33. Tag Calgary - Montreal

Hüt morge hämer beziite uf müsse. Eusi Reis im Weste gaht am Ändi zue. Mie flüged hüt uf Montreal. Schnäll es Uber bstellt und ab an Flughafe. Eusi Koffere ufgeh und dur Sicherheitskontrolle. Alles tiptop gange. Dä simer no öppis go ässe. Händ ja no nüt gha. Nachher nochli Ziit vertribe mit de Fotiboxföteli vom Hochzig dureluege😂🫣.
Ja de Flüger isch gstosse voll gsi. De Kevin und ich sind hinderenand ghocked. Chli rumplig isch de Flug au gsi, isch aber schnäll dure gange. Glandet und schnäll euses Gepäck gholt und zude Autovermietig gloffe. Ahcho... ja dänn isch s'theater los gange🤦🏼‍♀️ das glaubt eus niemert was dete abgange isch! Mir sind mal bide Schlange ahgstande. Näbed eus sind au Schwiizer gsi. Mir händ die dä gfragt obmer bide richtige Schlange seged zum ahstah. Ja dä händs eus verzellt, dass sie zwei stunde ahgstande sind zum nur mal zmälde dass sie da wäred zum s'Auto abzhole. Dä säged die vode Herz doch tatsächlich dass sie eich gar kei Autos meh heged. Ja es händ soo vill Lüt uf ihri Autos gwartet. Das chunt ja guet use. Nachere Stund warte simer dä mal drah cho. Euses Depot fürs Auto händs natürlich au grad abbueched, obwohls ja gar kei Autos händ...! Also so ganz verstah hät das eich niemert chöne, da ja all Reservatione ide Händ gha händ. Ja und mir händ das ganze ja au scho zahlt. Ich han dä mal gfragt wie lang dass mir warte müssed. De netti (ironisch) Herr am Schalter hät dä gmeint er wüssis ned... Eh Stund oder soo... dä isch s'Echo vo hinde cho all händ gmeint nei öppe 3-4 Stund wartets scho🤦🏼‍♀️.
Ja was bliibt eus anders Übrig weder z'warte... es isch ja ned scho 8ti am Abig. Es hät sich langsam immer meh ufklärt... also das spektakel gächi scho sitem Juni eh so und das jede Tag. Mer hetti Möglichkeit gha, sini Reservation storniere, aber Gäld häts natürlich ned grad zrugg geh. Mer hett bide andere Ahbüter go es Auto miete, aber das zu gspunnige Priise. Eifach devo laufe hämer au ned chöne, schüscht wärs ja eusi Schuld gsi. Ich han no gfragt gha obmer ned am negste Tag euses Auto chänged go hole. Nei das gächi au ned. Die händ kein Plan wie vill Autos dass bechömed und wie vill dass brucht zum use geh. Ja Stimmig isch demändsprächend bi allne zimli Schitter gsi🫣.
Die händ locker 20 Zädel vo Reservatione gha und KEI Autos. Ja isch eis zrugg cho, isches grad an negst passende geh worde. Nur bringed ja am abig am 9i ja no so vill ihri Autos zrugg😬 Öppe ned.....
Mir händ dä nach 4.5 Std. warte ändlich euses Auto becho. Ja es isch scho 11i. Zum Glück hämer es Hotel womer eh sälber münd Ihchecke. Ander händ da no ganz anderi Problem gha😬
En Parkplatz gfunde simer no rasch in MC öppis z'ässe go hole. Will vill hämer nonig gha. Ja es hät zum ganze Tag passt, will de MC-Food isch so gar ned guet gsii🤮. En Tag zum definitiv abhagge😅 also ab go pfuuse🙈Read more