zrugg in Stornoway heds heissi Schoggi und es Chuechebuffet gäh. Und will das no z wenig gsi isch hemer üs zum zNacht Burger gmacht.Read more
See translation
5 likes
Hebridean Way
Purs Chaos
June 13, 2024 in Scotland ⋅ ☁️ 12 °C
Hüt heds mal wieder gheisse Sache zämpacke. Mit em Bus ischs vo Stornoway wieder uf Tarbert gange. Det hemer üs einisch dur d Büecherregal gwüehlt und sind sogar fündig worde. Nachere heisse Schoggi mit Schlagrahm und Marshmallows ischs ufd Fähri nach Uig (Isle of Skye) gange.
Skye hätti üs ned besser chönne begrüesse, agnähmi Temperature, fast kei Wind und Sunneschii. Zum erste Mal hemer chönne im Tshirt wandere.
Es isch anere Bergstrass entlang duruf gange und mer sind sogar schneller als d Autos gsi. De Bus und die entgägekommende Autos hend es unglaublichs Chaos verastaltet bis gar nüüt meh vor-/ rückwärts gange isch.
Nachdem mer das Chaos hinder üs glah hend ischs ned lang gange bis mer wieder im Stau gstande sind. Also d Autos um eis ume zumindest. Eis Auto isch vor luuter sich welle am Lastwage verbi quetsche sogar im Grabe glandet und hed müesse useglüpft werde. De entrüsteti Usruef: "For fucks sake" vo de einte Awohnerin hed d Situation perfekt gschilderet.
Mer sind gueti 10km de Strass entlang bis zum Camping gwanderet. Det hemer d Ussicht gnosse und ufgrund vom Räge üs früeh is Zelt zrugzoge. Mer hend ja jetzt Büecher, wo mer üs chönnd drin vertüüfe.Read more
See translation
6 likes
Hebridean Way
Touris on Tour
June 14, 2024 in Scotland ⋅ ☁️ 12 °C
Hüt hemer grosses vor gha. Mer hend Velos gmietet und hend alli Sehenswürdigkeite welle abklappere. Wo mer los sind heds no grägnet, nichts desto trotz simer id Pedal gstande und losdüsed. Nach viel ufe und abe und seeeehr viel Schaf simer in Staffin acho. Det heds en z Mittagspause gäh imne unglaublich tolle und leckere Kafi. Denn ischs wiiter berguf und -ab gange zum Kiltrock Wasserfall und em Old Man of Storr. Det hemer d Velos anegstellt und sind ufe gwanderet, natürlich hed s Fotoshooting dobe ned dörfe fehle.
Zrugg uf em Velo ischs nach Portree und de grad wiiter nach Uig gange. Fast bim Ziel, hemer eus no Burger und es Bier gönnt.
S Wetter hed immer meh uftah und bi strahlendem Sunneschii hemer d Velos zruggbracht und sind mitm Bus wieder uf Portree gfahre. Det acho simer i es Pub und hend festgstellt dass sich d Welt au usserhalb vo üsere Reis wiiterdreiht und scho EM isch. Also hemer grad fliessig für Schottland gfanet und Charte gspielt nebezue.
Inere Nacht und Nebel Aktion hemer de üsi Zelt z mitzt in Portree ufgstellt und sind go ligge.Read more
See translation
TravelerEs hoch uf Nacht und Nebel Aktione 🙌🏻
6/15/24ReplyTranslate
6 likes

Trip end
June 18, 2024