Reset search
Ozeanien RetourOzeanien Retour
Satellite

Ozeanien Retour

"Few thousand miles and an ocean away" Aatribe vom Färnweh ziehts mi nach Ozeanie (Fiji, Neuseeland und Auschtralie)
  • Ozeanien RetourAbentüür Ozeanie
    Day169

    G'day mate, greetings from Aussie

     February 14, 2018 in Australia ⋅ 🌙 18 °C

    Herzlichi Grüess usem Känguru-Land.
    Ich bin scho sit eppe 10 Täg in Australie und gnüsses sehr. Bi vo Auckland uus uf Tasmanie gfloge und han dete e gfüerti Gruppereis gmacht. S Hostel in Hobart isch eher id Kategorie "Schmuddelhostel" gange defür han ich die liebschti Zimmergnossin gha, wommer überhaupt chan haa! Mini Gruppereis isch im Grosse und Ganze guet gsi, mer hend eigentlich e gueti Gruppe gha und mer sind alli püntklich gsi. Mir persönlich hett Tasmanie nöd soooo wahnsinnig gfalle, isch e Mischig zwüsche Neuseeland, Australie und de Schwiiz. Es isch scho schöön gsi aber jetz halt au nöd so de mega Burner... Naja, dadefür isch die Tour ja da gsi. Taste of Tasmania und das hani becho. Australie isch für mich ja meh so dänkt gsi zum emale en erschte Iiblick z becho, öbs mer gfallt oder nöd. Jetz weissi, uf Tasmanie mueni nöd namel umbedingt. Aber mer sind na inere Wildtierufzuchtstation gsi wons diversi schwarzi Schwän hend, Adler, Üüle, Kängurus, Wallabies, Tasmanischi Tüüfel und s wohl süessischte woni je gseh han - Wombats. Ha mi grad i de knuddeligi Kerli verliebt obwohl d Kängurus au e starchi Konkurenz gsi sind. Mer sind au na ade Bay of Fire gsi und die hett mer echt au guet gfalle. Dete hend sich irgendwie Alge ad Stei gheftet und es gseht echt so uus als würed d Stei bränne. Mittlerwiile bini in Melbourne und ich findes hammerschön da. D Stadt isch sehr läbthaft und suuber, schön und uufregend. Genau richtig! Langsam freui mi doch uf miis diheime und mini Familie aber nichtsdestotrotz gnüssi min verbliibende Monet na i volle Züüge.Read more

    See translation
    Map
    • Explore, what other travelers do in:
  • Ozeanien RetourAbentüür Ozeanie
    Day142

    Ich läbe also na

     January 18, 2018 in New Zealand ⋅ 🌧 19 °C

    Hallihallo ihr liebe
    Ich han denkt, ich gibe eu mal es churzes Update. Mir gahts sehr guet, momentan ade Folge vome heftige Sunnebrand am Rugge am liide - bitte Sunnegräm z Neuseeland nie vergässe - und ich gnüsses immer na. Täglich gsehn und erläb ich sehr vill, vill z vill zum da alles uufzschribe. Drum hani denkt, ich schrib mal chli drüber, wasi alles so vermisse.

    1. Brot - jaa, würkli Brot!
    Die hend da nume Toascht oder so lümpeligs irgendöppis aber kei aständigs Brot mit enere schöne Chruschte

    2. Feins Hahnewasser
    S Hahnewasser chammer zwar trinke, isch oftmals aber nöd allzu schmackhaft aber defür gitts ja so Wassertröpfli won de Gschmack überdecket

    3. Honig oder Gomfi
    Das hends da zwar scho, aber Honig isch sündhaft tüür und d Gomfi wür vermuetli zimmli rasch aafange z schimmle...

    4. En bewegliche Duschichopf
    Meischtens quätschi mi irgendwie under de feschtverankereti Duschichopf, weller uf sonere tumme Höchi isch. Jedesmal wenni e normali Duschibruuse han, isch es "DAS" Highlight vom Hostel (zmindscht für mich)

    5. S öV System us de Schwiiz
    Da z Neuseeland lauft de öV chli andersch als diheime. Erschtens fahrt de Bus wänner grad Luscht hett, defür fahrt er aber vill. Heisst, mer gaht eifach mal ad Haltestell und wartet maximal 15 Minute. Zweitens sind d Priise eher höch. Drittens hetts kei Aazeige und kei Durchsage, ich muen amigs d Haltestelle dusse abzelle, was eher e Glückssach isch. Mengsmal halted d Busfahrer denn extra aa und seged, dass das de Stop isch, won mer usemuen. Han bisher aber nanig so vill Glück gha det dure (aber ich han mis Ziel imfall erreicht!)

    6. Last but not least - s Ballett
    Immer wenni Musig ghöre, chönti grad aafange tanze... Aber zum trainiere chumi eifach nüme, da muessi mer nüüt vormache. Naja, defür wird denn umso härter trainiert, wenni wieder zrugg bin :-)

    Momentan chunt mer grad nöd vill meh in Sinn, villecht chunt ja spöter na eppis dezue.

    Bis Bald

    Ps. Zum alli Grücht usem Wäg z ruume, nei ich chume pünktlich wie planet hei! Au wenni mer s'verlängere überleit han, d Umbuechigschöschte sind vill z tüür, als dass sich das lohne würd.    Read more

    See translation
    Map
  • Ozeanien RetourAbentüür Ozeanie
    Day119

    Wiehnachte i Down Under

     December 26, 2017 in New Zealand ⋅ 🌧 12 °C

    Aso das Wiehnachte isch definitiv andersch gsi, alsi mer bisher gwohnt gsi bin. 1. fiiret d Kiwis am 25 Dezämber Wiehnachte und nöd so wie mir am Heiligabig am 24. und 2. wirds da au nöd so übermässig zelebriert wie ide Schwiiz. Logisch gsehsch überall mal wieder es Wiehnachtsplakat, aber es isch kein Teil so extrem wie diheime. Defür hend sie da am Boxing Day (26. Dezämber) extrem vill Rabatt, fasch wie am Black Friday. De 24 hani in Mount Cook verbracht, de höchschti Bärg Neuseelands und dete hetts mer sehr gfalle. Mer sind ufe 3 stündigi Wanderig gange und hindere zum Gletscher gloffe. S wätter isch wunderbar gsi, aber sehr windig und drum au bitzeli frisch. Am Abig bini go Sterne luege, das isch au schön gsi, aber ha ghofft gha, dases dunkler segi... Am 25. bini wiiter uf Christchurch. Ufem Wäg hemmer mit paarne Lüüt usem Bus en Christmas Brunch gmacht und in Christchurch sälber am abig denn es Christmas Dinner, mit Salat, Schinke und Pavlova. Das isch es süesses Gebäck garniert mit Schlagrahm und Frücht. Es bestaht mehrheitlich us Eier und Zucker, mega fein! Denn hemmer na en Wiehnachtsfilm "Elf" glueget und denn isch Wiehnachte au scho wieder ume gsi... Merry Christmas everyone!Read more

    See translation
    Map
  • Ozeanien RetourAbentüür Ozeanie
    Day111

    Fazit vode erschte Wuche

     December 18, 2017 in New Zealand ⋅ 🌙 14 °C

    Läck, i dere Wuche isch aso einiges gloffe. Aagfange hett mis Abentüür miteme chline Spurt uf de Bus zue, well mis Gaschtmami z spaat abgfahre isch. (Kiwi Mentalität - wennd am 3 noimets si muesch, denn heisst das fürd Kiwis am 3 abfahre...) Denn simmer in Abel Tasman gange und hend en wunderbare Tag dörfe verbringe. Nachene simmer wiiter uf Westport. De Busfahrer hett scho rächt gha - there's so much nothing to do. Richtigi Schnarchstadt! Wiiter isches in Franz Josef gange und dete isch aso einiges gloffe... Am 1. Tag bini go Heli Hike (mitem Heli ufe uf de Gletscher, dete e gfüehrti Wanderig und denn mitem Heli wieder abe) Am 2 Tag bini mal so näbebii us 4000 Meter useme Flugzüüg gsprunge und das isch aso obermegagigahammercool gsi! Wänns nöd so tüür wär, würi aso grad namel go Fallschirmspringe. Am 3 Tag bini id Kiwiufzuchtstation gange und han einiges dete erfahre. Wenn d Kiwis langsam und sicher ad Natur gwöhnt werdet hends e 95% Überläbenschance, wenns normal ide Wildnis ufwachset isch die Chance nume 5%. Zudem werdet dene ihri Eier so gross, dass d Muetter am Schluss nütme ässe chan, well d Organ so zämmequätscht wärdet... Han denn au na is Nocturnal House dörfe, woni au alli 3 Kiwis gseh han. Nachem Franz Josef simmer uf Wanaka, chli und härzig. Es gitt ein sehr bekannte Baum dete - lone tree from lake Wanaka. Isch en Baum won im Wasser drin wachst und quicklebändig isch... Hüt morge hani zum erschte Mal es Flugi gfloge und das isch aso au zimmli cool gsi. Han würkli volli Kontrolle übers Flugi gha und de Fluglehrer hett ameds eifach gseit, wasi mache muen. Ähnlich wie ide Fahrstund. S isch aber rächt windig gsi det obe und drum isch s Flugi zimmli hii und häärgschüttlet worde... Fascht wie ufere Achtibahn. Momentan bini i Queenstown, Hauptstadt vom Adrenalin und das Städtli hett aso ächt Charme. Mer sind d Geburtsstätte vom Bungee Jump go aaluege (43 Meter abere Brugg) Hender gwüsst, Bungee isch na relativ jung, es gitts das erscht sit 1986... So, erschti Wuche dure und s Fazit isch - cool, tüür aber jede Rappe wärt und Flugzüüglaschtig.Read more

    See translation
    Map
  • Ozeanien RetourAbentüür Ozeanie
    Day103

    Fertig Schuel - Hallo Abtentüür

     December 10, 2017 in New Zealand ⋅ 🌙 3 °C

    So, 3 Mönet Schuel sind scho ume... Han grad erscht mini Abschlussprüefige gha und bin jetzt so richtig bereit für die nögschte 3 Mönet reise! De Rucksack isch packt und s Härz isch parat für die neue Abentüür. Ich weiss nöd, wie oft und was ich poste wirde aber ihr wärdet sicher ufem einte oder andere Wäg vo mir ghöre...Read more

    See translation
    Map
  • Ozeanien RetourAbentüür Ozeanie
    Day88

    Wuchenänd in Kaikoura

     November 25, 2017 in New Zealand ⋅ ☀️ 13 °C

    Bin das Wuchenänd in Kaikoura gsi, das isch sochli es Mekka für alli Wassertierliebhaber (Wal, Delfin, Seehund und Albatross) Bin uf de Delfin watching tour gsi, doch nöd nume das, mer sind au mit dene go schwümme! Das isch aso na ganz aaschträngend, wells rächt schnäll sind und s Wasser iisig chalt gsi isch. Mer hend zwüsche 200-300 Delfine gseh und es hett au en huufe Jungtier gha, won im Oktober gebore sind. Das isch mega härzig gsi, s Mami und s Junge mitenand z gseh! Mer hend aber au Albatrosse und ein Seehund gseh, das isch au rächt härzig gsi. Am Namitag simmer denn bitzeli usserhalb vo Kaikoura gsi, dete hetts e Seehundkolonie und das isch sehr spannend gsi (hett aber mengmal fürchterlich gstunke, weiss nöd öb das d Seehünd oder s modrige Meerwasser gsi isch) Am Sunntig simmer denn zruggfahre und hend ide Hanmer Springs en Halt gmacht, dete gitts es Thermalbad well dete heissi Quällene entspringet. Das hett richtig guet tah, vorallem well die ganzi Autofahrt 6 Stunde (ein Wäg) gaht... Es super weekend gsi!Read more

    See translation
    Map
  • Ozeanien RetourAbentüür Ozeanie
    Day69

    Kiwi vs Schwiiz

     November 6, 2017 in New Zealand ⋅ 🌙 14 °C

    Uf Wunsch vo einige gitts hüt emale en Iitrag zum Thema "typisch Kiwi"

    Kiwis sind sehr offeni und hilfsbereiti Lüüt, won di au mal ide Warteschlange chönd druff hiiwise, dases noimet andersch no e freii Kasse hett (und die isch denn au frei)
    Vorallem bi eltere Lüüt wird mer oft Darling oder Sweetheart gnännt, am afang chli unagnehm, aber eigentlich ganz normal.
    Kiwis laufed grundsätzlich immer barfuess ume - und das isch sehr e kontroverses Thema. Gwüssi Lüüt liebets und gwüssi hassets, ide Mitti gitts nüüt.

    Neuseeland isch grundsätzlich sehr suuber und mer gseht sehr wenig Raucher. Plaanet isch, dass NZ (Neuseeland) bis öppe is 30gi rauchfrei isch. NZ hett die jüngschti Premierministerin, sie isch grad emale 37 Jahr jung.

    NZ isch oft vo Erdbebe betroffe, han bisher aber na keis schlimms erläbt... Sie chönd zwar erdbebesicheri Hüüser boue aber zum die abzdichte fehlt entweder s Wüsse oder s Gäld. Drum isches oft rächt chalt oder im Summer denn brüetend heiss.

    Kiwis behauptet sie redet Änglisch, i Tat und Waret isches aber irgend e anderi Sprach... "The rellies have invited us to a barbie, it's pot luck so we'll throw a few vegges and saussies in the ute before we head off.. Nana will probably make us one of her lovely pavs for pudding. You'll love her -she's a hard case!"
    Das wär en Kiwi Satz und nei, zum Glück redets nöd immer so^^ Wer interessiert isch ade Uuflösig, eifach aafröge!

    Sie bruchet oft anderi Wörter oder es "e" wird oftmals als "i" uusgsproche... Rächt kompliziert!

    Kiwis sind überfründlich!! Das isch unglaublich, anstatt dassd seisch, das Tüechli stinkt, dörfi es neus haa? muesch zersch chli smalltalke und denn s thema mal aaspräche, dich ständig entschuldige und Sätz bruche a là "If you probably wouldn't mind, may I probably take a new towel but only if you have one, if... Ja, es sind nöd alli so schlimm aber es isch doch dütlich formeller und hypotetischer.

    Kiwis sind sehr druff bedacht, es allne rächt z mache. Es guets Biispil sind da d Hündeler. Ide Schwiiz secklet doch d Hünd immer uf eim zue und de Hundehalter seit oft, de macht nüüt, wott nume spille. Da z Nelson, gönd d Lüüt sogar bitzeli abem Wääg und hebed de Hund ade Leine und wartet bis mer verbii gloffe isch. Wien ich das gnüsse zum nöd immer en sabbernde Hund um mich ume müesse z haa!

    Es gitt ja Religione wältwiit - Christetum, Buddhismus, Muslime, etc.
    Das hends da zwar scho au, aber die wahri Religion isch Rugby!

    Wennd usswärts go ässe gahsch, gitts immer gratis Wasserfläschene dezue, won mer au naafülle lah chan. Zudem machet d'Kafis am 5i zue, chli müesam wännd gmüetlich käfele wettsch und denn wirsch vor d Tüüre gschtellt. Au susch machet die meischte Läde scho am 5i zue, usser de Countdown oder New World (wie Coop und Migros) die hend bis am 10ni offe.

    Kiwis chönd kei guets Brot bache und wüsset au nöd was richtigi Härdöpfel sind. Defür machets richtig guete Toascht (s gitt ameds e halbi Reihe voller underschidlichem Toascht) und sie hend feini Frücht! Grundsätzlich gitts jede Tag am Mittag und am Abig Fleisch, meischtens Güggeli. Ich säg eu, wänn ich wieder zrugg bin, iss ich es halbs Jahr lang meh kei Fleisch... Nei, villech nöd, aber es gaht mer mengsmal schochli uf de Geischt, das ville Fleisch.

    Am Strand z sii chan sehr romantisch sii - aber d Folge devo chönd au sehr unagnehm sii. Es gitt so chlini Mischtviecher namens "Sandflie" und dene ihre Stich bisset wie Sau! Und sie verheilet nöd sehr guet, han überall Fläcke a mine Bei wege dene Sauviecher. D Südinsle segi schlimmer als d Nordinsle isch mer gseit worde. Mal luege... Ebefalls e Gfahr isch die starchi Sunne. NZ hett eini vode höchschte Chräbsratene wältwiit. D Sunne brännt sehr starch und mer verbrännt sich schnäll. Ich hans genau eimal gschafft zum mich am Strand nöd z verbränne - han mi alli 15 Minute namel komplett neu iigrämet... Isch nöd so toll det dure.

    Es typisches Kiwi wuchenänd wär en Uusflug inen Nationalpark und dete go zälte.

    Wenn dich öpper fröget "we should go and have dinner together some time" heisst übersetzt "ich mag dich" aber es heisst NÖD dass die Person effektiv mit dir wett go znacht ässe... Some time heisst nie!

    Und a mini ehemalige Arbetskollege - da hends variabli Buspriise ;-) Eigentlich wür de Bus an Strand 3 Dollar choschte (luut Prospäkt) meischtens zahl ich 2.50 han aber au scho nume 2 oder sogar na weniger zahlt... Das System durchschau ich nanig.

    Für alli won interessiert sind, e gitt e gueti Serie uf Youtube, won genau das Thema behandlet. Gänd eifach Lifeswap und Goethe ii und dänn findeders. Es gaht um zwei Jungs won ihres Läbe tuuschet hend, ein Kiwi und ein Düütsche und dene ihri Problem wons händ, mit de jewilige Kultur. Es isch zeichnet und behandlet aso ächt Themene, won au mich beträffet und mengsmal verwirret :-D

    I demfall "bye guys, enjoy life"    Read more

    See translation
    Map
  • Ozeanien RetourAbentüür Ozeanie
    Day58

    Mehrtägige Usflug Tag 3&4

     October 26, 2017 in New Zealand ⋅ ☀️ 14 °C

    Nachem Abel Tasman simmer wiiter richtig Golden Bay gange. Das isch chli en Küschtezuug won aso wunderschön isch. Mer sind ebefalls au na zude Pupu Springs gange, das isch binere Quälle und ich säg eu - so klars Wasser hender aso na nie gseh! Nachene simmer wiiter zum nögschte Campingplatz und hend eus dete en gmüetliche Namitag gmacht. Am Morge druff han ich namel de Sunneuufgang aaglueget (wunderschön gsi) und denn hemmer eusi Zält zämmgleit und sind wiiter as Cape Farewell. Mer hend en Uusritt gmacht, won als eine vode schönschte Uusritt vo Neuseeland bekannt isch. Es isch zwar schön gsi, aber han da aso au scho besseri Uusritt ide Schwiiz gmacht... Aber ich muen säge, es isch scho na speziell so am Strand go ritte. S isch nöd so klassisch Strand, sondern meh so Moormässig gsi. Öppe so stell ich mer d Nordsee vor und s isch sochli wiene Wattwanderig ufem Rossrugge gsi. Nachem Uusritt simmer wiiter an Waharariki Beach gange. Das isch en riisige Strand, mit massig villne Sanddüne und extrem starchem Wind. Als tüpfli ufem i hemmer aso au na en Seehund gse! Das isch ächt wunderschön gsi dete, aber mer sind alli sehr müed gsi und drum simmer denn nachher au wieder heigfahre.Read more

    See translation
    Map
  • Ozeanien RetourAbentüür Ozeanie
    Day55

    Mehrtägige Usflug - Tag 1&2

     October 23, 2017 in New Zealand ⋅ 🌙 13 °C

    Da mer e verlängerets Wuchenänd gha hend (es sind Wahle gsi), simmer ufen Uusflug gange. Am erschte Tag simmer vo Nelson uus via Takaka in Abel Tasman gfahre und hend im Totaranui Campground übernachtet. Das isch mega cool gsi, s Meer rusche und glichziitig ghörsch Grüüsch wie im Dschungel. Am nögschte Tag simmer go wandere gange, da isch teilwiis aso na ganz schön aaschträngend gsi - aber es hett sich glohnt! Grün sowiits Aug gseeht, überall Farn und irgendwelchi Vögel, woni kei Ahnig han, wie die heisset.. Richtig Dschungel!Read more

    See translation
    Map
  • Ozeanien RetourAbentüür Ozeanie
    Day55

    Update us Nelson

     October 23, 2017 in New Zealand ⋅ 🌬 13 °C

    Hallihallo ihr liebe
    Hüt mal es Update us Neuseeland :-)
    Mir gahts ganz ok, d Tage sind vollpackt mit lärne und Husufgabe... Han min erschte freiläbende Haas entdeckt :-D Als Funfact für alli Herr der Ringe Fans - eusi Schuel liit grad näbe de Manufaktur vom "The Ringmaker" und nei, ich chaufe kein Ring, die sind sacktüür... Zudem simmer mal na in Trampolinpark gange, wommers au sehr gnosse hend.Read more

    See translation
    Map
Never miss updates of Ozeanien Retour with our app:

FindPenguins for iOS FindPenguins for Android