Id Höchi⛰️

Hütige Ziel wär eigentlich gsi, dass mer mit em Seilbähnli uf de Whistler Mountain ufegönd und denn eh ca 3h langi Wanderig richtig Talstation mached. Leider het eus Dame am Schalter vom Bergbähnli gseit, dass de Trail zum abelaufe immer no gesperrt isch, aber ufem Berg gits es paar Möglichkeite zum umelaufe. Fahrt im Bähnli het ca 7 Minute duret und mir sind scho ufem Berg ahcho.
Chum simmer zum Gondeli use cho, het eus au scho euse stetigi Begleiter, de Wind, in Empfang gno. Doch die Ussicht wo mer gha hend isch Bombastisch gsi, mir hend sogar de Mount Robson gseh, mit 3’954m.ü.M de höchstei Berg vo de Canadian Rockies. 🤓 Eus isch gseit worde, dass das recht selte isch, das mer de Mount Robson so lang und so guet gseht, es git nume ca 20 Täg pro Jahr wo das de Fall isch.
Da Wandermöglichkeite aber eher mau, und es au recht chüel uf dem Berg gsi isch, simmer gli ehmal is Resti go ihkehre. Churz vor de zwei isch denn euses Gondeli abe gfahre.
Da Tamara no euse gestrig Tour Guide gfräget het wo mer am beste ide Umgebig Vögeli gseht, hemmer eus no in Richtig Cottonwood gmacht. Dehte simmer en Looptrail abgloffe, wo dur en Wald und au ah es paar See verbi gfüehrt het. Leider hemmer erst gege de Schluss vo dem Loop Glück gha mit de Vögeli.
Am Abig hemmers denn gmüetlich gno und freued eus uf morn, wenns denn wiiter richtig Lake Louise und Banff gaht. 😁😁Read more