Tag 20 - Follow Me!

Am morge no gar kei bock gha zum ufstah, da d‘standheizig abgstellt het und nüt hesch wele unter de decki füreneh ohni dases grad abfrüürt. Wenigstens sind söcke bi dem sturm verusse nöd vode veloträger weggwindet worde. Ganz churz alles zemepackt und direkt is tal abegfahre, nacheme churze zwüschestopp bim stegastein, en berüehmte ussichtspunkt, won jetzt nöd sooo krass gsi isch wiemer denkt hend. In Aurlandsvangen hemmer es supertolls kafi gfunde zum zmörgele :)
Denn hemmer gstärcht wele uf die negsti wanderig zum rimstigen ufe, d‘strass isch denn irgendwie wegere tunnelsanierig nur all 2 stund für 10min offe gsi, hemmer also gern druf verzichtet. Denn het de oli alles chli fehlplanet, so dasmer nüme hend chöne ine sauna gah bi dem schlechte wetter und nach zwei wasserfäll hemmer eus denn entschlosse, zumene camping richtig bergen zfahre, dasmer morn frisch duschet en chliine stadtrundgang chönd mache. Eig wäremer voorig gnueg dete gsi, dasmer de namitag no chönd gnüsse, aber die baustelle in norwege hend nix vo liechtsignalahlage ghört, und stattdesse fahrt es „follow me“-chärreli vorde hässig wartende autokolonne her, was alles nur no meh verlangsamt. De belag wird glaubs immer nur am tag ihbaut wenns am meiste verkehr het.. nachere verspötig vo meh als einer stund simmer denn dich no im camping ahcho.
Natürli hemmer denn trotzdem sglück wieder uf eusere siite gha, de camping isch eig wunderschön aber chli fehlplanet, so dass camper rad ah rad ohni gross abstand gstande sind… mier hend denn trotzdem de platz ufde andere siite vom huus becho, womer ganz elei chönd stah🤗👍🏻
En feine apero hets am fjord une geh und de abig isch zum glück ohni regne z‘end gange.Read more