14. Tag Whistler - Lillooet

Hüt morge isch immerno wulchig gsi, aber Sunne hät s'erst mal sit zwei Täg richtig dure druckt. Nachem zmorge hämer alles zäme grumt und sind ufbroche. De Kevin und ich sind fängs es guets Team😅 jede weiss was sis jöbli isch😉.
No rasch go Tanke dassmer au ja nie Angst münd ha.
Und los gahts euse ersti Stopp isch bide Nairn Falls gsi. Dete simer zerst 1.5 km dur de Wald gloffe. Richtig schöne Wäg über Stock und Stei gsi. Dete ahcho hämer de wunderschön Wasserfall gseh. Hät sich also glohnt. Chli mulmigs Gfühl hämer scho gha, da am 01. Sept. en Bär gsichtet worde isch. Mir händen aber ned gseh.
Dä isches wiiter gange. Immer mal wieder hämer en Stop gmacht wos schön gsi isch. Völlig ab vode Zivilisation simer gsi und natürlich au ohni Empfang. Ich han am Vortag ufem Facebook gläse, dass bi Lillooet ide nöchi en Bär gsichtet worde isch. Und plötzlich chömemer um Kurve und es händ mehreri Autos de Panneblinker dinne. Es hät mich fast vom Stüehli grüehrt vor Freud. Da zottled doch am Strasserand en Schwarzbär ih einere rueh. Irgendwänn isch die schwangeri Bäredame (händs im FB gmeint) über Strass und verschwindet ide Büsch. Die einte händ partou nümm welle wiiter fahre. Das isch leider für die Bäre ned so guet.
Und wiiter isches gange... Natur isch da um Lillooet ganz anderst. Sehr troche scho fast Wüeste mässig. Darum händ mir dä au gfunde mir wänd ned in Lillooet sälber bliibe und sind wiiter gfahre. Zwüsche zwei See häts de Marbel Provincial Park geh. De hät no freie Stellplätz gha und mir händ eine usgläse für nur 18 CAD. Sehr schön ischer gsi. De schönsti bis jetzte. Diräkt am See. Natürlich ohni Strom und au kei Empfang. Bruched mir aber alles ned😊.
Nochli Sunne gnosse und znacht gmacht. De Abig hämer dä mit Skipo verwiiled.Läs mer