Australische Busch zu Pferd🐎

Am 05.15 hüt Morge isch Tagwach gsii! ⏰️
Mer hend nämli für uf die 9ni en Usritt im Australische Busch buechet, und de isch no guet 2½ Stund vo eusem Hotel entfernt.
Mer hend also s'Navi is Landesinnere grichtet und sind lösdüüst. Natürlich in Rege🌧
Zerst hemmer no sorge gha, dass weg dem Wetter eusen Trip storniert wird aber nach emene Telefon mit de Guides, hemmer eusen Weg fortgesetzt. De Rege sett nämlich wiiter ad Küste zieh und eus grösstenteils verschohne.
Au wenn die Strasse zum Stall hindere immer wilder und weniger Teerig worde sind, hemmers doch pünktlich gschafft, und mir sind au die einzige Gäst gsii hüt.
De Peter und d'Gill hend eus denn passendi Helm geh und eus eusne Rössli für de Morge vorgestellt.
De Nico het Missy und Tamara Snip riite, zwei super liebi Quarter Horse Stute. Die werdet im Western Stil gritte, also au eppis neus für Tamara🤠🐎
Mit de Gill voruus, denn Tamara, Nico und Peter hemmer eus us de Arena ufgmacht ufs Land vo eusne beide Guides. Sie besitzet nämlich 2 Hektare hügeliges Buschland, wo sie Black Angus Küeh und ihri Ross haltet.
Nach em Nico sim erste richtige Trab, hemmer denn au no s'Glück gha, en wilde Koala i de Bäum z'erspähe🔎 de het sich au weg em Rege uf sim Ast ganz zemegrollt und eus nume kurz aglueget, bis er wieder go pfuuse isch. Eusi Guides hend denn verzellt, dass sit sie das Land kauft und wieder meh Bäum pflanzt hend, d'Koalas au wieder zrugg cho sind. Au mal schön zghöre, wenn mer sust immer nur ghört wie sie Lebensruum verlüürrt!🤩
Ihres Feehüüsli hemmer au entdeckt, wo mer hend müsse um de Baum ume, eusi Ross ahalte und Glocke lüüte, denn eus eppis vo de Fee wünsche🧚‍♀️ Zum de Tamara, will sie ja mit riite selber erfahrig het, e extra challenge geh, het sie das alles einhändig derfe mache 😉
Drufabe hemmer eus no rasch trennt, denn het Tamara mit de Gill chöne es chlises Galöppli über d'Wiese mache, während dem de Nico mit em Peter schön im Schritt zum Treffpunkt gwanderet sind😁
Eso isch eusen zwei Stunde Ritt au scho bald wieder verbii gsii. Es letzts Mal hemmer eusi neue Skills uf em Parkour mit Slalom bewiese, und denn hets gheisse abstiiege und Rössli kraule als Dankeschön🐴🥰
Bi de Gill und em Peter hemmer eus au verabschiedet und bedankt für de schöni Ritt. Sehr empfehlenswert!
Mir hend eus denn wieder is Auto ghöckt und sind namal ca 2½h zrugg nach Brisbane gfahre, wo mer eusen letzte Tag in Australie verbringe werdet.Okumaya devam et